“Angayng higugmaon sa mga bana ang ilang mga asawa sama sa ilang kaugalingong lawas. Siya nga nahigugma sa iyang asawa nahigugma sa iyang kaugalingon, kay wala gyoy tawo nga nagdumot sa iyang lawas, apan nagpakaon ug nagpangga niini.”—EFESO 5:28, 29.

Ang bana mao ang ulo sa pamilya. (Efeso 5:23) Ang maayong bana dili pintas o dominante. Iyang mahalon ang iyang asawa ug ihatag ang materyal ug emosyonal nga panginahanglan niini. Maningkamot sab siya nga mapalipay ang iyang asawa ug dili ipamugos ang iyang gusto. (Filipos 2:4) Iyang isulti ang iyang hunahuna o pagbati ug maminaw sab siya dihang mosulti ang iyang asawa. Dili siya ‘masuko pag-ayo’ kaniya o dagmalan siya o sultihag sakit nga mga pulong.—Colosas 3:19.

“Ang asawa angay nga dunay dakong pagtahod sa iyang bana.”—EFESO 5:33.

Dihang tahoron sa asawa ang iyang bana ug suportahan ang iyang mga desisyon, makatabang siya nga mas magmalinawon ang ilang pamilya. Kon masayop ang iyang bana, dili niya kini insultohon, kondili magpabilin siyang kalmado ug matinahoron. (1 Pedro 3:4) Kon kinahanglan siyang makig-estorya sa iyang bana bahin sa usa ka problema, mangita siyag maayong higayon nga himoon kini ug matinahorong makig-estorya kaniya.—Ecclesiastes 3:7.

“Ang lalaki . . . moipon [o magpabilin] sa iyang asawa, ug sila mahimong usa ka unod.”—GENESIS 2:24, footnote.

Dihang magminyo ang lalaki ug babaye, sila usa na ka suod nga pamilya. Busa ang magtiayon angayng maningkamot pag-ayo nga magpabiling lig-on ang ilang kaminyoon pinaagi sa kinasingkasing nga panag-estoryahay ug simpleng mga buhat nga may pagmahal. Angay sab silang magmaunongon sa usag usa pinaagi sa dili pagpakigsekso sa dili nila kapikas. Ang pagkadili-maunongon magpahinabog grabeng kasakit. Kini makawala sa pagsalig ug makabungkag sa pamilya.—Hebreohanon 13:4.

“Bansaya ang bata sa dalan nga angay niyang subayon; bisag matigulang na siya dili siya motipas gikan niini.”—PROVERBIO 22:6.

Gihatagan sa Diyos ang mga ginikanan ug responsibilidad sa pagbansay sa ilang mga anak. Apil niini ang pagpakitag maayong ehemplo kanila, ug tudloan silag maayong pamatasan. (Deuteronomio 6:6, 7) Dihang magpabadlong ang bata, ang maalamong ginikanan dili dayon masuko. Sila “abtik sa pagpaminaw, hinay sa pagsulti, dili daling masuko.” (Santiago 1:19) Kon nakita sa ginikanan nga kinahanglan niyang disiplinahon ang iyang anak, himoon niya kini sa mahigugmaong paagi, dili sa kasuko.

“Mga anak, magmasinugtanon mo sa inyong ginikanan . . . ‘Pasidunggi ang imong amahan ug ang imong inahan.’”—EFESO 6:1, 2.

Angayng sundon sa mga anak ang ilang ginikanan ug tahoron sila pag-ayo. Dihang pasidunggan sa mga anak ang ilang ginikanan, sila makahatag ug dakong kalipay sa panimalay ug makaamot sa kalinaw ug panaghiusa sa pamilya. Ang dagko na nga mga anak makapasidungog sa ilang ginikanan pinaagi sa pagseguro nga maatiman pag-ayo ang panginahanglan sa ilang ginikanan. Apil niana ang pagmentinar sa ilang puy-anan o paghatag ug pinansiyal nga tabang.—1 Timoteo 5:3, 4.