“Dihang mag-ampo, ayawg balikbalika ang samang mga pulong.”​—Mateo 6:7.

Dili gusto ni Jehova nga balikbalikon nato ang memoryadong mga pag-ampo o basahon kana gikan sa libreta sa pag-ampo. Gusto niya nga kinasingkasing tang mag-ampo. Unsay imong bation kon balikbalik na lang ang isulti sa imong higala kanimo kada adlaw? Seguradong kapoyan kang maminaw niya. Ang maayong managhigala mosulti sa ilang tinuod nga gibati. Dihang mag-ampo ta sa atong kaugalingong pulong, makasulti tag personal nga mga butang ngadto sa atong langitnong Amahan.

“Dihang nangayo mo, wala mo makadawat kay nangayo mo alang sa sayop nga katuyoan.”​—Santiago 4:3.

Siyempre dili ta magdahom nga tubagon sa Diyos ang atong pag-ampo kon ang atong gihangyo mao ang mga butang nga dili niya gusto nga atong buhaton o mabatonan. Pananglitan, tubagon kaha ni Jehova ang pag-ampo sa sugarol nga nangayog suwerte aron makadaog? Ang Diyos klarong nagpasidaan batok sa kahakog ug sa mga patuotuo sama sa suwerte. (Isaias 65:11; Lucas 12:15) Busa klaro nga dili tubagon ni Jehova ang maong pag-ampo. Aron tubagon sa Diyos ang atong mga pag-ampo, seguroon nato nga ang atong gihangyo dili supak sa giingon sa Bibliya.

 “Kadtong dili maminaw sa balaod​—bisan ang iyang pag-ampo dulumtanan.”​—Proverbio 28:9.

Sa panahon sa Bibliya, wala tubaga sa Diyos kadtong nagsalikway sa iyang matarong nga mga balaod. (Isaias 1:15, 16) Ang Diyos wala mausab. (Malaquias 3:6) Kon gusto natong tubagon sa Diyos ang atong mga pag-ampo, kinahanglang sundon nato ang iyang mga balaod. Pero komosta kon duna tay nahimong mga kasaypanan kaniadto? Nagpasabot ba na nga dili na gyod maminaw si Jehova kanato? Siyempre wala. Mahigugmaon tang pasayloon sa Diyos kon magbag-o ta ug maningkamot nga lipayon siya.​—Buhat 3:19.