PANGUNANG TOPIKO | INTERESADO BA ANG DIYOS KANIMO?
Ang Diyos Nagkabig Kanimo
“Walay tawo nga makaari kanako gawas kon ang Amahan, kinsa nagpadala kanako, magkabig kaniya.”—JUAN 6:44.
KON NGANONG NAGDUHADUHA ANG UBAN: Daghan ang nagtuog Diyos pero mibating layo kaayo sila kaniya. “Giisip lang nako siya ingong Diyos nga naghimo sa tanang butang,” miangkon si Christina, nga taga-Ireland ug hinimba kada semana. “Pero wala gyod ko makaila niya. Wala ko sukad mobati nga suod niya.”
KON UNSAY GITUDLO SA PULONG SA DIYOS: Bisag mobati ta usahay nga layo ta sa Diyos, siya motabang gihapon kanato. Giilustrar ni Jesus kon unsa ta ka importante sa Diyos: ‘Kon ang usa ka tawo adunay 100 ka karnero ug ang usa niini mahisalaag, dili ba niya biyaan ang 99 diha sa kabukiran ug molakaw sa pagpangita sa usa nga nahisalaag?’ Ang leksiyon? “Sa susama dili tilinguhaong butang sa akong Amahan nga anaa sa langit nga malaglag ang usa niining mga gagmay.”—Mateo 18:12-14.
Bililhon kaayo sa Diyos ang matag “usa niining mga gagmay.” Sa unsang paagi ang Diyos ‘mangita sa usa nga nahisalaag’? Sumala sa teksto sa ibabaw niini nga panid, si Jehova magkabig sa mga tawo ngadto kaniya.
Kinsa ba karon ang nagaadto sa mga tawo sa ilang balay ug sa publikong mga lugar aron ipahibalo ang mensahe sa Bibliya bahin sa Diyos?
Matikdi ang gihimo sa Diyos aron makabig ang sinserong mga tawo. Sa unang siglo C.E., gisugo sa Diyos ang Kristohanong tinun-an nga si Felipe nga tabangan ang Etiopianhong opisyal nga nagsakayg karo nga masabtan ang kahulogan sa iyang gibasang tagna sa Bibliya. (Buhat 8:26-39) Sa ulahi, gisugo sa Diyos si apostol Pedro nga bisitahon ang Romanong opisyal nga si Cornelio sa iyang balay, kinsa nag-ampo ug gustong mosimba sa Diyos. (Buhat 10:1-48) Gitultolan sab sa Diyos si apostol Pablo ug ang iyang mga kauban nga moadto sa usa ka suba sa gawas sa siyudad sa Filipos. Ilang nakaila didto ang “magsisimba sa Diyos” nga si Lydia, ug ‘gibuksan ni Jehova ang iyang kasingkasing aron maminaw.’—Buhat 16:9-15.
Sa tulo ka kahimtang, giseguro ni Jehova nga mahatagag kahigayonan kadtong gustong makaila kaniya. Kinsa ba karon ang nagaadto sa mga tawo sa ilang balay ug sa publikong mga lugar aron ipahibalo ang mensahe sa Bibliya bahin sa Diyos? Daghan ang motubag, “mga Saksi ni Jehova.” Pangutan-a ang kaugalingon, ‘Gigamit kaha sila sa Diyos aron masuod ko kaniya?’ Gidasig ka namo nga moampo sa Diyos nga tabangan kang mosanong sa iyang mga paningkamot sa pagkabig kanimo ngadto kaniya. *
^ par. 8 Para sa dugang impormasyon, tan-awa ang video nga Nganong Tun-an ang Bibliya? sa www.mt1130.com/ceb.
Basin Ganahan Pod Ka
BAHIN KANAMO
Nganong Tun-an ang Bibliya?
Ang Bibliya nagtabang sa minilyong tawo sa tibuok kalibotan nga masayran ang tubag sa importanteng mga pangutana bahin sa kinabuhi. Gusto ba sab nimong masayran kini?
