1. 1. SATANAS NGA YAWA. Si Satanas, ang rebeldeng anghel, mao ang pinakahinungdan sa pagdumot karon. Laglagon sa Diyos si Satanas ug kadtong parehas niya nga nagdumot sa uban.​—Salmo 37:38; Roma 16:20.

2. 2. KALIBOTAN NI SATANAS NGA PUNOG PAGDUMOT. Taposon sa Diyos ang tanang pagkadaotan sa kalibotan, apil ang korap nga mga politiko ug mga lider sa relihiyon nga nagpasiugdag pagdumot. Wad-on pod sa Diyos ang hakog ug korap nga mga negosyo nga namentaha sa mga tawo.​—2 Pedro 3:13.

3. 3. PAGKADILI-HINGPIT SA TAWO. Gipakita sa Bibliya nga napanunod sa tanang tawo ang pagkadili-hingpit​—ang tendensiya nga maghunahuna, mobati, ug mobuhat sa kon unsay sayop. (Roma 5:12) Usa sa maong mga tendensiya mao ang paghambin ug pagpakitag pagdumot ngadto sa uban. Tabangan sa Diyos ang mga tawo nga madaog ang maong mga tendensiya aron mawala na gyod ang pagdumot hangtod sa hangtod.​—Isaias 54:13.

1. 1. WALA NAY INHUSTISYA. Ang kalibotan mandoan sa Gingharian sa Diyos, usa ka gobyerno sa langit nga magdalag hustisya hangtod sa hangtod. (Daniel 2:44) Wala nay pagpihigpihig ug diskriminasyon. Wad-on sa Diyos ang tanang inhustisya nga giantos sa mga tawo karon.​—Lucas 18:7.

2. 2. MALINAWON NA ANG TANAN. Wala nay mag-antos tungod sa kapintasan o gubat. (Salmo 46:9) Ang yuta dili na peligrosong puy-an kay ang tanang tawo makigdaiton na.​—Salmo 72:7.

3. 3. MALIPAYONG KINABUHI HANGTOD SA HANGTOD. Ang tanang nagpuyo sa yuta magpakitag tinuod nga gugma sa ilang isigkatawo. (Mateo 22:39) Wala nay maguol, kay bisan ang dili maayong mga eksperyensiya makalimtan na. (Isaias 65:17) Kay wala nay pagdumot, “mabatonan [sa mga tawo] ang tumang kalipay tungod sa dagayang pakigdait.”​—Salmo 37:11.

Gusto ba kang mopuyo niana nga kalibotan? Bisan karon, daghan ang nakakat-on sa pagwala sa ilang pagdumot pinaagi sa pagsunod sa mga prinsipyo sa Bibliya. (Salmo 37:8) Kanay gihimo sa minilyong mga Saksi ni Jehova sa tibuok kalibotan. Bisag lainlain silag kultura ug kagikan, sama silag pamilya nga nagkahiusa ug may gugma sa usag usa.—Isaias 2:2-4.

Ang mga Saksi ni Jehova malipay sa pagpaambit sa ilang nakat-onan kon unsaon pag-atubang ang inhustisya ug diskriminasyon. Ang imong makat-onan makatabang nimo nga anam-anam nga wad-on ang pagdumot ug pulihan kinig gugma. Makakat-on ka kon unsaon pagpakitag gugma sa tanan bisan niadtong morag dili makaapresyar o nagpakitag pagdumot. Ingong resulta, mas magmalipayon ka karon ug mahimong mas maayo ang imong relasyon sa uban. Labaw sa tanan, makakat-on ka kon unsay himoon aron makapuyo sa yuta nga mandoan sa Gingharian sa Diyos, diin wala nay pagdumot hangtod sa hangtod.​—Salmo 37:29.