SI LUZIA MAGLISOD UG LAKAW. Sa bata pa, nasakit siyag poliomyelitis o polio, usa ka makatakod nga sakit nga moatake sa nervous system sa tawo. Dihang 16 anyos siya, ang iyang amo nga babaye miingon, “gisilotan ka sa Diyos ug polio kay gahi kag ulo ug nagpabadlong sa imong mama.” Bisag milabay na ang pipila ka tuig, nagpabilin to sa iyang hunahuna ug nasakitan gihapon siya.

DIHANG NAHIBALOAN NI DAMARIS NGA NAA SIYAY KANSER SA UTOK, gipangutana siya sa iyang amahan: “Unsay imong nahimo nga nahitabo man ni nimo? Basin naa kay nahimong sala maong gisilotan ka sa Diyos.” Nasakitan pag-ayo si Damaris tungod sa gisulti sa iyang amahan.

Sukad pa kaniadto, ang mga tawo nagtuo nga ang sakit maoy silot gikan sa Diyos. Ang librong Manners and Customs of Bible Lands nag-ingon nga daghang tawo sa panahon sa Kristo nagtuo nga “ang sakit maoy tungod sa sala sa tawong nasakit o sa iyang mga suod, ug ang sakit maoy silot sa maong sala.” Panahon sa Middle Ages “ang ubang tawo nagtuo nga ang Diyos nagpahinabog mga epidemya aron silotan sila sa ilang mga sala,” nag-ingon ang Medieval Medicine and the Plague. Busa dihang minilyon ka tawo ang namatay sa Europe tungod sa usa ka epidemya niadtong ika-14 nga siglo, kadto ba maoy silot sa Diyos sa daotang mga tawo? O kadto ba maoy tungod sa impeksiyon gikan sa mga bakterya, nga maoy giingon sa mga eksperto sa medisina? Ang pipila tingali naghunahuna, ang sakit ba maoy paagi sa Diyos sa pagsilot sa mga tawo tungod sa ilang mga sala? *

HUNAHUNAA KINI: Nganong giayo ni Jesus ang mga masakiton kon ang sakit ug pag-antos silot gikan sa Diyos? Dili ba kana sukwahi sa hustisya ug pagkamatarong sa Diyos? (Mateo 4:23, 24) Dili gayod supakon ni Jesus ang kabubut-on sa Diyos. Si Jesus miingon: “Kanunay nakong gibuhat ang mga butang nga makapahimuot kaniya” ug “akong ginabuhat ang gisugo kanako sa Amahan.”—Juan 8:29; 14:31.

Klaro ang giingon sa Bibliya. Si Jehova maoy Diyos nga “walay inhustisya.” (Deuteronomio 32:4) Pananglitan, dili gayod ipahinabo sa Diyos nga mahagsa ang usa ka eroplano, nga mamatay ang gatosan ka inosenteng tawo, tungod kay gusto niyang silotan ang usa lang ka tawo nga nagsakay niana! Subay sa pagkamatarong sa Diyos, si Abraham, nga matinumanong alagad sa Diyos, nag-ingon nga ang Diyos dili gayod maglaglag sa mga “matarong uban sa daotan.” Siya miingon nga ‘dili gyod kana himoon’ sa Diyos. (Genesis 18:23, 25) Ang Bibliya usab nag-ingon nga “ang Diyos dili mobuhat ug daotan”; siya “dili gayod mohimog sayop nga binuhatan.”—Job 34:10-12.

Ang pag-antos dili silot gikan sa Diyos tungod sa sala nga nahimo. Si Jesus segurado kaayo nianang bahina dihang nakita niya ug sa iyang mga sumusunod ang usa ka tawong buta sukad sa pagkatawo. “Ang iyang mga tinun-an nangutana kaniya: ‘Rabbi, kinsay nakasala nga natawo man siya nga buta, siya o ang iyang mga ginikanan?’ Si Jesus mitubag: ‘Siya nabuta dili tungod sa iyang sala o sa sala sa iyang mga ginikanan, apan pinaagi sa iyang kahimtang makita sa mga tawo ang mga buhat sa Diyos.’”—Juan 9:1-3.

 Bahin sa maong sayop nga pagsabot, ang mga sumusunod ni Jesus seguradong nakurat dihang si Jesus miingon kanila nga dili ang sala sa maong tawo o ang sala sa iyang mga ginikanan ang hinungdan sa iyang pagkabuta. Gawas nga giayo ni Jesus ang maong tawo, gitul-id usab niya ang ilang sayop nga pagsabot nga ang pag-antos silot gikan sa Diyos. (Juan 9:6, 7) Kadtong nag-antos ug grabeng sakit karon mahupayan sa pagkahibalo nga ang Diyos dili maoy hinungdan sa ilang kasakit.

Ang Bibliya nagpasalig nato

• “Ang Diyos dili masulayan sa pagbuhat ug daotan, ni siya mosulay kang bisan kinsa pinaagi sa pagbuhat ug daotan.” (SANTIAGO 1:13) Busa, ang daotang mga butang nga nasinatian sa mga tawo sukad pa sa una, lakip ang sakit, kaguol, ug kamatayon, pagawagtangon sa di madugay.

• Si Jesu-Kristo ‘nag-ayo sa tanang nag-antos.’ (MATEO 8:16) Kay iyang giayo ang tanang masakiton nga miduol kaniya, gipakita sa Anak sa Diyos kon unsay himoon sa Gingharian sa Diyos sa umaabot sa tibuok kalibotan.

• “Pahiran [sa Diyos] ang matag luha sa ilang mga mata, ug ang kamatayon mawala na, ug wala na unyay pagbangotan, pagtiyabaw, ug kasakit. Ang unang mga butang nangagi na.”—PINADAYAG 21:3-5.

Nganong ang tawo nakasinatig grabeng kasakit ug pag-antos? Mao nay pangutana sa daghang tawo sukad pa sa unang panahon. Kon dili ang Diyos ang hinungdan, kinsay mabasol? Hisgotan sa sunod artikulo ang mga tubag niana.