5 Hinungdanon ba Kon Asa ug Kanus-a Kita Mag-ampo?

LAGMIT nakamatikod ka nga ang kadaghanang relihiyon didto gayod mag-ampo sa ilang simbahan ug nagtakdag espesipikong mga oras alang sa pag-ampo. Ang Bibliya ba nagtudlo nga ang pag-ampo himoon lamang sa usa ka partikular nga dapit ug oras?

Gipakita sa Bibliya nga adunay haom nga mga panahon alang sa pag-ampo. Pananglitan, sa wala pa mokaon uban sa iyang mga tinun-an, si Jesus nag-ampo aron magpasalamat sa Diyos. (Lucas 22:17) Ug ang iyang mga tinun-an nag-ampo sa dihang nagkatigom sila aron sa pagsimba. Sa ingon ilang gisunod ang karaan nang kostumbre sa mga Hudiyo diha sa mga sinagoga ug sa templo sa Jerusalem. Katuyoan sa Diyos nga ang templo himoong “balay nga ampoanan alang sa tanang kanasoran.”—Marcos 11:17.

Sa dihang ang mga alagad sa Diyos magtigom ug mag-ampo, ang ilang mga pangaliya dakog mahimo. Kon sila nahiusa sa hunahuna ug ang gitanyag nga pag-ampo nahiuyon sa mga prinsipyo sa Bibliya, kini makapalipay sa Diyos. Ang maong pag-ampo lagmit makapabag-o pa gani sa iyang hunahuna. (Hebreohanon 13:18, 19) Ang mga Saksi ni Jehova kanunayng mag-ampo diha sa ilang panagkatigom. Gidapit ka sa pagtambong sa Kingdom Hall sa inyong lugar aron imong madungog ang maong mga pag-ampo.

Apan ang Bibliya wala magtakda ug partikular nga oras o dapit alang sa pag-ampo. Sa Bibliya, atong mabasa nga ang mga alagad sa Diyos nag-ampo sa lainlaing dapit ug panahon. Si Jesus miingon: “Sa dihang ikaw mag-ampo, sulod sa imong kaugalingong lawak ug, human masirhi ang imong pultahan, pag-ampo sa imong Amahan nga anaa sa tago; unya ang imong Amahan nga nagatan-aw sa tago magabalos kanimo.”—Mateo 6:6.

Makapadasig kana, dili ba? Ikaw makaampo sa Diyos bisan unsang orasa, ug ikaw makasalig nga siya mamati gayod. Kanay hinungdan kon nganong si Jesus sagad moadto sa usa ka dapit nga mag-inusara aron mag-ampo! Kas-a, tibuok gabii siyang nag-ampo sa Diyos, lagmit aron mangayog giya sa hinungdanon kaayong desisyon.—Lucas 6:12, 13.

Ang ubang mga alagad sa Diyos nga gihisgotan sa Bibliya nag-ampo sa dihang mihimo silag bug-at nga desisyon o sa dihang nag-atubang ug grabeng mga problema. Sila nag-ampo sa makusog ug usahay sa hilom; sila nag-ampo ingong usa ka grupo ug sa dihang nag-inusara. Dili hinungdanon ang dapit o oras; ang hinungdanon mao nga sila nag-ampo. Ang Diyos nag-awhag pa gani sa iyang mga alagad: “Pag-ampo nga walay-hunong.” (1 Tesalonica 5:17) Siya kanunayng andam mamati niadtong nagabuhat sa iyang kabubut-on. Dili ba kana nagpakita nga gihigugma gayod kita sa Diyos?

Ugaling lang, daghang tawo karon nagduhaduha kon mapuslanon ba ang pag-ampo. Busa, lagmit mangutana ka, ‘Makatabang ba gayod ang pag-ampo?’

[Blurb sa panid 9]

Kita makaampo bisan asa ug bisan kanus-a