Gikan sa Among mga Magbabasa

Mga Biktima sa Pagsakit Daghan kaayong salamat sa pagpatik sa artikulong “Hinabang Alang sa mga Biktima sa Pagsakit.” (Enero 8, 2000) Ang lalom nga pagsabot ug pagkamabination nakatabang nako sa paglangkit sa impormasyon sa akong kaugalingon nga mga suliran.

B. R., Tinipong Bansa

Nakadawat akog usa ka mensahe gikan sa usa nako ka higala. Siya yanong miingon: ‘Ang artikulo maoy mahitungod nako. Palihog basaha kini.’ Ang maong mubong sulat nakapasubo kanako, sanglit siya ang nagtuon sa Bibliya uban nako niadtong sinugdanan sa katuigang 1970. Wala ako mahibalo bahin niana. Nahupayan ako nga kamo nagpatik sa usa ka prangkang paghisgot bahin sa emosyonal nga kalibog sa mga biktima sa tibuok kalibotan nga nag-antos diha sa mga kamot sa uban.

L. W., Tinipong Bansa

Halandomong Awit Salamat sa mubong artikulo nga “Usa ka Awit nga Wala Gayod Niya Malimti.” (Disyembre 22, 1999) Kining talagsaong awit tinuod nga nagadayeg kang Jehova ug nagpalugmaw sa mga luha sa mga mata. Si Franz Schubert wala mahadlok sa paggamit sa bantogang ngalan ni Jehova.

K. C., Tinipong Bansa

Alang sa kasayoran sa among mga magbabasa, ang awit nga “Die Allmacht” (Opus 79, Num. 2), bisan tuod may pagkarelihiyoso, wala sulata aron gamiton sa simbahan. Gikataho nga gikomposo kana ni Schubert ingon nga resulta sa pagkanatandog sa kahalangdon sa kabukiran samtang didto sa Austria.​—ED.

Disenyo Diha sa Kinaiyahan Ako usa ka magbabasa sa Pagmata! sulod sa kapig 30 ka tuig, apan gibati ko nga natukmod aron ipahayag ang akong pagpasalamat alang sa seryeng “Kinabuhi​—Usa ka Produkto sa Disenyo.” (Enero 22, 2000) Dili ako kinaiyanhong madani sa siyentipikanhong mga ulohan, apan ako nabihag niining sayon-basahon nga mga artikulo.

T. E., Tinipong Bansa

Ang mga artikulo nakapadako sa akong gugma ug pagpabili kang Jehova. Karon nasabtan ko nga ang kinabuhing dayon sa Paraiso dili gayod makapuol. Sa kanunay aduna unyay kahibulongang mga butang nga pagadiskobrehon bahin sa atong Maglalalang. Ang proseso sa pagkakat-on dili gayod unya matapos.

J.R.A., Brazil

Maorag adunay usa ka sayop sa panid 7, nga naghisgot sa gearbox sa langaw. Gipasabot ba ninyo nga “kini magsumpay sa mga pako ngadto sa mga pako”?

P. S., Tinipong Bansa

Wala, kami wala magpasabot niana. Palihog pasayloa ang among sayop. Among tuyo nga ipahayag nga kini magsumpay sa “makina” ngadto sa mga pako​—ang “makina” nagtumong sa kaunoran diha sa dapit sa dughan nga maoy magpalihok sa mga pako.​—ED.

Ako nagtrabaho sa departamento sa panukiduki sa usa ka dakong kompaniya sa kompiyuter sulod sa daghang tuig, ug ako interesado sa pagpadapat sa mga disenyo nga makit-an diha sa kinaiyahan. Apan wala ako mahibalo nga karon adunay usa ka tinong linaing natad sa siyensiya labot niini, nga mao, biomimetics. Makapasubo nga daghan nga nalangkit sa maong pinakyaw nga pagkopya sa kinaiyahan lagmit wala maghatag ug pasidungog ngadto sa orihinal nga Tigdisenyo.

P. G., Tinipong Bansa

Ang artikulo kahibulongang pagkasulat. Ang pipila ka tawo nga akong gihatagan niini mipahayag ug pipila ka makapalig-ong mga komento bahin sa kon sa unsang paagi ang Diyos makahimo sa tanang butang nga hingpit nga walay paghugaw. Tungod sa inyong buhat, gihimo ninyo ang lisod nga materyal nga sayong basahon.

R.D.S., Italya

Mga Kapeligrohan sa Internet Ang artikulong “Mga Batan-on Nangutana . . . Unsaon Ko Paglikay ang mga Kapeligrohan Diha sa Internet?” (Enero 22, 2000) nagpahayag sa ekselenteng katimbang sa pagkamapuslanon ug mga kapeligrohan sa Internet. Ingon nga usang nagatrabaho diha sa Internet kada adlaw ingong bahin sa akong trabaho, akong nasayrang ang mga kapeligrohan kanunayng dayag. Pagkahinungdanon ang paglikay sa maong mga kapeligrohan!

J. L., Tinipong Bansa