Gikan sa Among mga Magbabasa

Ika-20ng Siglo Mga pahalipay bahin sa matulon-anon ug edukasyonal nga sinulat nga inyong gipatik. Ingong usa ka koresponsal sa mga kalihokan sa politika ug militar, ako hinawayon gayod bahin sa mga artikulo nga akong ginabasa. Apan ang seryeng “Ang Ika-20ng Siglo​—Makuyaw nga Katuigan sa Kausaban” mao ang labing maayo. (Disyembre 8, 1999) Ang ilustrasyon sa hapin nagpabanaag pag-ayo sa labing hinungdanong mga hitabo niini nga siglo.

A. P., Angola

“Melatonin” ug Depresyon Ang balita sa “Pagpaniid sa Kalibotan” nga “Taas nga Gabii” (Marso 8, 2000) nakadani kanako. Ako nagtrabaho sa usa ka institusyon nga nagtuki bahin sa melatonin, ug mipatim-aw nga ang inyong balita dili tukma. Kon ang melatonin gilangkit sa popanahong depresyon, ang sobra inay kay ang kakulang niini nga hormone ang hinungdan.

X. Y., Pransiya

Mopatim-aw karon nga ang tukmang kalangkitan sa melatonin ngadto sa popanahong depresyon​—kon duna man​—dili matino. Di pa dugay, ang mga tigdukiduki nagsugyot nga ang isyu tingali, dili sa lebel sa melatonin, kondili kon sa unsang paagi ang kakulang sa kahayag mahimong magbalda sa siklo sa paggamag melatonin. Dayag, dugang nga panukiduki ang kinahanglang himoon sa dili pa makab-ot ang bisan unsang lig-ong mga konklusyon.​—ED.

Sayop nga Pagdibuho? Didto ako sa ospital nga nagbasa sa Enero 8, 2000 nga isyu, nga may seryeng hapin nga “Walay-Dugo nga Pagpanambal ug Operasyon​—Ang Nagdakong Panginahanglan,” sa dihang ang labawng kardiologo ug usa ka tem sa mga estudyante misulod. Siya miingon nga ang EKG (electrocardiogram) nga linya diha sa hapin maoy baligtad.

J. T., Inglaterra

Ang linya gipakita ingong usa ka artistikanhong himan. Gipakita kini sa pipila ka tig-atiman sa panglawas una pa kini gipatik; apan, ang gikauyonan tali sa ubang medikal nga mga kawani nga nakakita sa dibuho sukad niadto mao nga kini sayop nga pagkadibuho. Kami mangayog pasaylo tungod sa sayop.​—ED.

Paghunong sa Pagpanabako Di pa gayod kaayo dugay nga ako nagiyan sa mga sigarilyo, marijuana, alkoholikong ilimnon, ug cocaine. Ako naningkamot sa daghang higayon sa pag-undang nga kinaugalingon apan wala molampos. Sa panahon na lamang nga ako mituon sa Bibliya uban sa mga Saksi ni Jehova nga ako misugod sa pagbati nga ako bililhon. Uban sa tabang ni Jehova, wala na ako mogamit sa bisan unsang droga o manabako sukad sa Enero. Grabe kaayo ang mga simtomas sa paghunong. Sukad sa Enero, wala gayod akoy maayong tulog sa gabii. Ang Marso 22, 2000 nga isyu nga may seryeng “Kon sa Unsang Paagi Ikaw Makahunong sa Pagpanabako” mitabang kanako sa pagkasabot nga ang akong pagkadili-makatulog maoy simtoma sa paghunong ug nga ako wala mabuang! Daghang salamat.

D. M., Tinipong Bansa

Sa dihang akong nabasa ang inyong paghubit bahin sa epekto sa paghunong sa paggamit ug nikotina, nagpahinumdom kini kanako sa akong naeksperyensiyahan. Sa sinugdan wala na akoy laing mahunahunaan kondili sigarilyo. Inanayng milabay ang mga adlaw, dayon mga semana, ug dayon mga bulan nga wala na gayod mosantop sa akong hunahuna ang bahin sa sigarilyo. Si Jehova mitabang gayod kanako human nga ako misaad sa akong kaugalingon nga dili na gayod ako manabako pag-usab. Kadto maoy 20 ka tuig na ang milabay, ug, sa pagkamatuod, wala na gayod ako manabako pag-usab.

D. A., Italya

Mga Anunugba Daghang salamat sa pagpatik sa artikulong “Sa Dihang Buta ang Gugma,” bahin sa emperor moth. (Marso 22, 2000) Nakakita ako ug usa sa likod sa akong balay. Sa dihang ang ikaduha miabot, akong giletratohan ug gipasalida sa lokal nga TV. Akong gipabilhan pag-ayo ang paningkamot ug panukiduki nga nalangkit sa pagtagana sa mga magasin.

I. K., Tinipong Bansa

El Niño Buot kong pasalamatan kamo tungod sa matulon-anong artikulo nga “Unsa ang El Niño?” (Marso 22, 2000) Sa tinuoray lang, nadunggan ko ang tanan nga naghisgot bahin sa El Niño niadtong 1998, ug wala akoy ideya kon unsa gayod kana. Aw, ang katin-awan gihatod diha mismo sa akong pultahan! Ang inyong artikulo mubo apan matulon-anon kaayo.

U. N., Tinipong Bansa