Gikan sa Among mga Magbabasa

Mga Batan-on Nangutana . . . Unsay Akong Buhaton Kon Naghikog ang Akong Igsoon? (Hunyo 2008) Sa wala pa mamatay ang akong magulang nga babaye, lima ka tuig siyang nag-antos sa depresyon. Kay nakita man nako ang iyang kaguol tungod sa iyang balatian, naluoy kaayo ko niya! Apan ang artikulo sa Pagmata! nagsugyot nga maoy atong hinumdoman ang makapalipay nga mga panahon. Sa akong gibuhat kana, akong naamgohan nga dili diay makaluluoy ang iyang kahimtang kondili malipayon siya, kay mas daghan siyag makapalipayng mga yugto sa iyang kinabuhi kay sa makapaguol.

S. Y., Japan

Mga Batan-on Nangutana . . . Nganong Wala May Pagsalig ang Akong mga Ginikanan Kanako? (Abril 2008) Pinaagi sa pagbasa ug pagpadapat sa mga prinsipyo sa Bibliya nga gihisgotan diha sa Pagmata! akong nahibaloan nga ang pagkahimong kasaligan ug pagkahimong hamtong anam-anam maugmad nga samag nagsaka ug hagdanan, dili samag pultahan nga moderetso lang kag sulod. Aron mahatagan akog dugang kagawasan, kinahanglang ipakita nako sa akong mga ginikanan nga kasaligan ako. Kinahanglan nakong taposon ang akong mga trabaho sa balay ug ang akong mga homwork. Salamat sa pagpatik niini nga artikulo.

T. L., Amerika

Pagkinabuhing May Albinismo (Hulyo 2008) Kay albino man ako, sa primero nalipay ako sa pagkakita niini nga artikulo. Apan wala ko malipay nga balik-balik nga gigamit ang pulong “albino.” Kining pulonga gigamit isip pagtamay sa mga tawong sama nako.

A. L., Amerika

Ang “Pagmata!” nagtubag: Gikasubo namo kon nakapasakit kini sa among mga magbabasa. Ang among paggamit sa pulong “albino” maoy sumala sa pagtawag niini sa mga doktor. Apan moadmitir kami nga ang uban migamit niini agig pagtamay. Sa laing bahin, daghang albino dili masuko kon tawgon silang albino. Kami walay intensiyon sa pagdaot kang bisan kinsa.

Salamat sa pagpatik niining artikuloha, kay ako usa usab ka albino sama kang John. Akong gipabilhan ang pagkaprangka, pagkamahunahunaon, ug ang pagkamapuslanon sa mga impormasyon niini nga artikulo. Tungod niini, mas nakasabot na kanako ang akong mga higala.

T. M., Amerika

Gugma nga Mas Kusog Pa sa Bagyo! (Agosto 2008) Ang mga artikulong sama niini nagpahinumdom kanako sa dili pagkabalaka bahin sa umaabot kondili sa pagsalig gayod sa Diyos. Tulo ka tuig kanhi, akong nasinati ang inigsoong gugma dihang nabanlas ang balay sa akong mga ginikanan nga dili sama nakog tinuohan. Gitabangan dayon sila sa mga Saksi ni Jehova sa among dapit. Nagpasalamat ako kang Jehova nga ako nahimong bahin sa iyang organisasyon.

D. W., Poland

Ang Katingalahang Mais (Agosto 2008) Namugas kamig mais sa among garden, apan lainlaig gidak-on ang mga lugas sa mais nga among naani. Karon, tungod niini nga artikulo, nakasabot na kami kon ngano. Nakapugas lang kamig mga lima o unom ka binhi, busa wala kini mamalohi sama sa dakong kamaisan. Sa miaging tuig, pinaagig maampingong pagmalo sa matag lugas sa buhok-buhok sa mais, kami nakaanig tam-is, lamian nga mais nga parehog gidak-on ang mga lugas. Daghan kaayong salamat.

R. W., Japan