Idlas ang Kalamposan

Popular na siya nga mag-aawit ug sapian sa nag-edad pa lang siyag mga 20. Pipila lang ka tawo ang nainila ug nasapian bisag bata pa. Apan nagkadaot-daot ang iyang kinabuhi. Human sa duha ka pakyas nga kaminyoon, gipatambalan pa gayod siya diha sa sentro sa rehabilitasyon tungod sa iyang pagkaalkoholiko ug pagkaadik. Nagkadaot-daot gayod ang iyang kinabuhi.

ANG sugilanon sa kinabuhi niining babayhana komon na kaayo. Kita kanunayng makadungog ug mga balita bahin sa kinabuhi sa inilang mga tawo nga nangadaot. Bisan diha sa kalibotan sa negosyo, ang daw malamposong mga tawo kasagaran problemado ug kinabuhi. Mahitungod sa malamposon kaayong mga negosyante sa New York City, usa ka mantalaan nag-ingon: “Ang pagpaningkamot nga mokitag dako kaayo nakadaot sa mga karera, nakabungkag sa mga pamilya ug daghan ang nangaadik sa droga tungod niini . . . Ang dagko kaayong bonus nakapabati sa uban nga tag-as ug posisyon sa bangko sa Wall Street nga morag si kinsa, pero kini nakahatag ug presyur sa uban ug ang pipila naapektohan pag-ayo niini.”

Kini ba nga mga problema maoy tungod sa sayop nga hunahuna sa mga tawo bahin sa kalamposan ug sa kon unsay makahatag ug kalipay? Tinuod nga nagkinahanglan kita ug salapi aron mabuhi. Apan ikaingon ba nga kita malamposon kon daghan na kitag natigom nga bahandi? Dili, sumala sa gipadayag sa mga panukiduki. Pananglitan, usa ka panukiduki sa Tsina nagpakita nga bisag misaka nag 250 porsiyento ang aberids nga kita, ang mga tawo dili gihapon kontento.

Sa ato pa, ang tinuod nga kalamposan wala magdepende sa trabaho ug kantidad sa balay, awto, o relo. Kini nagdepende sa pagkatawo sa usa, sa iyang mga prinsipyo ug sa iyang katuyoan sa kinabuhi. Unsay kapuslanan sa pagkautokan ug pagkaimpluwensiyado sa usa ka tawo kon pananglitan, siya dili maayog moral, walay gugma, ug walay tinuod nga mga higala? Tingali ang usa inila ug adunahan, pero kon mamalandong siya sa iyang kinabuhi siya makapangutana, ‘Para sa unsa man kining tanan? Unsa may kahulogan sa akong kinabuhi?’

Ang mga tawo nga tinuod gayod nga malamposon naghatag ug pangunang pagtagad sa mas hinungdanong mga butang, sama sa maayong mga prinsipyo nga mogiya kanila. Busa, sila malinawon ug hunahuna, may pagtahod sa kaugalingon, ug ginatahod sa uban. Ang ilang katuyoan sa kinabuhi dili ang pagtagbaw sa kaugalingong interes kondili kanang makahatag kanilag kahulogan sa kinabuhi ug kalipay. Tingali ang uban mangutana: ‘Unsa nga mga prinsipyo? Ug unsa nga katuyoan?’ Asa kita makakaplag ug tubag niining mga pangutanaha, sa ato bang kaugalingon o sa laing tinubdan? Kini hisgotan sa sunod nga mga artikulo.

[Kahon sa panid 3]

SAYOP NGA IDEYA SA KALAMPOSAN

Sumala sa mga tigpanukiduki sa medisina, nagkadaghan ang batan-ong mga atleta nga nagamit ug mga droga nga makapahawod kanila sa ilang giapilang mga dula. Ang Education Update sa Internet nag-ingon: “Sa dihang ang mga estudyante sa kolehiyo gipangutana: ‘Kon nahibalo ka nga makadaog ka o maapil sa tem kon mogamit kag steroid apan sulod sa lima ka tuig masakit ka, mogamit ka ba niana?,’ halos tanan mitubag ug oo. Sa dihang giusab ang pangutana, ‘kon nahibalo ka nga mamatay ka sulod sa lima ka tuig,’ 65 porsiyento mitubag gihapon ug oo.”