Ebibi bikatandika omu nsi obu Sitaane yabihire omurundi g’okubanza. Sitaane akaba ari marayika murungi, konka ‘taragumire omu mazima.’ (Yohaana 8:44) Akenda ngu abantu bamuramye kandi Ruhanga wenka ari we oshemerire kuramibwa. Sitaane akabiha omukazi ow’okubanza, Eva, yatuma yamuhurikiza aho kuhurikiza Ruhanga. Adamu na we akakwatanisa na Eva omu kugomera Ruhanga. Eco kibi eki Adamu yakozire kikamuretera okubonabona n’okufa.​—Shoma omu Kutandika 3:1-6, 19.

Obu Sitaane yagambiire Eva ngu agomere Ruhanga, akaba yatandika kuhakanisa obushoborozi bwa Ruhanga bw’okutegeka, ninga ku ni we wenka Rukirabona. Abantu bingi bakakwatanisa na Sitaane omu kugomera Omutegeki Mukuru Ruhanga. Oko nikwe Sitaane yabire ‘omutegeki w’ensi.’​—Shoma omuri Yohaana 14:30; 1 Yohaana 5:19.

Ebi Ruhanga yahangire byona bikaba bihikirire. Abantu hamwe na ba marayika bakahangwa bine obushoborozi bw’okorobera Ruhanga omu bwijwire. (Eky’Ebiragiro 32:4, 5) Ruhanga akatuhanga twine obugabe bw’okweshariramu ebirungi ninga ebibi. Obwo bugabe nibutuma twayeshariramu kuhereza Ruhanga tubyekundire.​—Shoma omuri Yakobo 1:13-15; 1 Yohaana 5:3.

Yehova akareka abahakanisize obushoborozi bweye bw’okutegeka ngu bagumeho akire kake. Ahabw’enki? Akaba nayenda kwereka ku hatariho omuntu ondijo ori kubasa kutegeka abantu ngu besime.  (Omubuurizi 7:29; 8:9) Hahwire emyaka 6,000 abantu bari kwetegeka, kandi twayerebire ku baremirwe. Abategeki b’abantu bakaremwa kwihaho engamba, obwitani, okutwarizibwa kubi n’endwara.​—Shoma omuri Yeremia 10:23; Abarooma 9:17.

Obutegeki bwa Ruhanga nibutana n’obw’abantu, ahabw’okuba bwo niburetera emigisha abari kubwikiriza. (Isaaya 48:17, 18) Juba aha, Yehova nayija kwihaho obutegeki bw’abantu bwona. Abari kwikiriza obutegeki bwa Ruhanga ni bo bonka barije kutura omu nsi.—Isaaya 11:9.​—Shoma omuri Danieli 2:44.

Sitaane akagamba ngu tihine ori kubasa kukorera Yehova abyekundire. Mbehi niwe noyenda kwereka ku Sitaane ari omunyabishuba? Nobibasa! Okutegereza kwa Ruhanga nikutuma twena twayereka yaba turi kwenda ngu Ruhanga atutegeke ninga shi yaba turi kwenda abantu. Ebyo nitubyereka omu ku turi kubaho.​—Shoma omuri Yobu 1:8-12; Enfumu 27:11.

Nitubasa kwereka ku nitwenda ngu Ruhanga atutegeke turi kuronda okuramya kw’amazima okuri omu Kigambo ca Ruhanga, Bibuli. (Yohaana 4:23) Nitubasa kwereka ku tutari kwenda ngu Sitaane atutegeke turi kwanga kwekwatanisa omu by’obutegeki bw’ensi n’omu ntaro, nk’oku Yesu yakikozire.​—Shoma omuri Yohaana 17:14.

Sitaane ariyo nakoresa amani geye omu kwereka ku eby’obushambani n’ebindi bikorwa bibi byona ari birungi. Ku turi kwanga ebyo bikorwa bibi, banywani bitu n’abanyabuzare nibabasa kutushekerera n’okuturwanisa. (1 Petero 4:3, 4) Tushemerire kweshariramu. Mbwenu shi nitwija kwekwatanisa n’abari kukunda Ruhanga? Nitwija korobera ebiragiro byeye birungi kandi bitwinire omugasho? Ku turakikore, nituba twayereka ku Sitaane yabihire obu yagizire ngu tihine ori kubasa korobera Ruhanga yabugana ebizibu.​—Shoma omu 1 Bakorinso 6:9, 10; 15:33.

Ruhanga nayija kwihaho okubonabona kona ahabw’okuba nakunda abantu. Abari kubyesiga nibija kubaho ebiro byona omu nsi.​—Shoma omuri Yohaana 3:16.