ANG musika maoy importante kaayo nga bahin sa kultura sa karaang Israel. Ang Bibliya kadaghan naghisgot bahin sa mga tawo nga nagtugtog ug mga instrumento ug nanganta. Gani, mga 10 porsiyento sa Bibliya maoy mga awit—pananglitan, ang basahon sa Salmo, Awit ni Solomon, ug Lamentaciones. Sumala sa librong Music in Biblical Life, ang Bibliya klarong nagpakita nga ang musika dako gyong bahin sa kinabuhi ug kalihokan sa mga Israelinhon.

Musika diha sa adlaw-adlawng kinabuhi. Ang mga Israelinhon magtugtog ug instrumento ug manganta aron ipahayag ang ilang gibati. (Isa. 30:29) Pananglitan, panahon sa pagdihog ug hari, mga pista, ug kadaogan sa gubat, ang mga babaye magtugtog ug mga tamborin, ug malipayong manganta ug manayaw. (Maghu. 11:34; 1 Sam. 18:​6, 7; 1 Hari 1:​39, 40) Ang mga Israelinhon manganta pod ug mga awit sa pagbangotan aron ipahayag ang ilang grabeng kaguol dihang naay mamatay. (2 Cron. 35:25) Walay duhaduha, “ang mga Israelinhon ganahan gyod kaayog musika,” miingon ang McClintock and Strong’s Cyclopedia.

Musika diha sa palasyo. Ang mga hari sa Israel ganahan pod ug musika. Pananglitan, si Haring Saul nagpatawag kang David sa iyang palasyo aron mag-alagad ingong musikero. (1 Sam. 16:​18, 23) Sa ulahi dihang si David nahimong hari, nag-imbento siyag mga instrumento, nagkomposo ug nindot nga mga awit, ug nag-organisar ug orkestra nga gitugtog diha sa templo ni Jehova. (2 Cron. 7:6; Amos 6:5) Ug si Haring Solomon naay mga mag-aawit nga lalaki ug babaye diha sa iyang palasyo.—Eccl. 2:8.

Musika diha sa pagsimba. Labaw sa tanan, ang musika maoy importanteng bahin sa pagsimba kang Jehova sa karaang Israel. Gani, naay 4,000 ka musikero nga nagtugtog diha sa templo sa Jerusalem. (1 Cron. 23:5) Nagtugtog silag mga simbal, dekuwerdas nga mga instrumento, alpa, ug mga trompeta. (2 Cron. 5:12) Pero dili lang kining hanas nga mga musikero ang nagsimba kang Jehova pinaagig musika. Daghang Israelinhon ang nangantag mga Awit sa Pagtungas dihang mobiyahe sila para sa ilang tinuig nga mga pista sa Jerusalem. (Sal. 120–134) Ug sumala sa Hudiyong mga sinulat, ang mga Israelinhon nangantag Hallel nga mga Salmo a panahon sa panihapon sa Paskuwa.

Ang musika importante gihapon sa mga alagad sa Diyos karon. (Sant. 5:13) Mokanta ta ingong bahin sa atong pagsimba. (Efe. 5:19) Ang musika nakapahiusa nato sa atong mga igsoon. (Col. 3:16) Ug makapalig-on ni nato panahon sa mga kalisdanan. (Buh. 16:25) Ang musika maoy nindot kaayo nga paagi aron mapakita nato ang atong pagtuo ug gugma kang Jehova.