Ang mga Tulip Nakatabang nga Mabuhi Sila

SA ULAHING mga bulan sa Gubat sa Kalibotan II sa Uropa, ang usa ka mapig-otong lakang sa Nazi nakapahunong sa tanang agi-sa-tubig nga mga kargamentong pagkaon paingon sa dagkong mga siyudad sa kasadpan sa Netherlands. Ang mga sangpotanan maoy malaglagon, ingon nga mapamatud-an sa daghan nga nakalabang-buhi niadtong panahona.

Ang usa ka tawo kasagarang nagkinahanglan ug mga 1,600 ngadto 2,800 ka calorie sa usa ka adlaw. Apan sa pagka-Abril 1945, ang pipila nga nagpuyo sa Amsterdam, Delft, The Hague, Leiden, Rotterdam, ug Utrecht nagkinabuhi sa kada adlaw nga mga rasyong motumbas tali sa 500 ug 600 ka calorie sa usa ka adlaw. Gituohan nga ingong resulta, panahon sa Gutom sa Tingtugnaw sa 1944/45, labing menos 10,000 ka sibilyan ang namatay gumikan sa kakulang sa sustansiya.

Sumala sa nakalabang-buhi nga si Susan Monkman, ang iyang pamilya midangop sa pagkaon sa mga turok sa tulip. “Halang kaayo ang mga turok sa tulip,” matod ni Monkman. “Bisag kapila kini lat-an dili matibhangan ang kahalang. Bisan pa niana kami nalipay nga nag-usap niana sa hinay ug maampingon nga paagi. Ang among mga tutonlan mikarat sa daghang adlaw human niana.” Aron mamenosan ang pagkarat, ang pipila ka carrot o sugar beet, kon aduna, isagol sa mga turok.

Ang usa ka 100-gramong tipik sa turok sa tulip adunay mga 148 ka calorie, 3 ka gramong protina, 0.2 ka gramong tambok, ug 32 ka gramong carbohydrate. Busa, ang way-lami nga diyeta sa mga turok sa tulip mahimong nakatabang pagluwas sa daghang taga-Netherlands gikan sa pagkamatay sa gutom.

Ang makalilisang nga kapintasan sa tawo ngadto sa tawo, nga ang mga pananglitan niana nakulit nga dili mapala sa kaisipan sa daghan, nag-ilustrar sa dako kaayong panginahanglan sa tawo sa katumanan sa saad sa Bibliya: “Adunay bag-ong mga langit ug usa ka bag-ong yuta nga atong ginapaabot sumala sa saad [sa Diyos], ug niini magpuyo ang pagkamatarong.”​—2 Pedro 3:13.

[Picture Credit Line sa panid 16]

Internationaal Bloembollen Centrum, Holland