Gikan sa Among mga Magbabasa

Pagtabang sa mga Batan-on nga Naproblema (Abril 8, 2005) Kini nga serye matulon-anon kaayo. Malisod usahay ang pagkahimong tin-edyer, apan ang makapadasig nga mga artikulo sama niini makatabang sa mga tin-edyer nga dili kaayo mapit-osan. Mao gayod kini ang matang sa impormasyon nga among gikinahanglan sa pagdasig kanamo niining “makuyaw nga mga panahong lisod sagubangon.” (2 Timoteo 3:1) Ang mga pahinumdom niini nga mga artikulo motabang kanamo nga dili malit-agan sa “mga malipatlipatong kaugdahan sa Yawa.” (Efeso 6:11) Salamat sa pagtaganag espirituwal nga pagkaon sa hustong panahon.

K. S., Tinipong Bansa

Usa ka Hinlong Balay—Kon Unsay Ikaamot Natong Tanan (Hunyo 8, 2005) Sa dihang ako nagtubo, ang akong mga ginikanan nanarbaho ug kaming tulo ka anak kanunayng magduladula sa balay. Ang among balay nagkalamukat. Bisan karon dili gyod ko ganahan manghinlo. Apan sa pagbasa nako niini nga artikulo, akong gibati nga morag ang akong inahan maluluy-ong nagtudlo kanako kon unsaon pagpanghinlo. Ako karon duna nay dagkong mga anak, ug sila dili ganahang manghinlo. Daghan pang butang ang angay nakong itudlo kanila. Ako nadasig niini nga artikulo.

Y. E., Japan

Pagsubli nga Magamit sa Pamilya (Mayo 8, 2005) Sa dihang akong nakita kini nga artikulo, ako nakahilak. Gipakita nako kini sa akong anak nga babaye. Dayon iya akong giingnan nga nabasa na niya ang artikulo bahin sa nagluya nga goryon ug iya nang natubag ang mga pangutana sa “Pagsubli nga Magamit sa Pamilya.”

L. S., Tinipong Bansa

Mga Librarya—Kasangkapan Aron Makabatog Kahibalo (Mayo 22, 2005) Palihog tugoti ako sa pagpatin-aw nga dili si Haring Ashurbanipal sa Asirya ang anaa sa hulagway sa panid 18. Siya mao si Haring Esar-haddon sa Asirya.

A. W., Alemanya

Ang “Pagmata!” nagtubag: Salamat sa imong pagsulti niini kanamo. Sumala sa gihisgotan sa Biblikanhong reperensiya nga “Insight on the Scriptures,” Tomo 1, panid 757, si Esar-haddon mao ang mas bata nga anak lalaki ug manununod ni Haring Senakerib sa Asirya. a

Ang Talagsaong Kalendaryo sa mga Maya (Abril 8, 2005) Tungod niini nga artikulo, ako nanukiduki diha sa Internet. Akong nakaplagan nga ang kalendaryo sa mga Maya nalangkit gayod sa astrolohiya. Para nako ang pagpatik ug mga artikulo nga sama niini mahimong magdasig sa mga magbabasa nga mainteresado sa astrolohiya ug salamangka.

J. K., Polandia

Ang “Pagmata!” nagtubag: Sumala sa giingon sa panid 4 sa “Pagmata!” kini nga magasin “motaho sa balita, mosugid bahin sa katawhan sa daghang kayutaan, mosusi sa relihiyon ug siyensiya.” Kini wala gayod magpasabot nga among ginaduso ang tanan nga nalangkit sa maong mga ulohan. Sa mubong artikulo nga imong gihisgotan, among gitaho ang bahin sa karaang mga Maya, kansang batid nga pagkalkulo sa panahon nakatabang sa paghimog tukma kaayo nga kalendaryo. Ang kamatuoran nga kini nga kalendaryo gigamit sa pagpanag-an—nga giila diha sa artikulo—wala gayod magdasig sa among mga magbabasa nga mainteresado sa pagtuon sa astrolohiya.

Kami sa popanahon makadawat ug susamang mga pangutana maylabot sa mga hulagway nga makita diha sa among mga publikasyon. Ang mga hulagway sa mga idolo, relihiyosong mga simbolo, o mga butang sa espiritismo gilakip diha sa among mga publikasyon dili aron sa pagpukaw sa kaikag kondili aron sa pagwagtang sa misteryo bahin niining mga butanga ug sa pagpasidaan sa among mga magbabasa nga sila dili gayod angay mogamit niini. Daghang komento nga among nadawat nagpakita nga ang among mga artikulo ug mga hulagway aduna gayoy maayong epekto.

[Footnote]