Unsay makatabang nimo aron malingaw ka sa imong pagbasa ug makabenepisyo niini? Tagda ang lima ka sugyot nga epektibo sa uban.

Pangitag maayong lugar. Pangitag lugar nga hilom. Ayaw pabalda sa bisan unsa aron dili ka malinga. Ang hayag ug hayahayng dapit makatabang aron makabenepisyo ka sa imong pagbasa.

Buksi ang imong hunahuna. Sanglit ang Bibliya gikan man sa atong langitnong Amahan, daghan kag makat-onan kon ang imong tinamdan samag usa ka bata nga andam mokat-on gikan sa mahigugmaong ginikanan. Kon negatibo kag panglantaw sa Bibliya, buksi ang imong hunahuna aron matudloan ka sa Diyos.​—Salmo 25:4.

Pag-ampo una pa mobasa. Nasulat diha sa Bibliya ang mga hunahuna sa Diyos, busa kita nagkinahanglan sa iyang tabang sa pagsabot niini. Ang Diyos nagsaad nga siya “mohatag ug balaang espiritu niadtong nagapangayo kaniya.” (Lucas 11:13) Ang balaang espiritu makatabang nimo sa pagsabot sa panghunahuna sa Diyos. Buksan niini ang imong hunahuna aron masabtan nimo “bisan ang lawom nga mga butang sa Diyos.”​—1 Corinto 2:10.

Pagbasa sa tuyo nga makasabot ka. Ayaw pagbasa sa tuyo nga basta lang makabasa. Palandonga ang imong gibasa. Pangutan-a ang imong kaugalingon: ‘Unsang mga kinaiya ang akong nakita diha sa tawo nga gihisgotan sa akong gibasa? Unsaon nako kini pagpadapat sa akong kinabuhi?’

Pagtakdag mga tumong. Aron makabenepisyo ka sa imong pagbasa sa Bibliya, tinguhaa nga duna kay makat-onan nga makapalambo sa imong kinabuhi. Pagtakdag mga tumong nga sama niini: ‘Gusto kong mahibalo pag dugang bahin sa Diyos.’ ‘Gusto kong mahimong mas maayong tawo, mas maayong bana o asawa.’ Unya pagpilig mga seksiyon sa Bibliya nga makatabang nimo sa pagkab-ot niana nga mga tumong. *

Kining lima ka sugyot makatabang aron makasugod ka pagbasa. Apan unsay imong buhaton aron mas makalingaw ang imong pagbasa? Ang sunod nga artikulo naghatag ug mga sugyot.