ANG Hawaiian bobtail squid, nga aktibo sa gabii, magpagawas ug kaugalingong kahayag—dili para makita, kondili aron makatago ug dili mamatikdan dihang mahayagan sa bulan ug mga bituon. Ang sekreto sa nukos anaa sa pakigtinabangay niini sa mga bakterya nga moamag o mopagawas ug kahayag. Duna tay makat-onan niana nga pagtinabangay pero sa laing paagi. Lagmit makatabang kini sa atong panglawas.

Hunahunaa: Ang Hawaiian bobtail squid nagpuyo sa tin-awng kabaybayonan sa Hawaiian Islands. Kasagaran, mamatikdan sa manunukob ang porma sa nukos tungod sa kahayag sa bulan ug mga bituon. Pero ang sulod sa lawas sa bobtail squid mopagawas ug kahayag nga sama sa kahayag sa palibot niini. Ang resulta? Kini dili mamatikdan kay kini walay landong o anino. Ang “high-tech” nga kasangkapan sa nukos mao ang bulsabulsa sulod sa lawas niini nga gipuy-an sa moamag nga mga bakterya nga mopagawas ug igong kahayag nga magtago sa nukos.

Lagmit makatabang usab ang mga bakterya sa pagkontrolar sa siklo sa pagkatulog ug pagmata sa nukos. Interesado niini ang mga tigdukiduki kay posible nga dili lang sa bobtail squid makita ang maong koneksiyon tali sa mga bakterya ug sa siklo sa pagkatulog ug pagmata, o adlaw-adlawng kalihokan. Pananglitan, sa mammal (sus-an nga mananap), ang mga bakterya nga makatabang sa paghilis sa pagkaon lagmit dunay koneksiyon usab sa siklo sa pagkatulog ug pagmata. Kon kini nga siklo madaot, mahimong hinungdan kini sa depresyon, diabetes, sobrang katambok, ug mga abnormalidad sa pagkatulog. Busa, ang pagtuon sa pagtinabangay sa nukos ug sa mga bakterya nga nagpuyo niini lagmit makatabang aron masabtan ang panglawas sa tawo.

Unsay imong hunahuna? Ang suga ba sa Hawaiian bobtail squid mitungha pinaagig ebolusyon? O kini ba gidisenyo?