Ang diborsiyo sa Beijing misaka ug 41 porsiyento sa unang siyam ka bulan sa 2013 kon itandi sa mao gihapong mga bulan sa 2012. Ang mga eksperto nagtuo nga kini midaghan kay ang mga magtiayon naglikay pagbayad sa bag-ong giimplementar nga 20 porsiyentong buhis gikan sa halin sa balay. Dunay mga kahimtang nga ang nagdiborsiyo nga mga magtiayon nga nagbaligyag ikaduhang balay dili pabayron ug buhis.

Buot sa United Nations nga modaghan ang tawo nga mokaon ug insekto aron masaparan ang kakulang nilag sustansiya. Sanglit daghag sustansiya ug episyente kaayo sa pagkombertir sa ginakaon niini nga mahimong pagkaon sa tawo, ang makaon nga mga insekto maoy “maayong kapuli sa karne ug maayong ilawog sa mga mananap,” matod pa sa report. Apan ang report miadmitir nga “dunay mga tawo nga lud-on sa pagkaon [ug insekto].”

Ang mga fertility clinic dakog problema sa legal ug moral maylabot sa kon unsay himoon sa gi-freeze nga pertilisadong mga binhi sa tawo kay dili na masubay kon hain na ang “mga tag-iya” niini. Sa usa lang ka klinika, dunay 1,000 ka binhi gikan sa mga tawo nga nagpa-in vitro fertilization nga “dili na igkita.”

Ang mga Katoliko sa Ireland dunay duha ka kapilian nga seremonyas sa kasal, simbahan o sibil hangtod sa 2013, apan nadugangan kinig laing kapilian dihang ang usa ka humanist nga grupo naghimog sekular nga mga kasal. Sumala sa balita sa Reuters, “midaghan kadtong gusto ug labaw pa kay sa sibil nga kasal nga himoon diha sa registry office apan dili usab gustog kasal sa simbahan nga tungod niini dili na sila maato” sa mga nagtanyag ug bag-ong kapilian.