‘Gusto Ko nga Masayod ug Dugang Bahin sa Akong Relihiyon’

ALANG sa iyang proyekto sa eskuylahan may kalabotan sa kasaysayan, ang 12-anyos nga si Ciara, nga taga-Florida, T.B.A., mipili ug usa ka makaiikag nga ulohan​—ang paglutos sa mga Saksi ni Jehova sa Nazi nga Alemanya. “Kini ang akong gipili nga topiko tungod kay gusto ko nga masayod ug dugang bahin sa kasaysayan sa akong relihiyon,” matod niya. “Gusto ko nga masayod kon unsa gayoy naagoman sa mga Saksi ni Jehova panahon sa Holocaust.”

Human sa daghang pagpanukiduki, si Ciara nagpahimo ug purpurang trianggulo nga gama sa kahoy, nga hulad sa purpurang trianggulo nga gitahi diha sa uniporme sa mga Saksi ni Jehova aron mailhan sila diha sa mga kampo. Si Ciara nagpatapot ug mga hulagway nga may mga kapsiyon diha sa mga kilid sa trianggulo. Apil usab niini ang makahilap sa kasingkasing, apan makapalig-on sa pagtuo, nga sulat ni Wolfgang Kusserow, usa sa mga Saksi ni Jehova, sa hapit na siyang patyon.​—Tan-awa ang The Watchtower sa Septiyembre 1, 1985, panid 14.

Klarong gipatin-aw diha sa proyekto ni Ciara nga, dili sama sa ubang mga piniriso, ang mga Saksi dunay kapilian: Kon pirmahan nila ang usa ka dokumento nga nagsalikway sa ilang pagtuo, sila buhian. Ang pagdumili sa daghan kaayong Saksi ni Jehova sa pagpirma nagpamatuod sa ilang integridad.

Si Ciara miingon nga nakabenepisyo siya sa pagpili niini nga topiko ingong iyang proyekto. Nakatabang gayod kini kaniya sa pagkasayod ug dugang pa bahin sa iyang relihiyon. “Bisag gamay ra sila nga grupo sa Alemanya niadtong panahona,” siya miingon, “ang mga Saksi ni Jehova lig-on ug pagtuo, nga nakatabang kanila sa pagbuntog sa paglutos nga ilang naagoman.”

Kon ikaw usa ka batan-ong Saksi ni Jehova nga nag-eskuyla, aduna bay mga paagi aron ikaw usab makasulti bahin sa kasaysayan sa imong tinuohan?