Ika-129 nga Graduwasyon sa Gilead

“Kini ang Inyong Adlaw”

NIADTONG Septiyembre 11, 2010, duolag 8,000 ang nagkatigom alang sa espesyal nga okasyon—ang graduwasyon sa ika-129 nga klase sa Watchtower Bible School of Gilead. “Kini ang inyong adlaw,” mao kini ang giingon ni Samuel Herd nga membro sa Nagamandong Lawas sa mga Saksi ni Jehova ngadto sa mga estudyante. “Ania kami aron moduyog sa inyong kalipay!”

“Ang Mapatalinghogong Igdulungog”

Gisugdan ni Brader Herd ang programa pinaagi sa pagpasiugda nga ang tanang Kristohanon kinahanglang magbaton ug “mapatalinghogong igdulungog” pinaagi sa pagtagad sa Pulong sa Diyos. (Proverbio 20:12) “Kamo nagpatalinghog kang Jehova sa milabayng pipila ka bulan,” giingnan ni Brader Herd ang mga estudyante, “ug buhaton ninyo kini hangtod sa hangtod.”

Unsaon paggamit sa bag-ong mga misyonaryo ang ilang igdulungog sa maalamong paagi? “Pinaagi sa pagpatalinghog sa Pulong sa Diyos,” matod ni Brader Herd. Siya midugang: “Daghan ang hisgotan sa programa karong adlawa nga mag-andam kaninyo sa inyong buluhaton ingong mga misyonaryo sa umaabot nga katuigan.”

“Salig Kang Jehova sa Inyong Bug-os nga Kasingkasing”

Kini ang makapahinuklog nga tema nga gipamulong ni Gerrit Lösch, usa ka membro sa Nagamandong Lawas, ngadto sa mga estudyante. Giasoy niya ang daghang panghitabo diin ang katawhan sa Diyos, kaniadto ug karon, nagpakitag pagsalig kang Jehova.

Sa samang paagi, gipasiugda ni Brader Lösch nga ang “mga misyonaryo kinahanglang mosalig kang Jehova maylabot sa ilang mga asaynment.” Siya miingon: “Pananglitan, tingali kamo mangutana: ‘Makakat-on ba kaha ko sa bag-ong pinulongan? Makapasibo ba ko sa bag-ong kultura? Makaantos ba ko sa kamingaw?’” Ang tubag? Gitambagan ni Brader Lösch ang mga estudyante sa “pagsalig kang Jehova.”

Gibasa usab ni Brader Lösch ang Proverbio 14:26, nga nag-ingon: “Diha sa pagkahadlok kang Jehova adunay lig-on nga pagsalig.” Molig-on ang atong pagsalig kang Jehova kon palandongon nato ang daghang panalangin nga iyang gihatag.

Ang Bibliya nag-ingon nga ang tawo nga mosalig kang Jehova “mahimo gayod nga sama sa usa ka kahoy nga gitanom sa daplin sa mga tubig, nga nagpakuyanap sa iyang mga gamot sa daplin mismo sa sapa; ug dili siya makakita inig-abot sa kainit, hinunoa ang iyang mga dahon molambo gayod.”—Jeremias 17:7, 8.

Tin-aw ang leksiyon. “Bisan unsay mahitabo,” matod ni Brader Lösch, “kinahanglan kamong mosalig kang Jehova.”

“Sundoga ang Matinumanong mga Manulonda”

Mao kini ang ulohan sa pakigpulong ni Stephen Lett, nga membro sa Nagamandong Lawas. Ang mga manulonda naghatag kanatog talagsaong panig-ingnan. “Ang tanan nga gibutyag sa Bibliya bahin kanila takos sundogon,” matod ni Brader Lett. Iyang gihisgotan ang upat ka hiyas sa matinumanong mga manulonda nga angay natong sundogon—ang ilang pagkamalahutayon, pagkamapainubsanon, pagkamatinabangon, ug ang ilang pagkamaunongon.

Giingon sa Bibliya nga ang usa ka manulonda misukol sa ‘prinsipe sa Persia’—usa ka gamhanang  demonyo—sulod sa 21 ka adlaw. (Daniel 10:13) Ang maong manulonda nagpakitag pagkamalahutayon. Ang mga Kristohanon usab “adunay pakigdumog . . . batok sa daotang mga puwersa nga espirituhanon,” matod ni Brader Lett. (Efeso 6:12) “Pakigbisog pag-ayo aron mabuhat ang inyong asaynment,” iyang giingnan ang mga estudyante.

Sa dihang si Manoa, ang amahan ni Samson, nangutana sa manulonda kon kinsay iyang ngalan, kini wala motug-an. Ang maong manulonda mapainubsanon. (Maghuhukom 13:17, 18) Gisultihan ni Brader Lett ang mga estudyante: “Kon dunay modayeg kaninyo o mobilib sa inyong mga abilidad, mapainubsanong ipunting ang pagtagad dili sa inyong kaugalingon, kondili ngadto kang Jehova ug sa iyang organisasyon.”—1 Corinto 4:7.

Sa dihang si Jesus didto sa tanaman sa Getsemane sa dayon na siyang mamatay, “usa ka manulonda gikan sa langit nagpakita kaniya ug nagpalig-on kaniya.” (Lucas 22:43) Kadto nga manulonda matinabangon. “Mainampoong tinoa kon unsa gayod ang mga panginahanglan diha sa inyong asaynment,” matod ni Brader Lett, “ug unya pinaagi sa tabang ni Jehova, hatagi kanag pagtagad.”

Sanglit dili daghan ang miduyog kang Satanas sa iyang pagrebelde, atong ikaingon nga kadaghanan sa mga manulonda nagpakitag talagsaong panig-ingnan sa pagkamaunongon.—Pinadayag 12:4.

“Sama niining matinumanong mga manulonda, sukli ang Yawa,” giawhag ni Brader Lett ang mga estudyante. “Sukli siya, ug siya mokalagiw.”—Santiago 4:7.

Tulo ka Ubang Hinungdanong mga Punto sa Programa

“Himoa si Jehova ingong Bato sa Inyong Kasingkasing.” Sa paghisgot niining makaiikag nga tema nga gipasukad sa Salmo 73:26, gitabangan ni Gary Breaux, membro sa Branch Committee sa United States, ang mga estudyante nga kinahanglang mosalig kang Jehova. Sa unsang paagi si Jehova sama sa usa ka bato? “Kon dunay bagyo, ang usa ka pirasong papel dili mapalid kon dat-ogan ug bato,” matod ni Brader Breaux. “Sa samang paagi, si Jehova maoy inyong kalig-on nga magpanalipod sa inyong kasingkasing.” Oo, ang kasingkasing mahimong magpahisalaag kanato sa dihang sulayan ang atong pagkamalahutayon. (Jeremias 17:9) Ang bag-ong klima, bag-ong pagkaon, bag-ong mga kauban diha sa pinuy-anan—ang bisan hain niini tingali maoy makapaundang sa usa. “May mga panahon nga kinahanglan kang mohimog mga desisyon,” matod ni Brader Breaux. “Pilion mo ba kon unsay makapahimuot kang Jehova? Kon imo kanang buhaton, si Jehova mahimong ‘bato sa imong kasingkasing.’ Siya magtultol sa imong mga lakang.”

“May Igo ka bang Pagtuo sa Pagtaak sa Imong Tiil sa Tubig?” Gitagik ni Sam Roberson, instruktor sa Gilead, kini nga tema pinasukad sa Josue kapitulo 3. Giunsa pagtabok sa minilyong mga Israelinhon ang Suba sa Jordan sa dihang kini mibaha? Gisugo ni Jehova si Josue nga ang mga saserdote ‘pabarogon sa Jordan.’ Ang Diyos misaad: “Sa dihang ang mga lapalapa sa mga tiil sa mga saserdote . . . mahitaak na sa tubig sa Jordan, ang tubig sa Jordan mohunong, . . . ug mopondo kini ingon sa usa ka diki.” (Josue 3:8, 13) Gisultihan ni Brader Roberson ang mga estudyante: “Mahimong dunay samag ‘mga Jordan’ sa inyong kinabuhi nga maoy makababag kaninyo sa pagbaton sa mga panalangin, kon inyo kining tugotan.” Pananglitan, tingali may mga hagit kon sa unsang paagi ikasinabot ang inyong kaubang mga misyonaryo. Unsay solusyon? “Tan-awa ang buluhaton, dili ang magbubuhat.” Gitambagan ni Brader Roberson ang mga estudyante: “Kon magpakita kamog pagtuo sa pagtaak sa inyong tiil sa tubig, tabangan mo ni Jehova sa pagtabok sa samag ‘mga Jordan’ sa inyong pagkinabuhi ingong misyonaryo.”

“Lig-ona ang Inyong mga Plano.” Kini ang ulohan nga gipahayag sa instruktor sa Gilead nga  si William Samuelson. Kini gibase sa Proverbio 16:3, nga nag-ingon: “Itugyan ang imong mga buhat kang Jehova ug ang imong mga plano mahimong lig-on.” Gisukna ni Brader Samuelson ang mga estudyante: “Kini ba nga teksto nagpasabot nga wala na kamoy himoon sa pagpalig-on sa inyong mga plano gawas sa ‘pagtugyan sa inyong mga buhat’ kang Jehova?” Dili, matod niya, kay ang Proverbio 16:1 nag-ingon: “Iya sa yutan-ong tawo ang mga paghan-ay sa mga laraw sa kasingkasing.” Siya midugang: “Si Jehova dili maghan-ay sa inyong kasingkasing sa milagrosong paagi. Hinunoa, kinahanglan kamong molihok sa hustong paagi. Pinaagi sa pagtuon, pag-ampo, ug pagpakigkomunikar kanunay sa sangang buhatan, padayon kamong makabatog kasingkasing nga mapuslanon gayod kaninyo, ug si Jehova mismo maglig-on sa inyong mga plano.”

Mga Kasinatian ug Interbiyo

Ingong bahin sa ilang pagbansay, ang mga estudyante sa Gilead mikuyog ug sangyaw sa lokal nga mga kongregasyon sa mga Saksi ni Jehova. Giinterbiyo ni Mark Noumair, lain pang instruktor sa Gilead, ang pipila ka estudyante bahin sa ilang mga kasinatian. Gipasiugda sa ilang mga kasinatian kon unsa ka hinungdanon ang pag-ampo sa pagpangitag matinud-anog kasingkasing nga mga tawo diha sa teritoryo.

Pananglitan, usa ka magtiayon ang nangaon sa restawran. Namatikdan sa usa ka trabahante nga sila nag-ampo. Giduol niya sila ug nangutana kon sila ba mga Saksi ni Jehova. Sa iyang pagkahibalo nga sila diay mga Saksi, ang trabahante miingon nga siya nagdako nga Saksi apan siya nahisalaag. Gani siya nakahimog salaod ug napriso. Karon kini nga batan-ong lalaki buot nang mobalik sa pag-alagad kang Jehova. Miingon usab siya nga sa wala pa mosulod ang magtiayon sa restawran, nag-ampo siya sa Diyos nga tabangan unta siyang mabag-o ang iyang kinabuhi. Gitubag ang iyang pag-ampo!

Sa iyang tema nga “Tilawi ug Tan-awa nga si Jehova Maayo,” giinterbiyo ni Rudi Hartl sa Writing Correspondence Department sila si Wayne Wridgway gikan sa Mozambique, Jason Reed gikan sa Chile, ug Kenji Chichii gikan sa Nepal. Silang tulo mga misyonaryo nga nabansay sa Gilead. Prangka nilang gisulti ang pipila ka hagit nga ilang naatubang ingong mga misyonaryo—ang pagkat-on ug bag-ong pinulongan, pagpasibo sa bag-ong kultura, o pagsagubang sa kamingaw. “Ang usa nga nakatabang kanamo mao ang pagpangita dayon ug mga higala diha sa bag-ong kongregasyon,” matod ni Brader Chichii. “Sa dihang nasuod kami sa kongregasyon, mas dali namong nabuntog ang kamingaw.”

Human gilayon nga nadawat sa 56 ka estudyante ang ilang diploma, gibasa sa usa kanila ang makapatandog nga sulat sa pagpasalamat. Sa bahin, kini nagpahayag ngadto sa Nagamandong Lawas: “Ingong usa ka klase, amo mismong nakita kon unsa ka dako ang inyong gugma ug paghago sa pagtagana kanamo niini nga kurso, pagduaw sa klase, ug paghatag ug maayong espirituwal nga instruksiyon. Tungod sa inyong gipakitang gugma kanamo, buhaton namo kutob sa among mahimo nga masundog ang inyong gugma, pailob, pagkamapainubsanon, ug personal nga interes kon kami atua na sa among mga asaynment.”

[Blurb sa panid 28]

“Kon dunay modayeg kaninyo . . . , ipunting ang pagtagad dili sa inyong kaugalingon”

[Blurb sa panid 29]

“Mahimong dunay samag ‘mga Jordan’ sa inyong kinabuhi”

 [Chart/Mapa sa panid 31]

ESTADISTIKA SA KLASE

9 ka nasod nga girepresentahan

56 ka estudyante

28 ka magtiayon

33.0 aberids nga edad

17.9 aberids nga tuig sukad sa bawtismo

13.3 aberids nga tuig sa bug-os panahong pag-alagad

[Mapa]

(Alang sa aktuwal nga pagkahan-ay, tan-awa ang publikasyon)

Ang mga estudyante giasayn sa 25 ka nasod nga gipakita sa ubos

MGA NASOD NGA GIASAYNAN

BOLIVIA

BOTSWANA

BULGARIA

CONGO (KINSHASA)

CÔTE D’IVOIRE

GAMBIA

GERMANY

INDIA

INDONESIA

KENYA

LIBERIA

MACEDONIA

MADAGASCAR

MALAYSIA

MOZAMBIQUE

PANAMA

PERU

POLAND

ROMANIA

SERBIA

SIERRA LEONE

SWAZILAND

TANZANIA

UGANDA

ZIMBABWE

[Hulagway sa panid 30]

Gipasundayag sa mga estudyante sa Gilead ang usa sa ilang mga kasinatian sa pagsangyaw

[Hulagway sa panid 31]

Ika-129 nga Klase nga Migraduwar sa Watchtower Bible School of Gilead

Sa listahan sa ubos, ang mga laray ginumerohan gikan sa atubangan ngadto sa likod, ug ang mga ngalan gilista gikan sa wala ngadto sa tuo sa matag laray.

(1) Munaretto, R.; Olofsson, Y.; Budden, K.; Najdzion, L.; Moya, G.; Treviño, G.; Dion, A.; Fleegle, A.

(2) Smith, J.; Michael Raj, J.; Smith, S.; Paramo, A.; McDonald, J.; Deans, M.; Joyal, S.; Watson, L.

(3) Joyal, C.; Crawley, T.; Hacker, D.; Shynkarenko, J.; Knapp, T.; Ayling, J.; Highley, C.; Olofsson, B.

(4) Fitzpatrick, M.; Najdzion, B.; Skallerud, L.; Harris, A.; Harris, S.; Budden, R.; Paramo, Y.; Skallerud, K.

(5) Crawley, B.; Michael Raj, J.; Lodge, A.; Lodge, R.; Herms, N.; Fitzpatrick, J.; Moya, R.; Munaretto, P.

(6) Watson, S.; Deans, M.; Hacker, J.; McDonald, J.; Treviño, J.; Harris, S.; Herms, C.; Harris, P.

(7) Shynkarenko, V.; Highley, T.; Smith, A.; Dion, J.; Ayling, R.; Smith, B.; Knapp, T.; Fleegle, B.