Kinsay Nagasulti?

ANG tabil gipataas nga nadayag ang tigpasundayag ug ang iyang monyeka. Samtang sila nagbayloay ug mga komedya, ang monyeka daw buhi, nga may kaugalingong tingog ug personalidad. Siyempre, sa aktuwal ang tigpasundayag​—usa ka ventriloquist​—ang nagpagawas sa “tingog” sa monyeka, nga nagbantay kanunay nga dili mogimok ang iyang kaugalingong mga ngabil samtang nagahimo niana.

Buot ka bang mas mahibalo mahitungod niining talagsaong matang sa arte? Ang Pagmata! nakighinabi kang Nacho Estrada, kinsa propesyonal nga ventriloquist sulod na sa mga 18 anyos.

Unsa ang nagkalainlaing mga matang sa ventriloquism?

Sa gitawag nga duol nga ventriloquism, ang tingog sa tigpasundayag daw naggikan sa duol, samag gikan sa usa ka monyekang gitungtong sa iyang tuhod. Sa layo nga ventriloquism, ang tingog sa tigpasundayag daw naggikan sa layo. Ang ventriloquist makahimo usab sa pag-ugom sa iyang tingog mao nga daw naggikan kana sa siradong dapit​—tingali sa usa ka siradong kahon. Ang pipila ka ventriloquist makasuhid sa mga tingog, sama sa tawag sa hayop o hilak sa masuso. Ug dili nila pagimokon ang ilang mga ngabil samtang nagpasundayag.

Ang hanas nga ventriloquist makapakombinsir gayod. Gikataho nga may usa nga nagsultig giugom nga tawag sa pakitabang samtang miagi ang karomatang may uhot. Aktuwal nga gipahunong sa mga tawo ang karomata ug gipadiskarga ang uhot, nga naglaom sa pagkakaplag ug makaluluoy nga biktima sa ilalom! Dayag na lang, walay nakaplagan.

Sa unsang paagi naugmad ang ventriloquism latas sa katuigan?

Gituohan nga daghang tuig kanhi ang ventriloquism gigamit sa paglansis sa matuotuohong mga tawo aron motuo nga nakigsulti sila sa mga patay. Sa ngadtongadto, ang ventriloquism nayagyag ingon nga tawhanon lamang nga kahanas. Human niadto kana nakabatog madungganong dapit sa natad sa kalingawan, ug karong adlawa kini gamiton pa usahay alang sa edukasyonal nga mga katuyoan.

Latas sa kasiglohan ang lainlaing mga kahimtang gigamit sa paglingaw sa mga mamiminaw ug pagpasundayag sa talagsaong mga katakos sa ventriloquist. Sa ika-20ng siglo, napopular nga ang mga ventriloquist makigkabildo sa usa ka monyekang kahoy.

Unsay nakadasig sa imong kaikag sa ventriloquism?

Nadani ako sa natagong katakos niini sa paglipay ug pagpakatawa sa mga tawo. Sa bata pa ako, usa ka lokal nga ahente ang nakapainteres nako sa arte nga nagpatin-aw nga ang pulong nga “ventriloquist” naggikan sa mga pulong nga Latin nga venter ug loqui, nga nagpasabot nga “pagsulti sa tiyan” o “pagsulti gikan sa tiyan.” Tungod kini kay gihunahuna kaniadto nga ang ventriloquism maoy sangpotanan sa linain nga paggamit sa tiyan. Unya iyang gipakita kanako ang pipila ka paninugdang mga paagi.

Pagkaugma ako kanang gisulayan sa tunghaan. Nga gigamit ang layong-tingog nga teknik, gihimo ko ang akong tingog nga daw naggikan sa mikropono, ug gitawag ko ang akong kaugalingon aron pagawason sa klase. Misaler kana! Sa ulahi, mas nakakat-on ako bahin sa ventriloquism pinaagi  sa usa ka kurso sa sulatanay ug unya nagtuon niana ingong propesyon.

Unsay nalangkit sa imong trabaho ingong ventriloquist?

isan pag ako magpasundayag usahay sa mga kombira ug sa mga konbensiyon sa ventriloquist ug sa pipila ka higayon nakapasundayag pa sa telebisyon, ang kadaghanan kong panahon gigugol sa pagtudlo sa mga bata sa mga panagkatigom sa mga bata ug magtutudlo sa tunghaan. Ang pangomedya maoy usa ka dako kaayong bahin sa pasundayag. Pananglitan, panahon sa usa ka programa bahin sa personal nga kahinlo, akong gipunting kang Maclovio, ang akong monyeka nga kahoy, nga kay wala siya magsepilyo sa iyang ngipon, makita ko nga itlog ang iyang gikaon sa pamahaw nianang buntaga. Si Maclovio mitubag, “Nasayop ka​—kagahapon pa!”

Sa unsang paagi ginahimo ang ventriloquism?

Kasagarang isulti nga ang ventriloquist magbulhot sa iyang tingog, apan kini handurawan lamang. Gamiton namo ang linaing posisyon sa dila aron ipatungha ang kapuling mga tingog alang sa mga letra nga nagkinahanglag paglihok sa ngabil, ug ang usa ka teknik sa pagginhawa nga gikan sa diaprama magpatungha sa sayop nga hunahuna bahin sa distansiya.

Mosaler ang ventriloquism tungod kay ang kadaghanang tawo wala magbansay sa ilang mga dalunggan sa pag-ila sa tinubdan ug distansiya sa tingog. Ilang gikinahanglan ang tabang sa ilang mga mata. Sa pag-ilustrar: Sa tingog sa sirina, ang imong dalunggan mosulti kanimo nga ang usa ka sakyanang pang-emerhensiya nagsingabot ug naggikan kini sa layo. Apan unsa ka layo ang sakyanan? Gikan sa unsang direksiyon kini nagsingabot? Sa pagtubag niining mga pangutanaha, lagmit kinahanglang tan-awon nimo ang nagkidlapkidlap nga mga suga sa sakyanan.

Ang ventriloquist magpahimulos niini pinaagi sa pagpatunghag tingog sa nahiangayng gikusgon ug sa pagpunting sa pagtagad sa mamiminaw ngadto sa tinubdan nga buot niya nga hunahunaon nilang gigikanan sa tingog.

Unsang mga sugyot ang imong ihatag ngadto sa usa ka tawong interesadong makakat-on sa arte sa ventriloquism?

Una, sayra ang imong katuyoan, ug magmaandam sa paglikay sa bisan unsang mosumpaki niana. Gihisgotan ko kini tungod kay sama sa daghang ubang matang sa kalingawan, ang ventriloquism usahay gamiton alang sa dili-maayong mga katuyoan. Sa personal, ako nadani sa ventriloquism tungod sa natagong katakos niini sa pagpatunghag gugma ug kalingawan. Gilimitehan ko ang akong trabaho sa panagkabildo lamang ug sa mga okasyong moalagad nianang katuyoana.

Aron mahanas sa ventriloquism, kinahanglan nimo ang tulo ka butang​—teknik, handurawan, ug pagbansay. Ang teknik makat-onan gikan sa basahon o video nga may mga instruksiyon kon unsaon kana paghimo. Sunod, gamita ang imong handurawan aron maugmad ang katuohang personalidad alang sa imong monyeka o tawotawo, ug tun-i kon unsaon paghimo kaniya nga samag buhi. Sa kataposan, pagbansay. Ang gidugayon sa imong pagbansay mohukom sa gidak-on sa kahanas nga imong mabatonan.