Gitagalan na ba ang Planetang Yuta?

Unsay imong tubag sa mosunod nga pangutana?

Sa umaabot, ang kahimtang ba sa yuta

(a) moarang-arang?

(b) dili mausab?

(c) mograbe?

IKAW ba adunay positibong panglantaw sa umaabot? Adunay daghang kaayohan niana. Ang mga pagtuon nagpakita nga ang pagbaton ug positibong panglantaw maayog epekto sa hunahuna ug panglawas. Nadiskobrehan pa gani sa usa ka dugayng pagtuon nga ang mga lalaking positibog panglantaw sa kinabuhi diyutay rag purohan nga atakehon sa kasingkasing kon itandi niadtong negatibog panglantaw. Nahiuyon kini sa giingon sa Bibliya kasiglohan kanhi: “Ang kasingkasing nga malipayon maayo nga tambal, apan ang masulub-on nga espiritu makapauga sa kabukogan.”—Proverbio 17:22.

Apan, tungod sa panagna sa mga siyentipiko bahin sa umaabot sa planetang Yuta, daghan ang dili malipayon ug negatibog panglantaw. Tagda ang pipila sa makuyaw nga mga panagna nga nahimong unod sa balita.

Nameligro nga Planeta

Niadtong 2002, ang tinamod nga Stockholm Environment Institute nagpasidaan nga kon dili mohunong ang tawo sa pagdaot sa kalikopan aron lang dili mapugngan ang  pag-uswag sa ekonomiya, lagmit mopahinabo kinig “dakong kadaot sa klima ug sa ekosistema sa yuta.” Kini nag-ingon usab nga ang kaylap nga kakabos, padayon nga kawalay-kaangayan, ug ang pag-abuso sa mga kahinguhaan sa yuta makapatunghag “sunodsunod nga mga problema sa kalikopan, katilingban ug seguridad.”

Niadtong 2005, giluwatan sa United Nations ang Millennium Ecosystem Assessment Synthesis Report. Kini maoy resulta sa upat ka tuig nga pagtuon bahin sa kalikopan, nga gihimo sa kapin sa 1,360 ka eksperto gikan sa 95 ka nasod. Ang maong report nagpasidaan: “Tungod sa kalihokan sa tawo, naapektohan pag-ayo ang kinaiyanhong mga obra sa Yuta ug kini nagpameligro sa katakos sa ekosistema sa planeta sa pagsuportar sa umaabot nga mga henerasyon.” Aron malikayan ang kadaot, gikinahanglan ang “dakong kausaban sa mga pamaagi, sistema, ug mga batasan, nga wala pa masugdi hangtod karon,” nag-ingon ang taho.

Gipahayag ni Anna Tibaijukanga, nga usa ka ehekutibong direktor sa United Nations Human Settlements Programme, ang gituohan sa daghang tigdukiduki. Siya miingon: “Kon atong ipadayon ang atong ginahimo karon, segurado gayod nga dulom ang atong kaugmaon.”

Katarongan nga Molaom

Ang mga Saksi ni Jehova, nga nagpatik niining magasina, nagtuo usab nga hapit nang mahitabo ang dakong kausaban dinhi sa yuta. Apan, kombinsido sila nga inay mosangpot sa kalaglagan, kini nga mga kausaban moresulta sa nindot kaayong mga kahimtang nga wala pa masinati sukad sa kalibotan. Nganong kombinsido man sila niana? Tungod kay nagsalig sila sa gisaad sa Pulong sa Diyos, ang Bibliya. Matikdi ang usa nianang maong mga saad: “Sa dili na madugay, ug ang daotan mawala na; ug pagasusihon mo gayod ang iyang dapit, ug siya mawala diha. Apan ang mga maaghop magapanag-iya sa yuta, ug sila makakaplag gayod sa ilang tumang kalipay sa kadagaya sa pakigdait.”—Salmo 37:10, 11.

Ang mao bang paglaom usa lamang ka damgo? Sa dili pa tubagon ang maong pangutana, palandonga kini: Libolibo ka tuig kanhi, ang Bibliya tukmang nagtagna bahin sa dagkong mga problema nga nag-apektar karon sa yuta ug sa tawo. Palihog basaha ang mga teksto nga gihisgotan sa sunod nga artikulo, ug itandi ang giingon niana sa nagakahitabo karon. Sa pagbuhat nimo niana, molig-on ang imong pagsalig nga ang Bibliya tukmang nagtagna sa kon unsay mahitabo sa umaabot.