Gimahal Ka sa Diyos
ANG Bibliya naay pinakamaayong tambag para nato kay gikan ni sa Diyos. Dili ni libro bahin sa medikal, pero makatabang ni sa praktikal nga mga paagi kon unsaon pag-atubang ang makapaguol nga mga situwasyon, gubot nga hunahuna, emosyonal nga kasakit, ug mga problema sa panglawas ug mental health.
Labaw sa tanan, ang Bibliya nagpasalig nga ang atong Maglalalang, si Jehova nga Diyos, a nakasabot sa atong gihunahuna ug gibati labaw kay kang bisan kinsa. Gusto kaayo siyang motabang nato sa pag-atubang sa bisan unsang problema. Pananglitan, konsideraha ang duha ka makapahupayng teksto sa Bibliya:
“Si Jehova duol niadtong mga dugmok ug kasingkasing; iyang luwason kadtong mga naluya ang buot.”—SALMO 34:18.
“Ako, si Jehova nga imong Diyos, nagahawid sa imong tuong kamot, ang Usa nga nag-ingon kanimo, ‘Ayawg kahadlok. Ako motabang kanimo.’”—ISAIAS 41:13.
Busa sa unsang paagi ta tabangan ni Jehova sa pag-atubang sa problema sa mental health? Sa imong mabasa sa mosunod nga mga artikulo, gipakita ni Jehova sa daghang paagi nga iya gyod tang gimahal.
a Jehova ang personal nga ngalan sa Diyos.—Salmo 83:18.
