Mga Bata sa Umaabot?

Ang tuig maoy 2050. Sulod sa usa ka klinika sa pagkamakaanak, si Melissa nagtan-aw sa eskrin sa usa ka kompiyuter. Namalandong siya. Kon buot sabton, ang pagpilig usa ka anak maoy seryosong butang, dili butang nga dalidalion sa paghimo. Gipakita sa eskrin ang dagway sa mapahiyomong dalagita si kinsa ginganlan nag Alice ni Melissa ug sa iyang bana, si Curtis. Ang dagway ug ang impormasyong napatik ubos niini mosugilon ug daghang butang bahin sa pagkatawo unya ni Alice, sa lawasnon ug sa pangutok.

Si Alice wala pa matawo. Ang umaabot nga dalagita maoy tawhanong miturok nga binhi pa lamang, nga sa luwas nga paagi gitipigan diha sa -200 grado Celsius uban sa dinosenang ubang mga tawhanong miturok nga binhi diha sa duol nga kuwarto. Ang henetikong mga kinaiya sa matag miturok nga binhi gi-scan ug gisulod sa kompiyuter aron tabangan ang mga ginikanan pagpili kon hain niana ang ibutang sa tagoangkan ni Melissa.

Sanglit si Melissa ug Curtis gusto man ug babaye, ang mga lalaking miturok nga binhi gisalikway. Ang mga ginikanan sunod nagsusi sa nahibiling mga miturok nga binhi alang sa mga kinaiya sama sa umaabot nga panglawas, panagway, ug pamatasan. Sa kataposan si Melissa ug Curtis mipili. Siyam ka bulan sa ulahi sila nalipay sa pagkahimugso sa anak babaye nga ilang pinili​—ang tinuod, buhing si Alice.

KINI nga estorya gilakbit-asoy gikan sa usa ka sugilanon nga sinulat ni Lee Silver, usa ka propesor sa molecular biology sa Princeton University, New Jersey, T.B.A. Kini maoy usa ka pangagpas bahin sa iyang gituohan nga mahimong mahitabo sa umaabot nga mga dekada. Iyang gibase ang iyang mga ideya sa nagpadayong panukiduki ug teknolohiya. Nga nahitabo na, ang tawhanong mga miturok nga binhi masusi aron hisayran ang tinong henetikong mga sakit. Ug kapin nag 20 ka tuig ang milabay sukad natawo ang unang batang gipaagi sa aparato sa laboratoryo. Kay miturok sulod sa usa ka petri dish, siya mao ang unang tawo nga miturok sa gawas sa tagoangkan sa iyang inahan.

Ang kamatuoran nga ginganlan ni Dr. Silver ang bata ug Alice makapahinumdom nato sa inilang sugilambong nga Alice in Wonderland. Sa pagkatinuod, ang umaabot nga gipanan-aw sa daghang tawo maoy yuta sa mga katingalahan. Ang usa ka editoryal sa bantog nga magasing Nature miingon: “Tungod sa mausbawong katakos sa siyensiya labot sa henetika sa molekula atong ginaatubang ang mga posibilidad nga makaarang sa pag-usob sa kinaiyahan sa atong mga espisye.”

Sa mosunod nga artikulo, atong tan-awon ang pipila ka kaugmaran sa bioteknolohiya, nga ipunting ilabina sa mga posibilidad sa “pagpauswag” sa katawhan. Ang ginahimo sa mga laboratoryo karong adlawa moapektar ba sa imong kinabuhi o nianang sa imong mga anak? Nagtuo ang daghang tawo nga moapektar kini.