Malipayon Bisag Baldado

Sumala sa giasoy ni José Godofredo Várguez

Ako natawo ingong himsog nga bata. Pag-edad nakog 17, ako nagtrabaho ingong usa ka welder. Duha ka tuig sa ulahi, samtang nagwelding ko sa taas nga lugar duol sa mga kableng may dagkong boltahe, kalit lang miulan. Ako nakoryentehan ug milagpot kog 14 metros paubos ug nawad-ag panimuot. Nakoma ko sulod sa tulo ka bulan. Ako naparalisar ug ulo ra nako ang makalihok. Mora kog gitakloban sa langit!

SA PRIMERO, gibasol nako ang Diyos ug nakapangutana ko kon nganong gitugotan pa ko niyang mabuhi. Nakahunahuna pa gani kong maghikog. Midangop ko sa lainlaing relihiyon, apan walay nakahupay kanako ug nakatubag sa akong mga pangutana bahin sa Diyos. Gani, wala nila dasiga ang mga tawo nga magpadapat sa mga pagtulon-an ug mga sukdanan sa Bibliya! Pagkamatay sa akong inahan niadtong 1981, nahimo kong palahubog ug sugarol. Nagtuo ko nga tungod sa akong kahimtang, maluoy ang Diyos kanako ug pasayloon ko niya sa akong paghuboghubog. Imoral usab ang akong pagkinabuhi kay duna koy puyopuyo.

Dakong Kausaban sa Akong Tinamdan

Sa nag-edad kog 37, nahimamat nako ang mga Saksi ni Jehova sa unang higayon. Ang akong Mama, nga naimpluwensiyahan sa pagpangdaot batok sa mga Saksi, kanunayng moingon nga ang Saksi mao ang kinamaotang relihiyon. Bisan pa niana, giabiabi nako sila sa balay—sa tuyo lang nga pamatud-ang sayop sila, kay abi nakog daghan kog nahibaloan sa Bibliya. Apan nakurat ko nga gamay ra diay ang akong nahibaloan! Ang nakapahingangha pa nako kay gitubag nila ang tanan nakong pangutana gamit ang Bibliya. Wala madugay ako nakombinsir nga mao na kadto ang kamatuoran.

Ikasubo, kay ang akong puyopuyo supak sa akong bag-ong tinuohan, ug nagbulag mi. Akong gibag-o ang akong kinabuhi ug gipahiuyon ang akong tinamdan ug hunahuna sa mga pagtulon-an sa Bibliya. Sa tabang sa Diyos, nadawat nako ang akong kahimtang nga resulta sa akong pagkaaksidente —ug sa milabayng 20 ka tuig malipayon akong nag-alagad ingong bug-os-panahong magwawali. Daghan ang natingala nga bisan pag ako baldado, daghan kog mahimo. Tungod kana kay nag-uban mig puyo sa akong manghod nga lalaki nga si Ubaldo, kinsa may Down syndrome. Gidawat usab ni Ubaldo ang kamatuoran sa Bibliya, ug kami nag-alagad kang Jehova.

Nagtinabangay kami sa akong manghod. Sa dihang magsangyaw mi, si Ubaldo maoy tigtulod sa akong wheelchair ug tigtuktok sa pultahan, ug sa dihang makig-estorya ko sa tagbalay, siyay tigpakli sa Bibliya ug motanyag sa literatura. Tabangan sab ko niya sa uban nakong panginahanglan sa pisikal. Sa laing bahin, nanginabuhi sab ko para namong duha pinaagi sa pagpamaligyag kosmetiko. Gawas pa niana, ang mga Saksi ni Jehova sa among dapit motabang sa among mga buluhaton sa balay ug sa pagpadoktor—nga amo gayong gipasalamatan ni Ubaldo!

Ako nag-alagad ingong ansiyano diha sa Kristohanong kongregasyon, ug ang akong mga igsoon sa pagtuo andam kanunay sa pagtabang kanako sa pagpanukiduki bahin sa mga topiko sa Bibliya. Gamit ang lapis nga giipit sa akong baba, akong badlisan ang importanteng mga punto diha sa mga basahon.

Sa dihang may mangutana nako kon ako ba malipayon, kinasingkasing kong motubag ug oo! Nakaplagan nako ang tinuod nga kahulogan sa kinabuhi, ug nagpaabot ko sa gisaad sa Diyos ngadto sa iyang matinumanong mga magsisimba—ang hingpit nga panglawas diha sa Paraisong yuta.—Isaias 35:5, 6; Lucas 23:43.

[Hulagway sa panid 24]

Si José sa edad nga 18, usa ka tuig sa wala pa siya maaksidente

[Hulagway sa panid 25]

Nagtinabangay kami sa akong igsoong si Ubaldo sa among pagsangyaw sa Mexico

[Hulagway sa panid 25]

Ang akong isigka-Saksi nga tigpakli sa akong Bibliya samtang nagpakigpulong ko sa Kingdom Hall

[Hulagway sa panid 25]

Tabangan mi sa mga Saksi sa among dapit sa mga buluhaton sa balay