DIHANG gipikpik ang iyang abaga, si Kingsley misugod pagbasa sa Bibliya—ang iyang unang asaynment sa Teokratikanhong Tunghaan sa Ministeryo. Mainampingon niyang gilitok ang matag pulong, nga wala gyoy nasayloan. Taym pa! Nganong wala man siya magtan-aw sa iyang Bibliya?

Si Kingsley, nga taga-Sri Lanka, buta. Siya usab may diperensiya sa pandungog ug kinahanglang mag-wheelchair. Sa unsang paagi kining tawhana nakakat-on bahin kang Jehova ug naenrol sa Teokratikanhong Tunghaan sa Ministeryo? Pasaysaya ko ninyo.

Sa una nakong nahibalag si Kingsley, nakadayeg kaayo ko sa iyang kauhaw sa kamatuoran. Nagtuon na siya sa Bibliya uban sa ubay-ubayng Saksi, ug daan na ang iyang Braille nga kopya sa librong Kahibalo nga Motultol sa Kinabuhing Walay Kataposan. * Misugot siya nga magtuon mi pag-usab, apan diha miy duha ka problema.

Una, si Kingsley nagpuyo sa balay alang sa mga tigulang ug baldado. Tungod sa kabanha sa palibot ug sa dili maayong pandungog ni Kingsley, kinahanglan nakong kusgon ang akong tingog. Ang tanan sa maong balay makadungog gani sa among senemanang pagtuon!

Ikaduha, diyutay ra nga bag-ong impormasyon  ang mabasa ug masabtan ni Kingsley kada tuon namo. Aron magmapuslanon ang among pagtuon, mangandam siya pag-ayo. Abante niyang balikbalikon ug basa ang tun-anan, tan-awon ang mga teksto diha sa iyang Braille nga Bibliya, ug dayon sanasanahon ang tubag sa mga pangutana. Epektibo kaayo kining paagiha. Panahon sa among pagtuon, siya magyaka sa karpet, madasigong maghapak-hapak sa salog samtang magsaysay sa iyang nakat-onan sa makusog nga tingog. Wala madugay, kaduha sa usa ka semana na ming magtuon, ug ang matag sesyon dangtag duha ka oras!

Si Kingsley gusto kaayong motambong sa mga tigom, apan dili kini sayon. Nagkinahanglan siyag tabang aron isakay sa wheelchair, sa sakyanan, ug aron isulod sa Kingdom Hall. Apan daghan diha sa kongregasyon ang magpulipuli sa pagtabang kaniya, nga nag-isip niana ingong pribilehiyo. Panahon sa tigom, si Kingsley magpaduol sa sound system, maminaw pag-ayo, ug mokomento pa gani!

Sa ngadtongadto, si Kingsley nagpaenrol sa Teokratikanhong Tunghaan sa Ministeryo. Duha ka semana una sa iyang unang asaynment sa pagbasa ug Bibliya, ako siyang gipangutana kon nagpraktis ba siya. Siya miingon, “Oo, Brad, 30 ka beses na kong nagpraktis.” Ako siyang gikomendahan sa iyang paningkamot ug giingnan nga gusto nako siyang paminawon. Iyang gibuksan ang iyang Bibliya, gihikap ang Braille nga mga letra, ug misugod pagbasa. Apan, akong namatikdan nga ang iyang mga tudlo wala moirog ingon sa sagad niyang buhaton. Iya diay kining namemorya!

Daw dili ko makatuo sa akong nakita ug nanaligdig ang mga luha sa akong aping. Ako siyang gipangutana kon nganong namemorya dayon niya kini human lang sa pagpraktis ug 30 ka beses. Siya mitubag: “Ang buot nakong ipasabot, nagpraktis ko ug 30 ka beses kada adlaw.” Sulod sa kapig usa ka bulan, si Kingsley moyaka sa iyang karpet, nga magbalikbalik ug basa sa iyang asaynment hangtod nga namemorya niya kini.

Dayon, miabot ang adlaw nga ihatag na niya ang iyang bahin sa Kingdom Hall. Dihang nahuman niya kinig basa, ang mga igsoon namakpak pag-ayo, ug daghan ang nanghilak dihang nakita nila ang determinasyon niining bag-ong estudyante. Usa ka sister, kinsa mihunong sa paghatag ug bahin sa tunghaan tungod sa kakulba, nagpaenrol pag-usab. Ngano? Siya miingon, “Kon mahimo ni Kingsley, mahimo sab nako!”

Sa Septiyembre 6, 2008, human sa tulo ka tuig nga pagtuon sa Bibliya, gipasimbolohan ni Kingsley ang iyang pagpahinungod kang Jehova pinaagig bawtismo. Usa ka maunongong Saksi hangtod sa iyang kamatayon sa Mayo 13, 2014, si Kingsley masaligon nga sa Paraiso, ipadayon niya ang iyang matinumanong pag-alagad uban ang hingpit nga panglawas. (Isa. 35:5, 6)—Sumala sa giasoy ni Paul McManus.