Sumala sa Bibliya, si Haring David sa Israel nabuhi sa ika-11ng siglo B.C.E. ug ang iyang mga kaliwat nagmando sa gatosan ka tuig. Pero may pipila ka kritiko nga nag-ingon nga ang estorya bahin kang David inimbento lang sa mga tawo katuigan sa ulahi. Tinuod ba nga tawo si Haring David?

Niadtong 1993, ang arkeologo nga si Avraham Biran ug ang iyang team nakadiskobre ug tipak sa bato sa Tel Dan, amihanang Israel, ug kini may sulat nga nagtumong sa “Panimalay ni David.” Ang maong mga pulong, nga naggamit ug karaang Semitikanhong mga letra, gisulat sa ikasiyam nga siglo B.C.E. Dayag nga tipak kini sa monumento nga hinimo sa mga Arameanhon, nga nagpasigarbo sa ilang kadaogan sa mga Israelinhon.

Ang usa ka artikulo sa Bible History Daily nag-ingon: “Dunay dili motuo sa sinulat nga ‘Panimalay ni David’ . . . Pero gidawat sa kadaghanang mga eksperto sa Bibliya ug mga arkeologo nga ang batong monumento sa Tel Dan naghatag ug unang lig-ong pamatuod nga tinuod nga tawo si Haring David, ug kini maoy usa sa pinakaimportante nga nadiskobrehan maylabot sa arkeolohiya sa Bibliya nga gireport sa BAR [Biblical Archaeology Review].”