Ang Kinalabwang Pamatuod sa Gugma sa Diyos
Pakigsuod sa Diyos
Ang Kinalabwang Pamatuod sa Gugma sa Diyos
SI Abraham nahigugma ug nagmatinumanon sa Diyos. Siya usab nahigugma kang Isaac, ang iyang anak sa pagkatigulang. Apan sa dihang nag-edad na si Isaac ug mga 25 anyos, si Abraham gisulayan. Kinahanglan niyang supakon ang natural nga pagbati sa usa ka amahan sanglit gisugo siya sa Diyos sa paghalad sa iyang anak. Apan, wala ra mamatay si Isaac. Sa hapit nang duslaka ni Abraham si Isaac, ang Diyos mipugong kaniya pinaagi sa usa ka anghel. Ang asoy sa Genesis 22:1-18 naghulagway sa dakong gugma sa Diyos alang kanato.
‘Ang Diyos nagbutang kang Abraham sa pagsulay,’ nag-ingon ang bersikulo 1. Si Abraham maoy usa ka tawo nga may pagtuo, apan ang iyang pagtuo gisulayan—pagsulay nga wala pa niya masinati sukad. Ang Diyos miingon: “Kuhaa, palihog, ang imong anak nga lalaki, ang imong bugtong anak nga imong gihigugma pag-ayo, si Isaac, ug . . . itanyag siya ingong usa ka halad-nga-sinunog sa usa sa mga bukid nga akong itudlo kanimo.” (Bersikulo 2) Ang Diyos dili motugot nga sulayan ang iyang mga alagad nga labaw kay sa ilang maarangan. Busa, ang maong pagsulay nagpakita nga ang Diyos may pagsalig kang Abraham.—1 Corinto 10:13.
Wala mag-ukon-ukon si Abraham sa pagsunod sa Diyos. Atong mabasa: “Si Abraham mibangon sayo sa buntag ug nagmontura sa iyang asno ug nagdalag duha sa iyang mga tig-alagad uban kaniya ug kang Isaac nga iyang anak; ug siya nagbugha ug kahoy alang sa halad-nga-sinunog. Unya siya mitindog ug mipanaw.” (Bersikulo 3) Dayag nga wala ipahibalo ni Abraham ang detalye sa maong pagsulay.
Sila mipanaw sulod sa tulo ka adlaw, ug nianang mga adlawa si Abraham namalandong. Apan wala kini makapaluya sa iyang pagtuo. Ang mga pulong nga iyang gisulti nagpadayag kon unsa ka lig-on ang iyang pagtuo. Sa dihang iyang nakita gikan sa halayo ang bukid nga gipili sa Diyos, iyang giingnan ang iyang mga sulugoon: “Pabilin kamo dinhi . . . , apan ako ug ang bata buot moadto didto ug mosimba ug mobalik kaninyo.” Sa dihang si Isaac nangutana kon asa ang karnero nga ilang ihalad, si Abraham miingon: “Ang Diyos magtagana sa karnero.” (Bersikulo 5, 8) Si Abraham nagtuo nga ibalik ra kaniya ang iyang anak. Ngano? Tungod kay “giisip niya nga ang Diyos makahimo sa pagbangon [kang Isaac] bisan gikan sa mga patay.”—Hebreohanon 11:19.
Didto sa bukid, sa dihang gikuha ni Abraham ang ‘kutsilyo aron patyon ang iyang anak,’ dihay usa ka anghel nga mipugong sa iyang kamot. Dayon, gitagana sa Diyos ang usa ka karnero nga nasangit sa kalibonan aron ihalad ni Abraham “puli sa iyang anak.” (Bersikulo 10-13) Para sa Diyos, sama rag gihalad ni Abraham si Isaac. (Hebreohanon 11:17) Ang usa ka eksperto sa gramarya sa Bibliya mikomento, “Alang sa Diyos, ang pagkaandam ni Abraham nga ihalad ang iyang anak, sama rag iya kining gihalad.”
Napamatud-an ni Jehova nga kasaligan gayod si Abraham. Ug tungod sa pagsalig ni Abraham kang Jehova, siya gipanalanginan. Gisubli ug mas gipadako sa Diyos ang iyang pakigsaad kang Abraham, nga ang Diyos magpanalangin sa mga tawo sa tanang nasod.—Bersikulo 15-18.
Gipugngan sa Diyos si Abraham sa paghalad kang Isaac, apan sa ulahi, ang Diyos naghalad mismo sa iyang bugtong anak. Ang pagkaandam ni Abraham nga ihalad si Isaac naghulagway sa pagkaandam ni Jehova sa paghalad sa iyang bugtong Anak nga si Jesus, alang sa atong mga sala. (Juan 3:16) Ang kamatayon ni Kristo maoy labing dakong pamatuod sa gugma ni Jehova alang kanato. Sanglit gihimo sa Diyos ang maong halad alang kanato, angay natong pangutan-on ang atong kaugalingon, ‘Andam ba akong magsakripisyo aron mapasidunggan ang Diyos?’