Ikaw Makakaplag ug Tinuod nga Kalipay!

DAGHANG tawo sa tibuok kalibotan nagtuo nga ang mga paagi sa pagkaplag ug kalipay mao ang pagbaton ug mahalong kotse, dakong deposito sa bangko, tinamod nga karera, dakong balay, ug ang kinabag-ohang elektronikong mga himan, lakip na ang makabibihag o maskulado nga lawas. Apan ang kalipay nag-agad ba gayod sa pagbaton niining materyal ug pisikal nga mga butang?

Adunay “daghan kaayong panukiduki bahin sa kalipay, pagkamalaomon, positibong tinamdan ug maayong mga hiyas,” nag-ingon ang usa ka espesyal nga report sa magasing Time. Ang resulta sa maong mga pagtuon nakapatingala sa daghang tawo. Ang tukma kaayong mga ebidensiya nagpakita nga ang mga tawo nga nagtuo nga ang salapi, kabantog, ug katahom makapalipay kanila naglimbong lamang sa ilang kaugalingon. Sa pagkatinuod, sila nagtukod sa ilang kinabuhi diha sa usa ka pundasyon nga lagmit makadaot sa ilang panghunahuna ug nga sila mahimong mag-antos pa gani ug depresyon.

Sa Tinipong Bansa, daghang tawo ang mas dato karon kay sa kaniadto. “Apan sa pagkatinuod, kini wala makapahimo kanatong mas malipayon,” nag-ingon ang Time. Aw, ingon usab niini ang ikasulti bahin sa mga tawo sa ubang mga nasod. Bisan pa sa kusog kaayong pag-uswag sa ekonomiya sa Tsina, nagkadaghan usab ang mga tawo nga dili malipayon. Ang paghikog didto nahimong “pangunang hinungdan sa kamatayon sa mga tawong nag-edad ug 15 ngadto sa 34 anyos,” nag-ingon ang Access Asia, nga gipatik matag tulo ka bulan. Mopatim-aw nga ang usa ka hinungdan niini mao ang kapit-os nga gibati sa mga batan-on kon unsaon nga sila molampos diha sa lisod nga sekular nga trabaho.

Dayag nga ang pag-asenso sa materyal dili makapakunhod sa kabalaka ug kapit-os; sa kasukwahi, kini makapasamot pa gani. “Ang ato mismong paagi sa pagkinabuhi nahimo nang pangunang hinungdan sa huyang nga emosyon ug hunahuna,” matod pa sa pagtuon sa usa ka unibersidad. Si Van Wishard, tig-analisar bahin sa hilig sa mga tawo, nag-ingon nga “nagkadako ang bayran nga insyurans sa mga kompaniya tungod sa mental ug emosyonal nga kahimsog sa ilang mga empleyado.”

Bisan ang mga bata naapektohan sa kusog kaayong kausaban sa atong kalibotan. Mabatonan na karon ang mga basahon alang sa otso anyos nga mga bata nga nagtambag kanila “kon unsaon pag-ila sa mga simtoma sa kapit-os ug kon unsaon kini pagsagubang,” matod pa ni Wishard. Ug sumala sa talaan sa mga impormasyon bahin sa depresyon, makapakurat ang pagdaghan sa mga bata diha sa daghang nasod sa Kasadpan nga nadayagnos nga may depresyon, 23 porsiyento kada tuig. Dugang pa, “nagkadaghan pag-ayo ang mga batang wala pa magtungha sa elementarya nga gitambalan ug pangontra sa depresyon.”

Misamot usab ang kahadlok—ug dili lamang tungod sa kalisod sa panginabuhi. Kay misamot man ang pagkapanatiko sa mga tawo bahin sa politika ug relihiyon, daghan ang makuyawan sa paghunahuna bahin sa makalilisang nga mga butang nga mahitabo sa umaabot. Aduna bay tabang nga mabatonan?

Mga duha ka libo ka tuig kanhi, si Jesu-Kristo nagtudlo ug usa ka lahi nga paagi sa pagkinabuhi nga makapalagsik ug makapakunhod sa kapit-os. Ang pangunang mensahe sa iyang pagtulon-an mao ang usa ka simple apan halawom nga kamatuoran. “Malipayon kadtong mahunahunaon sa ilang espirituwal nga panginahanglan,” siya miingon. (Mateo 5:3) Oo, gidasig ni Jesus ang iyang mga mamiminaw sa pagsentro sa ilang pagtagad sa labing hinungdanong panginahanglan sa tawo—ang pagkahibalo sa espirituwal nga kamatuoran bahin sa atong Maglalalang ug sa Iyang katuyoan alang kanato.

Sama sa atong mabasa sa mosunod nga mga artikulo, kanang kamatuorana makatabang kanato sa pagsabot kon unsa gayoy hinungdanon, nga motultol sa mas malipayon ug mas makahuloganon nga kinabuhi. Ang maong espirituwal nga kamatuoran naghatag usab kanato ug usa ka talagsaong paglaom.

[Blurb sa panid 3]

Ang kalipay ba nag-agad sa materyal nga mga kabtangan?