Pagkasunod tuig, nag-artista ko, ug daghang higayon nga akoy bida sa mga salida. Gisulat sa mga reporter ang akong kinabuhi, gikuhaan kog hulagway sa mga photographer, ug gidapit ko sa matag unang pagpasalida sa mga pelikula, sa ribbon cutting, ug mga party. Kanunay kong sentro sa atensiyon.

Apan hinayhinay nakong naamgohan nga kini nga kinabuhi dili ingon ka nindot sa akong gidahom. Sagad nga delikado ang akong mga salida. Dili sama sa Hollywood, ang mga artista sa Hong Kong dili kaayo mogamit ug mga dobol. Pananglitan, ako mismo ang magpalupad sa motor ibabaw sa awto. Daghan kog gibidahan nga mga salidang imoral ug bayolente. Ang uban dunay demonismo.

Pagka-1995, naminyo kog prodyuser sa mga salida. Bisag daw naa nako ang tanan para ko malipay—pagkainila, bahandi, ug mahigugmaong bana—ako na-depress ug masulub-on. Mihunong ko sa pagkaartista.

Nalipay kong naghinumdom sa akong tinuohan niadtong gamay pa ko. Kaniadto, kada Sabado ming moadto ni Ate sa usa ka pamilyang Saksi ni Jehova. Ang ilang amahan nga si Joe McGrath magtudlo namog Bibliya kauban sa iyang tulo ka anak nga babaye. Ang ilang pamilya mahigugmaon, ug girespeto ni “Uncle Joe” ang iyang asawa ug mga anak. Ganahan sab kong makig-uban nila sa ilang Kristohanong panagkatigom. Usahay mangadto mig dinagko nilang asembliya. Malipayon kadto nga mga panahon. Mibati kong luwas kauban sa mga Saksi.

Sa kasukwahi, ngil-ad ang panghitabo sa among pamilya. Grabe ang kaguol ni Mama tungod sa pagkinabuhi sa akong amahan. Dihang mga 10 anyos ko, miundang si Mama sa pagpakig-uban sa mga Saksi ni Jehova. Nagpadayon ko pero dili kinasingkasing, ug nabawtismohan pag-edad nakog 17. Apan  sa wa madugay, ang akong panggawi dili na Kristohanon, ug wala na ko mahimong bahin sa kongregasyon.

Human sa among kasal, giduaw kog duha ka ansiyano sa kongregasyon sa mga Saksi ni Jehova. Gisultihan ko nila kon unsaon pagbalik kang Jehova nga Diyos, ug ilang gihikay nga tabangan kog misyonarya, si Cindy. Niining panahona, halos wala na koy pagtuo, busa giingnan nako si Cindy nga pamatud-an niyang tinuod gyong Pulong sa Diyos ang Bibliya. Gibasahan ko niyag mga tagna sa Bibliya nga nangatuman. Hinayhinay nga nagkasuod mi, ug misugot ko nga tun-an namo ang pangunang mga pagtulon-an sa Bibliya. Sa unang higayon, napabilhan nako nga si Jehova maoy Diyos sa gugma, ug gusto niyang magmalipayon ko.

Dihang mitambong na kog balik sa Kristohanong mga tigom, nakita nakong mas malipayon kong makig-uban sa mga Saksi kay sa mga tawo sa industriya sa pelikula. Pero tungod sa akong mga kasinatian sa bata pa ko, gibati nakong dili ko makasalig ni bisan kinsa, ug wa ko ganahi sa akong kaugalingon. Dihang may membro sa kongregasyon nga nagtudlo nako gikan sa Bibliya kon unsaon pagsagubang ni nga mga emosyon, natabangan ko ug nakakat-on sa paghimog tinuod nga mga higala.

Kami sa akong bana namalhin sa Hollywood, California, U.S.A. niadtong 1997. Didto mas nakatabang ko sa mga tawo nga makabenepisyo sa kaalam sa Pulong sa Diyos. Mas matagbawon ko sa pagtudlo bahin sa Bibliya kay sa akong pagkasikat ingong artista. Pananglitan, niadtong 2002, nagkita mi ni Cheri, daan nakong kaila sa Hong Kong. Halos pareho mig kasinatian sa kinabuhi. Nahimo pod siyang Miss Hong Kong, usa ka tuig nga una kanako. Gani, dihang nakadaog ko, siya ang nagkorona nako. Nag-artista pod siya ug dayon prodyuser sa mga salida, ug kauban niya sa mga proyekto ang iladong mga direktor. Mibalhin sab siya sa Hollywood.

Naluoy kaayo ko kang Cheri pagkahibalo nako nga namatay sa atake sa kasingkasing ang iyang pamanhonon. Wala siya mahupayi sa iyang relihiyong Budhista. Sama nako, nahimo sab siyang sikat nga maoy gipangandoy sa uban, apan masulub-on siya ug dili makasalig ug tawo. Akong gisulti kaniya ang akong nakat-onan sa Bibliya, pero wala siya makaapresyar niana tungod sa iyang pagka-Budhista.

Usa ka adlaw niadtong 2003, gitawgan kong Cheri samtang didto siya sa Vancouver, Canada, kay naghimo siyag pelikula. Malipayon siyang nagsugilon nga sa dihang nagdrayb siya nga layo sa siyudad ug nakadayeg sa talan-awon, kalit siyang nag-ampo nga kusog: “Sultihi ko, Kinsa ang tinuod nga Diyos? Unsa ang imong ngalan?” Nianang gutloa, nakalabay siyag Kingdom Hall ug nakita niya ang ngalang Jehova. Gibati niyang kadto ang tubag sa Diyos, ug gusto gyod dayon niyang mailaila ang mga Saksi ni Jehova. Gihikay nako kana, ug sulod lang sa pipila ka adlaw, mitambong siya sa tigom sa kongregasyon sa Vancouver nga nagsultig Chinese.

“Kining mga tawhana nahingawa gyod nako,” matod ni Cheri sa ulahi. “Makasulti ko nila sa akong gibati.” Nalipay kaayo ko niana kay sa dihang  artista pa si Cheri, wa siyay mga higala. Nagtambongan na si Cheri sa mga tigom. Pero pagka-2005, mipirma siyag kontrata isip prodyuser sa duha ka makasaysayanhong pelikula sa China, ug kinahanglan siyang mobalik sa Hong Kong. Makapalipay nga niadtong 2006, gidedikar ni Cheri ang iyang kinabuhi kang Jehova ug siya nagpabawtismo sa asembliya sa mga Saksi didto sa Hong Kong. Gusto unta niyang moalagad kang Jehova sa bug-os, pero tungod sa iyang trabaho sa industriya sa pelikula, siya nalisdan ug naguol kaayo.

Nabag-o ang situwasyon ni Cheri niadtong 2009. Mibiya siya sa industriya sa pelikula aron bug-os nga makaalagad kang Jehova. Daghan na siyag mga higala sa Kristohanong kongregasyon. Bug-os panahon na siya nga nagsangyaw sa maayong balita sa Gingharian ug malipayon kaayo nga nagtabang sa uban aron mahimong mas maayo ang kinabuhi.—Mateo 24:14.

Dayon, nagtuon si Cheri ug pinulongang Nepalese aron makasuportar sa nagkadakong grupo sa mga Saksi nga Nepalese didto sa Hong Kong. Ang mga Nepalese sa Hong Kong sagad nga mapasagdan o tamayon pa gani kay di kaayo sila makasultig Iningles o Chinese ug kay lahi silag mga kostumbre. Giingnan kong Cheri nga nalipay kaayo siya sa pagtabang nila nga makasabot sa Bibliya. Pananglitan, dihang nagsangyaw sa balay ug balay, nakahibalag siyag babayeng Nepalese nga nakahibalo gamay kang Jesus pero wa gyoy nahibaw-an bahin sa tinuod nga Diyos, si Jehova. Gipakita ni Cheri kaniya diha sa Bibliya nga si Jesus nag-ampo sa iyang Amahan sa langit. Pagkaamgo sa babaye nga puwede diay siyang moampo sa tinuod nga Diyos, kansang ngalan mao si Jehova, gidawat niya ang maayong balita. Wa madugay, nagtuon sab sa Bibliya ang iyang bana ug anak nga babaye.—Salmo 83:18; Lucas 22:41, 42.

Nakita nako nga malipayon kaayo si Cheri sa pagsangyaw sa bug-os panahon, busa nakaingon ko, ‘Nganong di man nako siya sundogon?’ Niining panahona, nagpuyo na kog balik sa Hong Kong. Akong giorganisar ang akong kalihokan aron bug-os kong makatudlo sa kamatuoran sa Bibliya. Akong naamgohan nga tinuod kong malipayon sa akong pagpaminaw sa mga tawo ug pagtabang kanila nga masabtan ang Pulong sa Diyos.

Pananglitan, gitudloan nakog Bibliya ang usa ka babayeng Vietnamese nga kanunay rang masulub-on ug maghilak. Karon positibo na siyag panglantaw sa kinabuhi ug malipayong nakig-uban sa kongregasyon.

Pareho ming Cheri nga nakakaplag ug mas maayo pa kay sa pagkainila. Bisag nalingaw ug nailado mi tungod sa industriya sa pelikula, mas makapatagbaw ang pagtudlo sa mga tawo bahin kang Jehova nga Diyos kay nakahatag nig kadayeganan kaniya. Makaingon gyod mi nga tinuod ang giingon ni Jesus: “Adunay labaw nga kalipay sa paghatag kay sa pagdawat.”—Buhat 20:35.