Praktikal ang Pagkamatinud-anon

“Ang tinapay nga nabatonan pinaagi sa kabakakan makapahimuot sa usa ka tawo, apan human niana ang iyang baba mapuno sa graba.”—Proverbio 20:17.

KINAHANGLAN bang manglimbong aron molampos sa negosyo? Ang tubag, dili. Sa pagkatinuod, ang pagpanglimbong makahatag lag problema. Ngano? Tungod kay ang pagkamatinud-anon moresultag pagsalig nga hinungdanon sa dumalayong kalamposan.

Hinungdanon ang Pagsalig

Ang imong pagkamatinud-anon makaapektar sa imong kalamposan—nahibalo ka man niana o wala. Gipakita kini sa kasinatian ni Franz, nga gihisgotan sa nag-unang artikulo. “Sa pagsugod nakog trabaho,” siya miingon, “sa makadaghan gisulayan sa akong mga amo ang akong pagkamatinud-anon ug integridad nga wala ako mahibalo. Akong nahibaloan sa ulahi nga ako ilang napamatud-ang matinud-anon. Busa ila akong gihatagag daghang responsibilidad ug kagawasan ug gigantihan ang akong pagkamatinud-anon. Nahibalo ko nga duna pay mas makamao sa akong trabaho ug mas utokan kay kanako. Apan sa akong hunahuna nakapabilin ko sa akong trabaho kay sila may pagsalig nako.”

Likayi ang Kuwestiyonableng Transaksiyon

Si David, usa ka negosyante nga gihisgotan sa nag-unang artikulo, miingon: “Sa magtan-aw ko sa mga tawo nga mangitag paagi nga makalusot sa balaod aron lang makabentaha, moingon ko sa akong kaugalingon, ‘Sa madugay o sa madali, maapsan ka sa epekto sa imong binuhatan.’ Sa ato pa, maani ra unya ang mga epekto sa pagpanglimbong. Among gibalibaran ang daghang kuwestiyonableng transaksiyon sa negosyo. Daghang kompaniya nga naghimo niini nangahapay sa ulahi, ug ang uban gikiha. Ang among kompaniya wala maapil.”

Samtang nagtukod ug ranso sa baka didto sa habagatang sidlakan sa Africa, puwede untang hiphipan ni Ken ang mga opisyales aron makuha dayon niya ang giimportar nga mga gamit ug dili makabayad ug buhis. Siya miingon: “Daghang tag-iyag ranso nanghiphip. Kay wala man kami mohatag ug hiphip, miabot ug napulo ka tuig ayha pa namo nakuha ang mga panginahanglan sa among ranso. Duna bay kaayohan ang among pagkamatinud-anon? Oo! Kay kadtong nanghiphip gipangayoan kanunay sa korap nga mga opisyal.”

Pagsagubang sa mga Problema sa Ekonomiya

Sa dihang nameligrong mahapay ang usa ka negosyo, ang pamit-os sa pagpanglimbong grabe kaayo. Apan niini nga kahimtang makita nga bililhon ang pagkabaton ug maayong dungog sa pagkamatinud-anon.

Tagda si Bill, kansang negosyo sa konstruksiyon nahapay sa dihang mihinay ang negosyo sa pagpanukod ug balay didto sa United States. Siya miingon: “Daghan sa among dagkong kliyente nangahapay ug nakautang kanamo ug gatosan ka libong dolyar. Sa dihang ang akong kompaniya wala nay paglaom nga makabangon, gihangyo nako ang among kakompetensiya kon mahimo ba nila kaming patrabahoon. Sulod sa 48 ka oras nga miting, ako ug ang kadaghanan sa akong mga empleyado gihatagag trabaho. Ako gisultihan nga gidungog ko nga maayong motrabaho ug matinud-anon.”

 Ang tanang gihisgotan dinhi maoy mga kasinatian sa mga Saksi ni Jehova. Ang ilang mga prinsipyo maylabot sa negosyo, sama sa ubang bahin sa ilang kinabuhi, binase sa Bibliya. Busa imbes babag sa kalamposan sa negosyo, ang ilang pagkamatinud-anon nakahatag kanilag praktikal nga mga benepisyo.

Tinuod, duna gayoy mga situwasyon nga morag dunay bentaha ang pagpanglimbong. Apan pinansiyal nga bentaha lang ba ang sukdanan sa kalamposan?

[Blurb sa panid 6]

Ang imong pagkamatinud-anon makaapektar sa imong kalamposan—nahibalo ka man niana o wala

[Hulagway sa panid 7]

“Ako gisultihan nga gidungog ko nga maayong motrabaho ug matinud-anon.”—Bill, United States