Kon ang imong dos anyos nga bata masuko, siya magsinggit-singgit, magbundak-bundak, ug magkisi-kisi. Makahunahuna ka: ‘Normal kaha ning akong anak? Ako ra pod bay hinungdan sa iyang pagmanya? Mawala kaha kining iyang pagmanya?’

May mahimo ka sa pag-usab sa batasan sa imong dos anyos. Apan tagda una kon unsay hinungdan niini.

Ang bata dili makamaong mokontrolar sa iyang emosyon. Busa siya magmanya usahay. Apan dili lang kana ang hinungdan.

Hunahunaa ang kausaban nga mahitabo dihang mag-dos anyos na ang bata. Sukad sa adlaw nga siya natawo, ihatag sa ginikanan ang tanan niyang panginahanglan. Pananglitan, kon siya mohilak, ang ginikanan magkara-kara sa pag-atiman kaniya. ‘Nagsakit kaha ang bata? Gigutom? Gustog atensiyon? Ilisanag diaper?’ Himoon sa ginikanan ang tanan aron ang bata hayahayg pamati. Ug angay lang kay wala siyay mahimo kon dili siya atimanon.

Apan sa mag-dos anyos na ang bata, siya makamatikod nga dili na kaayo magkara-kara ang iyang ginikanan sa pag-atiman kaniya. Imbes silay mosunod sa iyang gusto, siya nay mosunod sa ilang gusto. Busa ang bata moprotesta—tingali ipaagi niyag manya.

Apan madawat ra unya sa bata nga ang iyang ginikanan maoy iyang mga tigtudlo, dili lang kay tig-atiman. Lagmit madawat pod niya nga siya kinahanglang “magmasinugtanon sa [iyang] mga ginikanan.” (Colosas 3:20) Pero sa pagkakaron, mahimong sulayan sa bata ang pasensiya sa ginikanan pinaagi sa pagsigeg manya.

Magmasinabtanon. Ang imong anak wala pay buot. Kay dili pa man siya makamaong mokontrolar sa iyang emosyon, tingali sobra siyang moreaksiyon kon masuko. Sabta ang iyang situwasyon.—Prinsipyo sa Bibliya: 1 Corinto 13:11.

Magmakalma. Kon magmanya ang imong anak, dili maayong masuko ka. Kutob sa mahimo, ayaw tagda ang iyang pagmanya ug ayaw pagreaksiyon. Ang paghinumdom kon nganong magmanya ang bata makatabang kanimo sa pagpabiling kalma.—Prinsipyo sa Bibliya: Proverbio 19:11.

Ayaw padala. Kon magpadala ka sa imong anak, tingalig magmanya na sab siya kon duna na pod siyay laing gusto. Kalmadong ipakita sa imong anak nga barogan gyod nimo ang imong gisulti.—Prinsipyo sa Bibliya: Mateo 5:37.

Magmapailobon. Ayaw pagdahom nga ang pagmanya sa bata mawala dihadiha, ilabina kon makita niya nga iya kang madala. Apan kon dili ka magpadala ug mobarog gyod ka, mahimong dili na siya kanunayng magmanya. Sa kadugayan kini mawala ra. Ang Bibliya nag-ingon: “Ang gugma hataas-ug-pailob.”—1 Corinto 13:4.

Mahimong sulayan usab nimo kini:

• Kon ang bata magmanya, haloga siya (kon posible) ug pugngi siya sa pagkisi-kisi nga dili siya masakitan. Ayaw siyag singgiti. Pasagdi lang siya hangtod mokalma. Ang bata makaamgo nga walay epekto ang iyang pagmanya.

• Paggahin ug lugar diha sa balay nga kabutangan nimo sa imong anak kon siya magmanya. Sultihi siya nga makahawa siya didto kon siya kalmado na, ug biyai siya didto.

• Kon magmanya ang bata diha sa daghang tawo, dad-a siya sa dapit nga walay tawo. Ayaw padala tungod lang kay nag-eskandalo siya. Kay kon magpadala ka, siya magtuo nga matuman ang iyang gusto kon siya magmanya.