“Maalamon ang tawo nga nakakita sa katalagman ug nagtago sa iyang kaugalingon, apan ang walay kasinatian moagi ug magaantos sa silot,” nag-ingon ang Bibliya. (Proverbio 22:3) Kini maoy maalamong tambag nga mapadapat maylabot sa mga kalamidad. Kon may pasidaan bahin sa pagbuto sa bolkan, pagbaha, o umaabot nga bagyo, maalamon nga kadtong anaa sa lugar nga maapektohan niana mobakwet sa luwas nga dapit. Ang kinabuhi mas bililhon kay sa balay o ubang materyal nga mga butang.

Alang sa uban, posible tingaling dili mopuyo sa dapit nga peligroso kaayo. Ang usa ka awtoridad miingon nga pipila lang ka bahin sa yuta ang peligroso kaayo ug kadaghanan sa umaabot nga katalagman mahitabo niining mga dapita. Tinuod kini, pananglitan, sa ubos nga mga lugar daplin sa baybayon o sa mga dapit nga agianag linog. Kon posibleng dili ka mopuyo niining mga dapita o mobalhin ka sa mas luwas nga lugar, mamenosan gayod ang kapeligrohan nga makaagom kag katalagman.

Bisan pa sa tanang pagpanagana, posibleng mabiktima ka gihapon sa wala damhang katalagman. Mas makasagubang ka niana kon magplano ka nang daan. Nahiuyon sab kini sa tambag sa Proverbio 22:3 nga gikutlo na. May naandam ka bang emergency kit nga daling mabitbit? Ang publikasyong 1-2-3 of Disaster Education nagsugyot nga ilakip ang mosunod: Mga suplay sa first aid, binotelyang tubig, pagkaon nga dili daling mapan-os, ug importanteng mga dokumento. Maalamon sab nga hisgotan nimo uban sa imong pamilya ang matang sa katalagman nga posibleng mahitabo ug kon unsay angayng himoon.

Makatabang kini sa bisan unsang kahimtang. Ang Bibliya naghisgot sa Diyos ingong “ang Amahan sa malumong mga kaluoy ug ang Diyos sa tanang paghupay, kinsa nagahupay kanamo sa tanan namong kasakitan.” Ang laing bersikulo naghubit kaniya ingong ang Diyos “nga nagahupay kanilang gipaubos.”—2 Corinto 1:3, 4; 7:6.

Oo, ang Diyos nahibalo gayod kon unsay naagoman niadtong nagasalig kaniya. Siya maoy Diyos sa gugma ug naghatag ug pagdasig sa lainlaing paagi. (1 Juan 4:8) Ang mga pag-ampo, dili alang sa milagro kondili alang sa gamhanang balaang espiritu sa Diyos, makatabang sa bisan unsang kahimtang. Ang balaang espiritu makapahinumdom sa mga teksto sa Bibliya nga makapahupay niadtong nakaagom sa kalisdanan.  Oo, ang matinumanong mga alagad sa Diyos mobati sama kang David, usa ka hari sa karaang Israel, kinsa miingon: “Bisan kon magalakaw ako sa walog sa mabagang kangiob, ako walay kahadlokan nga daotan, kay ikaw magauban kanako; ang imong olisi ug ang imong sungkod maoy magapahupay kanako.”—Salmo 23:4.

Sa unang siglo, ang usa ka Kristohanong propeta nga si Agabo nag-ingon nga “usa ka dakong gutom ang taliabot sa tibuok gipuy-ang yuta; ug tuod man, nahitabo kini sa panahon ni Claudio.” Daghang tinun-an ni Jesus sa Judea ang naapektohan pag-ayo niini. Unsay gibuhat sa mga tinun-an sa ubang dapit sa dihang ilang nadunggan ang kahimtang sa ilang mga isigka-Kristohanon? Ang asoy nag-ingon: “Naninguha ang mga tinun-an nga ang matag usa kanila sumala sa iyang maarangan, makahimog pag-alagad pinaagig pagpadala ug hinabang ngadto sa mga igsoon nga nagpuyo sa Judea.” (Buhat 11:28, 29) Sila mahigugmaong misanong pinaagi sa pagtaganag hinabang.

Sa dihang mahitabo karon ang grabeng kalamidad, ingon usab niana ang sanong sa mga alagad sa Diyos. Ang mga Saksi ni Jehova nailhan nga motabang sa isigkamagtutuo. Pananglitan, sa dihang mihapak sa Chile ang usa ka kusog nga linog niadtong Pebrero 27, 2010, ang mga Saksi ni Jehova mitabang dayon sa mga naapektohan. Si Karla, kansang balay gibanlas sa tsunami, miasoy: “Makapahupay ug makapadasig nga pagkaugma dayon [ang mga isigka-Saksi] sa laing mga lugar nangabot aron tabangan mi. Sa way duhaduha, si Jehova naghupay namo pinaagi sa kaayo niadtong mga nagboluntaryo. Gibati nakong gihigugma ug gipanalipdan.” Ang iyang lolo, nga dili Saksi, nakamatikod sa tabang nga gihatag kanila. Siya miingon: “Lahi kaayo kini sa akong nakita sa akong simbahan sulod sa daghang katuigan.” Ang iyang nakita nakaaghat niya nga magtuon sa Bibliya uban sa mga Saksi ni Jehova.

Ang pagpakig-uban niadtong nahigugma sa Diyos makatabang gayod panahon sa kalisdanan. Apan moabot ba ang panahon nga wala nay katalagman? Atong susihon kon unsay giingon sa Bibliya bahin niini.