Gikan sa Among mga Magbabasa

Uloran Ang artikulong “Sa Dihang Buta ang Gugma” (Marso 22, 2000) naghisgot sa anunugba nga migula gikan sa pagkaulod (chrysalis) niini. Apan, ang mga kabakaba ang mohimog ulod. Ang mga anunugba mohimog mga uloran.

V. L., Tinipong Bansa

Sumala sa “Webster’s Ninth New Collegiate Dictionary,” ang terminong “chrysalis” mahimong ipadapat sa katibuk-an nga magkahulogang “usa ka ulod sa insekto.” Tinuod, mas komon nga gamiton kining pulonga may kalabotan sa mga kabakaba. Apan, gipadapat sa pipila ka tinubdan ang maong termino ngadto sa mga anunugba.​—ED.

Vasa Buot kong ipahayag ang akong pagpabili alang sa artikulong “Ang Vasa​—Gikan sa Pagkalunod Ngadto sa Pagkahimong Talan-awon.” (Abril 8, 2000) Ingong magsusulat sa kasaysayan nga nakahimo na ug pipila ka sinulat bahin niining ulohana, ako makapamatuod nga ang artikulo maayo gayod kaayong pagkatuki. Ekselente ang pagsaysay niini sa mga hitabo diha sa timbang nga paagi.

T. W., Alemanya

Legal nga mga Kadaogan Di pa dugay ako miadto sa korte aron maangkon ang katungod sa pag-atiman sa akong mga anak, ug gihimong isyu sa akong kanhing bana ang akong relihiyosong mga tinuohan. Malisod kini. Sa dihang akong nabasa ang artikulong “Ang Gubat Dili Imo, Kondili sa Diyos” (Abril 22, 2000), mitulo ang akong mga luha.

D. B., Tinipong Bansa

Human nako mabasa ang artikulo, akong gipaambit kini sa lokal nga mga abogado. Walay si bisan kinsang midumili niini. Ang pipila nagdapit pa gani kanako ngadto sa ilang mga opisina aron mangape ug hisgotan kini ug dugang. Ubay-ubay ang nangayo ug dugang mga kopya alang sa ilang kaubang mga abogado. Nahingangha ang tanang abogado sa dihang akong gipakita kanila nga si Hayden Covington nakadaog ug 36 sa 45 ka kaso atubangan sa Korte Suprema sa T.B.

C. M., Tinipong Bansa

Tin-edyer nga mga Amahan Nagsulat ako aron ipahayag ang akong halalom nga pagpabili sa artikulong “Mga Batan-on Nangutana . . . Pagbaton ug mga Anak sa Gawas​—Maghimo ba Kini sa Usa nga Tinuod nga Lalaki?” (Abril 22, 2000) Ako 28 anyos ug ulitawo, ug ako nag-alagad ingong usa ka espesyal payunir, o bug-os-panahong ebanghelisador. Niining bahina sa Kasadpang Aprika, ang usa nga sama nakog pangedaron nga wala pay asawa o trato isipon ingong dili-sibilisado o baog. Sagad akong yagayagaan ug tamayon tungod niini. Apan, ang akong determinasyon nga magpabiling putli gipalig-on sa inyong artikulo.

A. E., Ghana

Nawala ang akong pagkabirhen samtang usa pa ka tin-edyer ug nakighilawas sa lainlaing mga lalaki. Gibati ko nga hugaw kaayo ako sa matag higayon, ug sagad akong pahimuslan. Kini ang hinungdan sa akong hilabihang kaguol. Gitabangan ako ni Jehova sa paghinlo sa akong kinabuhi, ug ako karon naminyo na nga malipayon ngadto sa usa ka buotang lalaki. Apan dalayegon nga kamo nagpatik sa maong mga artikulo sa pagtabang sa pagpaamgo sa mga batan-ong lalaki nga ang ilang gibuhat makapasakit sa usa ka babaye sa tibuok niyang kinabuhi.

F.A.S., Alemanya

Napalihok ako sa pagpasalamat kaninyo sa pagsangon sa labing menos katunga sa responsabilidad sa pagkahimong dili-minyong mga inahan diin kini angay​—sa mga amahan! Daghan kaayong tawo nagtuo nga sanglit mga babaye lamang ang magmabdos, gipakita sa pisikal nga kahulmahan nga problema kini sa mga babaye ug ang mga lalaki dili kinahanglang manubag. Padayona ninyo ang paghimo sa mga batan-ong lalaki nga magmasensitibo sa paagi nga buot sa Diyos nga trataron ang mga babaye.

J.M.O., Italya