Pagpanukod ug mga Tigomanan Alang sa Pagdayeg Kang Jehova

“Di ko makatuo sa akong nakita. Wa gyod ko magdahom nga matukoran mig tigomanan nga sama ani kanindot, diin kami magtigom ug magdayeg kang Jehova. Di kabayrag sapi ang kalipay nga akong gibati!”—MARIA, MEXICO.

ANG MGA SAKSI NI JEHOVA malipayng motambong sa mga tigom aron sa pagtuon sa Pulong sa Diyos, ang Bibliya. (Salmo 27:4; Hebreohanon 10:23-25) Tinuod gayod kini ilabina kon presentable ang mga dapit sa pagsimba nga ilang tigoman. Sa di pa dugayng katuigan, nakatukod na silag linibo ka bag-ong dapit sa pagsimba—nga gitawag ug mga Kingdom Hall—sa daghang nasod sa tibuok kalibotan.

Nganong kinahanglan mang magtukod ug mga tigomanan? Kinsa may motukod? Unsa may gibati sa mga tawo nga nakaapil niining maong pagpanukod? Aron matubag kining mga pangutanaha, tagda ang nahitabo sa Mexico ug Belize.

Libo-libo ka Bag-ong Kingdom Hall ang Gikinahanglan!

Kaniadto, ang mga Saksi ni Jehova sa Mexico nagtigom bisan asa alang sa pagsimba—sa likod sa balay, sa balay mismo sa mga Saksi, mga bodega, grahean, o sa inabangang mga lawak. Niadtong panahona, ang maunongong mga Saksi nangandoy kanunay nga unta makabaton na sila ug kaugalingong Kingdom Hall.

Pagka 1994 diha nay 388,000 ka Saksi sa Mexico. Gipakita sa usa ka surbi nga gihimo nianang tuiga nga kon tukorag mga balay sa pagsimba ang tanang kongregasyon, kini nagpasabot nga 3,300 ka bag-ong Kingdom Hall ang gikinahanglan. Pagkadako gayod niini nga buluhaton!

Ang pipila sa mga kongregasyon didto nga makaarang sa galastohan, nakapatukod na ug kaugalingong mga Kingdom Hall. Bisan pa niana, paglabay sa lima ka tuig, nakita nga dako pa kaayo ang panginahanglan. Aron matagan-an kini, kinahanglang magtukod ug dugang mga Kingdom Hall—ug humanon kini sa labing madali. Unsaon sa pagpalampos niini?

Grupo sa Hanas nga mga Boluntaryo nga Magbalhin-balhin

Sa 1999 gisugdan ang bag-ong programa sa pagpanukod. Giporma ang mga Kingdom Hall Construction Group sa tibuok Mexico. Ang mga Saksi ni Jehova gikan sa tibuok nasod—nga ang kadaghanan kanila may kahanas sa pagpanukod—miboluntaryo aron makigbahin niining bag-o nga programa. Karon, may 35 ka grupo na sa Mexico, ug usa ka grupo ang giporma sa Belize.

Ang matag Kingdom Hall Construction Group sagad adunay walo ka boluntaryo—mga lalaki ug babaye—nga tibuok-panahong nagtrabaho nga walay suweldo. Kining malipayong grupo sa mga boluntaryo magbalhin-balhin sa lainlaing mga lugar sa nasod aron manguna sa buluhatong pagpanukod. Ang mga boluntaryo motrabahog walo ka  oras kada adlaw gikan sa Lunes hangtod sa Biyernes ug kada ikaduha ug kataposang Sabado sa bulan. Sila magsugod sa alas 7:00 s.b. pinaagig paghisgot sa inadlawng teksto sa Bibliya, ug human niini, idalit ang pamahaw. Andam ang tanan bisan unsay ipabuhat kanila. Pananglitan, ang mga babaye magmasilya, mamutang ug mga baldosa, ug mamintal sama sa gibuhat sa mga lalaki.

Ang mga Saksi ni Jehova sa kongregasyon nga gitukoran ug Kingdom Hall maoy magtagana ug kasak-an, maglaba sa mga sinina, ug mag-andam ug pagkaon sa grupo sa mga boluntaryo. Gawas nga magkauban sa pagtrabaho, ang mga boluntaryo ug ang mga Saksi sa maong dapit magkauban usab sa pagtambong sa Kristohanong mga tigom ug sa pagsangyaw sa balay-balay.

Mga Panalangin nga Nadawat sa mga Boluntaryo

Unsa may gibati sa mga boluntaryo maylabot sa buluhaton nga ilang gihimo? “Tinuod nga kami mag-antos sa kainit ug katugnaw samtang nagtrabaho, mokaon sa pagkaon nga wala namo maandi, magbalhin-balhin, mahimulag sa among pamilya, ug kasagaran dili kaayo komportable ang among puy-anan,” matod pa ni Daniel, nga nagboluntaryo kapin na sa tulo ka tuig. “Apan ang maong mga kalisdanan wala ra sa kumingking kon itandi sa mga panalangin nga among nadawat,” padayon pa niya.

Unsa ang pipila sa maong mga panalangin? Daghan sa mga boluntaryo ang nakakat-og mga kahanas sa pagpanukod. Apan si Carlos, nga nagdumala sa usa sa dagkong mga grupo, nagkomento kon unsang panalangin ang mas bililhon alang kaniya. “Mora mig usa ka pamilya nga may 20 ka membro,” matod pa niya. “Magdungan mi pagpangaon, magdungan mi pagtrabaho, magdungan mi pagtuon, ug magdungan mi pag-ampo. Nasuod mi pag-ayo sa usag usa.”

Ang mga grupo sa konstruksiyon nasuod usab pag-ayo sa mga Saksi nga gitukorag Kingdom Hall. Si José, nga nakaboluntaryo sa pagtukod ug kapin sa 100 ka tigomanan, nag-ingon: “Matandog gyod ko sa dihang akong makita ang mga luha sa kalipay ug matam-is nga mga pahiyom sa mga Saksi nga mapasalamaton tungod kay natuman ra gyod ang ilang pangandoy nga makabaton ug bag-ong Kingdom Hall.” Siya nagpadayon: “Makapalipay ang pagkahibalo nga nalig-on ang pagtuo sa uban bisag gamay lang kamig natampo sa pagtukod ug bag-ong balay alang sa putling pagsimba.”

Makapahinganghang Kalamposan!

Kini nga mga dapit sa pagsimba simple lang ug disenyo, nga tungod niini dali ra kining tukoron ug dili gastoso. Kon posible, ang grupo sa konstruksiyon mogamit ug mga materyales ug paagi sa pagpanukod nga naandan diha sa dapit nga gitukorag Kingdom Hall. Niining paagiha, matukod ang usa ka bag-ong Kingdom Hall sulod lamang sa unom ka semana!

Hangtod sa tuig 2007, ang tanang kongregasyon sa Belize aduna nay bag-ong mga Kingdom Hall—17 ang tanan. Sa Mexico, kapin na sa 1,400 ka Kingdom Hall ang natukod sukad niadtong 1999!

Bisan pag daghan nang tigomanan ang natukod,  daghan pa gihapon ang gikinahanglan. (Mateo 9:37) Ang gidaghanon sa mga Saksi sa Mexico miuswag karon ug kapin sa 600,000—nga ang tanan magtigom katulo sa usa ka semana aron matudloan sa Pulong sa Diyos. Busa, halos 2,000 pa ka bag-ong mga Kingdom Hall ang gikinahanglan. Kon kining boluntaryong pagpanukod isalig lamang sa tawhanong mga paningkamot, dili gayod kini molampos. Apan sumala sa atong nakita, uban sa tabang ni Jehova nga Diyos, “ang tanang butang posible.”—Mateo 19:26.

[Kahon/Hulagway sa panid 22]

“Buhaton Nila Kon Unsay Ilang Isulti”

Dili lang mga Saksi ni Jehova sa mga dapit nga gitukorag Kingdom Hall ang nadasig sa buluhatong pagpanukod. Pananglitan, panahon sa pagtukod ug Kingdom Hall sa Belize, dihay usa ka tawo nga miingon sa iyang asawang Pentekostal nga inigkahuman ug tukod sa mga Saksi ni Jehova sa ilang “simbahan,” gusto niyang motambong niini. Unsa may nakaaghat kaniya sa pagtambong? “Akong nakita nga ang Diyos nagauban kanila,” miingon siya. “Walay nag-away samtang nagtrabaho. Ug buhaton nila kon unsay ilang isulti.”

[Hulagway]

Kingdom Hall sa Orange Walk, Belize

[Kahon/Mga hulagway sa panid 23]

Tibuok-Kalibotang Pagpanukod

Aduna nay mga Kingdom Hall Construction Group sa 120 ka nasod. Nalista sa ubos ang pipila sa mga nasod diin ang mga boluntaryo malipayong nagsakripisyo sa ilang kaugalingon:

Angola, Bolivia, Croatia, Dominican Republic, Etiopia, Fiji, Ghana, Hong Kong, India, Jamaica, Kazakhstan, Liberia, Moldova, Nigeria, Papua New Guinea, Pilipinas, Rwanda, Tuvalu, Ukraine, Venezuela, Zambia.

[Mga Hulagway]

Kingdom Hall sa Acapulco, Mexico

Kingdom Hall Construction Group sa Mexico

[Hulagway sa panid 23]

Kingdom Hall sa Tlaxcala, Mexico