“Magmainiton sa Espiritu”

“Ayaw paglangaylangay sa inyong buluhaton. Magmainiton sa espiritu. Magpaulipon kang Jehova.”—ROMA 12:11.

1. Nganong ang mga Israelinhon naghalad ug mga mananap ug uban pa?

 PABILHAN ni Jehova ang kinabubut-ong paghalad sa iyang mga alagad nga nagpakita sa ilang gugma ug pagpasakop sa iyang kabubut-on. Sa karaang panahon, iyang gidawat ang nagkalainlaing halad nga mananap ug uban pa. Gibuhat kini sa mga Israelinhon sumala sa Balaod ni Moises aron maangkon ang kapasayloan sa ilang mga sala ug sa pagpahayag sa ilang pasalamat. Sa Kristohanong kongregasyon, si Jehova wala magbaod kanato nga himoon ang maong pormal, materyal nga mga halad. Apan, diha sa kapitulo 12 sa iyang sulat ngadto sa mga Kristohanon sa Roma, gipakita ni apostol Pablo nga kita kinahanglan gihapong maghalad. Atong susihon kon sa unsang paagi.

Buhi nga Halad

2. Ingong mga Kristohanon, sa unsang paagi kita angayng magkinabuhi, ug unsay nalangkit niini?

² Basaha ang Roma 12:1, 2. Sa unang bahin sa iyang sulat, tin-awng gipadayag ni Pablo nga ang dinihogang mga Kristohanon, Hudiyo man o Hentil, gipahayag nga matarong atubangan sa Diyos pinaagi sa pagtuo, dili sa binuhatan. (Roma 1:16; 3:20-24) Sa kapitulo 12, gipatin-aw ni Pablo nga angayng ipakita sa mga Kristohanon ang ilang pagkamapasalamaton pinaagi sa pagsakripisyo. Aron mahimo kana, kinahanglang bag-ohon nato ang atong panghunahuna. Tungod sa napanunod nga pagkadili-hingpit, kita nailalom sa “balaod sa sala ug sa kamatayon.” (Roma 8:2) Busa, kita kinahanglang mag-usab, ‘magbag-o diha sa puwersa nga nagpalihok sa atong kaisipan.’ (Efe. 4:23) Ang maong bug-os nga kausaban mahimo lamang uban sa tabang sa Diyos ug sa iyang espiritu. Kini nagkinahanglan usab ug tim-os nga pagpaningkamot sa atong bahin, nga naggamit sa atong “gahom sa pagpangatarongan.” Nagpasabot kini nga maningkamot kita pag-ayo nga dili ‘maumol sumala niining sistemaha sa mga butang’ uban sa daotang panggawi, malaw-ayng kalingawan, ug hiwi nga panghunahuna niini.—Efe. 2:1-3.

3. Nganong kita nakigbahin sa Kristohanong mga buluhaton?

³ Si Pablo nag-awhag usab kanato sa paggamit sa atong “gahom sa pagpangatarongan” aron ikapamatuod sa atong kaugalingon “ang maayo ug dalawaton ug hingpit nga kabubut-on sa Diyos.” Nganong magbasa man kitag Bibliya sa adlaw-adlaw, mamalandong sa atong nabasa, mag-ampo, motambong sa mga tigom, ug mosangyaw sa maayong balita sa Gingharian? Tungod ba kay kita gidasig sa mga ansiyano sa pagbuhat niana? Tinuod, mapasalamaton kita sa mga pahinumdom nga ilang gihatag kanato. Apan kita nakigbahin sa Kristohanong mga buluhaton tungod kay kita gipalihok sa espiritu ni Jehova sa pagpasundayag sa atong tiunay nga gugma kaniya. Dugang pa, kita kombinsido nga ang pagbuhat niana maoy kabubut-on sa Diyos alang kanato. (Zac. 4:6; Efe. 5:10) Maghatag kanatog dakong kalipay ug katagbawan ang pagkaamgo nga pinaagi sa pagkinabuhi ingong matuod nga Kristohanon, kita mahimong dalawaton sa Diyos.

Lainlaing Matang sa Gasa

4, 5. Sa unsang paagi angayng gamiton sa mga ansiyano ang ilang mga gasa?

⁴ Basaha ang Roma 12:6-8, 11. Si Pablo nagpatin-aw nga “kita may mga gasa nga magkalahi sumala sa dili-takos nga kalulot nga gihatag kanato.” Ang pipila sa mga gasa nga gihisgotan ni Pablo—pagtambag, pagpanguna—ilabinang mapadapat sa mga ansiyano, kinsa giawhag sa pagpanguna “sa bug-os nga pagkamatinuoron.”

⁵ Nag-ingon si Pablo nga ang maong pagkamatinuoron angayng madayag diha sa paagi nga ang  mga magtatan-aw mag-alagad ingong mga magtutudlo ug magtuman sa “usa ka ministeryo.” Ang konteksto morag nagpaila nga si Pablo nagtumong sa “usa ka ministeryo” nga ginatuman sulod sa kongregasyon, o sa “usa ka lawas.” (Roma 12:4, 5) Ang maong ministeryo susama sa gihisgotan diha sa Buhat 6:4, diin ang mga apostoles nagpahayag: “Among ideboto ang among kaugalingon sa pag-ampo ug sa pagministeryo sa pulong.” Unsay nalangkit sa maong ministeryo? Ang mga ansiyano naggamit sa ilang mga gasa aron sa pagdasig sa mga membro sa kongregasyon. Gipakita sa mga ansiyano nga ‘gituman nila kini nga ministeryo’ sa dihang sila tiunay nga nagtaganag giya ug instruksiyon ngadto sa kongregasyon gikan sa Pulong sa Diyos pinaagi sa ilang mainampoong pagtuon, panukiduki, pagpanudlo, ug pagduaw sa mga igsoon. Angay nga makugihong gamiton sa mga ansiyano ang ilang mga gasa ug mag-atiman sa panon “uban ang pagmaya.”—Roma 12:7, 8; 1 Ped. 5:1-3.

6. Sa unsang paagi atong matuman ang tambag sa Roma 12:11, nga maoy temang teksto niining artikuloha?

⁶ Si Pablo midugang: “Ayaw paglangaylangay sa inyong buluhaton. Magmainiton sa espiritu. Magpaulipon kang Jehova.” Kon atong mamatikdan nga dili na kaayo kita masiboton sa atong ministeryo, lagmit kinahanglan natong bag-ohon ang atong batasan sa pagtuon ug mas hugot ug mas makanunayong mag-ampo alang sa espiritu ni Jehova. Kini makatabang kanato nga dili mahimong dagaang ug mapasig-uli ang atong kasibot. (Luc. 11:9, 13; Pin. 2:4; 3:14, 15, 19) Ang balaang espiritu nagdasig sa unang mga Kristohanon sa pagsulti bahin sa “halangdong mga butang sa Diyos.” (Buh. 2:4, 11) Sa susama, kini makapalihok kanato nga mahimong masiboton sa ministeryo, nga “magmainiton sa espiritu.”

Pagkamapainubsanon ug Pagkamakasaranganon

7. Nganong angay kitang moalagad uban ang pagkamapainubsanon ug pagkamakasaranganon?

⁷ Basaha ang Roma 12:3, 16. Ang mga gasa nga ato tingaling nabatonan maoy gumikan sa “dili-takos nga kalulot” ni Jehova. Si Pablo miingon usab: “Ang among pagkabaton ug igong katakos nagagikan sa Diyos.” (2 Cor. 3:5) Busa, dili nato angayng dayegon ang atong kaugalingon. Kinahanglang mapainubsanon natong ilhon nga bisan unsay atong nalampos diha sa ministeryo maoy tungod sa panalangin sa Diyos, dili sa atong kaugalingong katakos. (1 Cor. 3:6, 7) Nahiuyon niini, si Pablo miingon: “Ako magasulti sa tanan dinha sa inyong taliwala nga dili maghunahuna ug labaw bahin sa iyang kaugalingon kay sa angay nga hunahunaon.” Kinahanglan nga kita adunay pagtahod-sa-kaugalingon ug makabatog kalipay ug katagbawan sa atong pag-alagad kang Jehova. Apan, ang pagkamakasaranganon, o pagkahibalo sa atong mga limitasyon, mopugong kanato sa pagkahimong dogmatiko. Hinunoa, gusto natong “maghunahuna sa paagi nga makabaton sa maayong panghunahuna.”

8. Sa unsang paagi atong malikayan nga mahimong ‘maalamon sa atong kaugalingong mga mata’?

 ⁸ Kabuangan alang kanato ang pagpasigarbo sa atong mga kalamposan. Ang ‘Diyos maoy nagpatubo niini.’ (1 Cor. 3:7) Si Pablo nag-ingon nga gihatagan sa Diyos ang matag membro sa kongregasyon ug usa ka “sukod sa pagtuo.” Imbes mobati nga labaw sa uban, angay natong ilhon ang kalamposan sa uban sumala sa sukod sa pagtuo nga ilang nabatonan. Si Pablo dugang miingon: “Hunahunaa ang uban sama sa inyong kaugalingon.” Sa lain niyang sulat, ang apostol nag-awhag kanato nga “dili magabuhat ug bisan unsa tungod sa pagkamatigion o tungod sa pagpaimportante sa kaugalingon, kondili uban sa pagpaubos sa hunahuna nga magaisip nga ang uban labaw kay kaninyo.” (Filip. 2:3) Nagkinahanglan ug tinuod nga pagkamapainubsanon ug pagpaningkamot ang paghunahuna nga ang atong mga igsoon sa pagtuo labaw kay kanato. Ang pagkamapainubsanon magpugong kanato sa pagkahimong ‘maalamon sa atong kaugalingong mga mata.’ Bisan tuod ang pipila mahimong inila tungod sa ilang linaing mga responsibilidad sa kongregasyon, ang tanan makakaplag ug dakong kalipay sa pagbuhat sa “ubos nga mga butang,” ubos nga mga trabaho nga sagad dili mamatikdan sa mga tawo.—1 Ped. 5:5.

Panaghiusa Diha sa Kongregasyon

9. Nganong gitandi ni Pablo ang inanak-sa-espiritu nga mga Kristohanon sa mga sangkap sa lawas?

⁹ Basaha ang Roma 12:4, 5, 9, 10. Gitandi ni Pablo ang dinihogang mga Kristohanon sa mga sangkap sa lawas nga hiniusang nag-alagad ubos sa ilang Ulo, si Kristo. (Col. 1:18) Iyang gipahinumdoman ang inanak-sa-espiritu nga mga Kristohanon nga ang lawas adunay daghang membro nga lainlaig trabaho ug kini sila, “bisan tuod daghan, maoy usa ka lawas nga nahiusa kang Kristo.” Sa susama, gidasig ni Pablo ang mga dinihogan sa Efeso: “Magatubo unta kita sa tanang butang pinaagi sa gugma ngadto kaniya nga mao ang ulo, si Kristo. Gikan kaniya ang tibuok lawas, kay takdo nga pagkadugtong ug gihimong magtambayayongay pinaagi sa matag lutahan nga naghatag sa gikinahanglan, sumala sa paglihok sa matag sangkap sa angay nga sukod, nagpatubo sa lawas alang sa pagpalig-on sa kaugalingon niini diha sa gugma.”—Efe. 4:15, 16.

10. Kang kinsang awtoridad ang angayng ilhon sa “ubang mga karnero”?

¹⁰ Bisan tuod ang “ubang mga karnero” dili bahin sa katibuk-ang lawas ni Kristo, sila daghag makat-onan gikan niini nga ilustrasyon. (Juan 10:16) Si Pablo miingon nga ‘gipasakop [ni Jehova] ang tanang butang ilalom sa mga tiil ni [Kristo], ug gihimo siyang ulo ibabaw sa tanang butang nganha sa kongregasyon.’ (Efe. 1:22) Karong adlawa, ang ubang mga karnero maoy bahin sa “tanang butang” nga gipailalom ni Jehova sa pagkaulo sa iyang Anak. Lakip usab sila sa “mga kabtangan” nga gipiyal ni Kristo sa iyang “matinumanon ug maalamong ulipon.” (Mat. 24:45-47) Busa, kadtong adunay yutan-ong paglaom angayng moila nga si Kristo mao ang ilang Ulo ug sila magpasakop sa matinumanon ug maalamong ulipon ug sa Nagamandong Lawas niini ug sa mga lalaki nga gitudlo ingong mga magtatan-aw sa kongregasyon. (Heb. 13:7, 17) Kini magpatunhay sa panaghiusa sa kongregasyon.

11. Gipasukad sa unsa ang atong panaghiusa, ug unsay laing gitambag ni Pablo?

¹¹ Ang maong panaghiusa gipasukad sa gugma, nga maoy “hingpit nga bugkos sa panaghiusa.” (Col. 3:14) Sa Roma kapitulo 12, gipasiugda kini ni Pablo pinaagi sa pag-ingon nga ang atong gugma kinahanglan nga “walay pagkasalingkapaw” ug sa “inigsoong gugma” atong ipakita ang “malumong pagmahal alang sa usag usa.” Motultol kini sa pagtinahuray. Ang apostol miingon: “Manguna sa pagpakitag pasidungog sa usag usa.” Siyempre, ang gugma wala magpasabot nga atong konsentihon ang daotang buhat. Maningkamot gayod kita nga mahuptang hinlo ang kongregasyon. Sa dihang nagtambag bahin sa gugma, si Pablo midugang: “Kasilagi ang daotan, hawiri ang maayo.”

Ang Dalan sa Pagkamaabiabihon

12. Bahin sa pagpakitag pagkamaabiabihon, unsay atong makat-onan sa mga Kristohanon sa karaang Macedonia?

¹² Basaha ang Roma 12:13. Ang atong gugma sa atong mga igsoon magpalihok kanato sa ‘pagpaambit ngadto sa mga balaan sumala sa ilang mga panginahanglan’ ug sumala sa  atong katakos. Bisag kabos, kita makapaambit ngadto sa uban kon unsay naa kanato. Si Pablo misulat bahin sa mga Kristohanon sa Macedonia: “Panahon sa usa ka dakong pagsulay ilalom sa kasakitan ang ilang kadagaya sa kalipay ug ang ilang hilabihang kakabos nagpadagaya sa bahandi sa ilang pagkamahinatagon. Kay sumala sa ilang maarangan, oo, ako makapamatuod, kadto maoy labaw sa ilang maarangan, samtang sila sa ilang kaugalingon nagpadayon sa paghangyo kanamo uban ang tumang pagpangaliyupo alang sa pribilehiyo sa malulotong pagpanghatag ug sa pag-ambit sa ministeryo nga gitagana alang sa mga balaan [sa Judea].” (2 Cor. 8:2-4) Bisag kabos, ang mga Kristohanon sa Macedonia manggihatagon kaayo. Ilang giisip nga pribilehiyo ang pagtabang sa mga igsoon sa Judea nga nagkalisodlisod.

13. Unsay gipasabot sa pamulong nga “sunda ang dalan sa pagkamaabiabihon”?

¹³ Ang pamulong “sunda ang dalan sa pagkamaabiabihon” gihubad gikan sa Gregong ekspresyon nga nagpasabot ug pagpakitag inisyatibo. Ang The New Jerusalem Bible naghubad sa maong ekspresyon nga “pangitag mga kahigayonan sa pag-abiabi.” Ang pagkamaabiabihon usahay mapasundayag pinaagi sa pagdapit sa usa sa pagpangaon, ug kon gugma ang nagtukmod sa pagbuhat niana, dalayegon kana. Apan kon duna kitay inisyatibo, makakaplag kitag uban pang mga paagi sa pagpakitag pagkamaabiabihon. Pananglitan, kon dili kita makadapit sa uban sa panihapon tungod sa kalisod o sa dili maayong panglawas, mahimo nato silang pakapehon, paimnon ug tsa o soft drink.

14. (a) Unsang mga pulong ang naglangkob sa Gregong pulong nga “pagkamaabiabihon”? (b) Diha sa ministeryo, sa unsang paagi atong ikapasundayag ang atong kahangawa sa mga langyaw?

¹⁴ Ang pagkamaabiabihon naglangkit sa atong panglantaw. Ang Gregong pulong nga gihubad ug “pagkamaabiabihon” gilangkoban sa duha ka lintunganayng mga pulong nga nagkahulogang “gugma” ug “estranghero.” Unsay atong pagbati sa mga estranghero, o sa mga langyaw? Ang mga Kristohanon nga naningkamot sa pagtuon ug laing pinulongan aron makasangyaw sa mga langyaw nga nagpuyo diha sa teritoryo sa kongregasyon, nalakip gayod niadtong nagsubay sa dalan sa pagkamaabiabihon. Siyempre, daghan kanato ang dili makahimo niana. Sa gihapon, kitang tanan makatabang sa mga langyaw pinaagi sa paggamit sa pulyetong Good News for People of All Nations, nga naundan ug usa ka mensahe sa Bibliya diha sa daghang pinulongan. Aduna bay maayong resulta sa imong paggamit sa maong pulyeto diha sa ministeryo?

 Pagbati Alang sa Isigkaingon

15. Sa unsang paagi sulondan si Jesus sa gitambag sa Roma 12:15?

¹⁵ Basaha ang Roma 12:15. Ang tambag ni Pablo niining bersikuloha masumaryo sa duha ka pulong: Pagpakitag empatiya. Kinahanglang makamao kitang mosabot ug mobati sa gibati sa atong isigkatawo, kalipay man o kaguol. Kon kita mainiton sa espiritu, madayag ang atong kalipay o kaluoy. Sa dihang ang 70 ka tinun-an ni Kristo namalik nga malipayon gikan sa pagsangyaw ug miasoy sa maayong resulta sa ilang buluhaton, si Jesus “nalipay sa hilabihan diha sa balaang espiritu.” (Luc. 10:17-21) Siya miduyog sa ilang kalipay. Sa laing bahin, si Jesus ‘mihilak uban sa mga tawong nanghilak’ sa dihang namatay ang iyang higalang si Lazaro.—Juan 11:32-35.

16. Sa unsang paagi kita makapakitag empatiya, ug kinsa ilabina ang kinahanglang mopakita niana?

¹⁶ Gusto natong sundogon ang ehemplo ni Jesus sa pagpakitag empatiya. Sa dihang malipay ang atong igsoon, buot natong ipakita nga nalipay usab kita. Sa susama, kita angay nga mahimong sensitibo sa kasakit ug kaguol nga bation sa atong mga igsoon. Sagad, kita makahupay gayod sa atong mga isigka-magtutuo nga nag-antos sa kaguol kon mabination kitang mamati kanila. Usahay, makahilak pa gani kita tungod kay natandog pag-ayo ang atong kasingkasing. (1 Ped. 1:22) Ang mga ansiyano ilabina ang angayng mosunod sa tambag ni Pablo sa pagpakitag empatiya.

17. Unsay atong nakat-onan gikan sa Roma kapitulo 12, ug unsay hisgotan sa sunod nga artikulo?

¹⁷ Ang mga bersikulo nga atong gitun-an diha sa Roma kapitulo 12 naghatag ug tambag nga mapadapat diha sa atong personal nga kinabuhi ingong mga Kristohanon ug sa atong relasyon sa atong mga igsoon. Sa sunod artikulo, atong susihon ang nahibiling mga bersikulo niining kapituloha, nga naghisgot kon sa unsang paagi nato lantawon ug trataron ang mga tagagawas, lakip na ang mga magsusupak ug maglulutos.

Agig Pagsubli

• Sa unsang paagi kita “magmainiton sa espiritu”?

• Nganong angay kitang mag-alagad sa Diyos uban ang pagkamapainubsanon ug pagkamakasaranganon?

• Sa unsang mga paagi kita makapakitag empatiya ug kaluoy sa atong isigkamagtutuo?

[Mga Pangutana sa Pagtuon]

[Mga hulagway sa panid 4]

Nganong kita nakigbahin sa Kristohanong mga buluhaton?

[Hulagway sa panid 6]

Sa unsang paagi ang matag usa kanato makatabang sa mga langyaw sa pagkahibalo bahin sa Gingharian?