ANG Belize gamay ra nga yuta pero nagkalidadis ang makita dinhi—gikan sa tropikal nga kalasangan ngadto sa asul-asul nga katubigan nga naglibot sa daghang isla. Ug pipila lang kana sa nindot nga mga talan-awon sa Belize.

Daghang langgam ug mananap dinhi. Lakip niini ang hayag ug kolor nga keel-billed toucan nga langgam ug ang Baird’s tapir—kamatang sa rhino nga abtik molihok sa mamala ug sa ilalom sa tubig! Dunay jaguar usab dinhi. Gani, ang Belize nagpasigarbo nga maoy nakauna sa pagreserbag luna ingong dangpanan sa mga jaguar.

Ang Belize kaniadto maoy bahin sa sibilisasyon sa mga Maya. Sa ika-16 nga siglo, ang Katsila nga mga konkistadores miatake, apan wala gayod nila mapildi ang Maya. Sa ulahi, giilog sa mga taga-Britain kining dapita ug pagka-1862 kini opisyal nga gideklarar nga kolonya sa British Honduras. Pagka-1981, ang Belize nahimong independenteng nasod.

 Ang mga taga-Belize lainlain ug kagikan ug ang talan-awon dinhi lainlain usab. Ang pipila sa pangunang mga tribo dinhi mao ang Creole, East Indian, Garifuna, Maya, ug Mestizo. Ang mga tawo mahigalaon ug matinahoron. Kon ang mga bata makig-estorya sa mga hamtong, sila sagad mangatahoran pinaagi sa pag-ingon ug “Miss” o “Mister” ug motubag pinaagi sa pag-ingon ug, “Oo, mam” o “Dili, sir.”

Sa Belize, dunay mga kongregasyon sa mga Saksi ni Jehova sa pinulongang American Sign Language, Belize Kriol, Iningles, Kinatsila, Low German, Mandarin Chinese, ug Maya (Mopán). Sa 2013, mga 1 sa matag 40 ka tawo sa Belize mitambong sa Memoryal sa kamatayon ni Kristo.