OMU bwire bwa Bibuli omuhara ku yabire naza kutaha omu maka, eka yeye ekaba nehabwa enjugano. Omuntu akaba ari kubasa kujuga ebintu by’obuguzi bwingi, amatungo ninga shi esente. Nambwenu enjugano bakaba bari kuzihayo bari kukora emirimo nk’oku Yakobo yakikozire obu yikirize kukorera ishe wa Rasheli emyaka mushanju kugira ngu amuhingire muhara weye. (Kut 29:17, 18, 20) Ni eha ntego y’ezo njugano?

Omunyabwenge omu bya Bibuli ori kwetwa Carol Meyers akagamba ngu: “Enjugano bakaba nibaziha ab’omu ka y’omuhara ahabw’okuferwa omwana wabo owabire nabakwasa emirimo omu by’obuhingi.” Nambwenu enjugano ekaba netuma obunywani bw’eka y’omuhara n’eka eyi yabire yaza kuzamu bwaguma. Abari omuri ago maka bakaba nibabasa kuyambayambana omu bwire bw’ebizibu. Nambwenu enjugano zikaba nizereka ku omuhara bamukwasire kandi ku yabire arije kuruga omu bureberezi bwa ishe akaza kurebererwa n’abazire b’omushija.

Kujuga omuhara tikiri kumanyisa ngu wamugura. Ekitabo kimwe ekiri kushoborora eby’amaka kikagamba kiti: “Eki kiragiro c’okujuga omuhara, Abisirayeli b’omu bwire bwa kare bakaba nibakireba nk’okumugura. Konka enjugano ekaba etari ey’okumugura ahobwe kakaba kari akasimwe k’abazire.”

Omuri obu bwire omu mahanga gamwe na gamwe abantu bacayine ogo mucwe g’okutanga enjugano. Abazire b’Abakristo baza kushaba enjugano nibareka “okuringaniza kwabo” kumanywa n’abantu bona batari kushaba ezirengire obushoborozi bw’omushija. (Fil 4:5; 1 Kor 10:32, 33) Ku bari kukikora nibaba batayereka ku bari “abakunzi b’empiha” ninga shi abanyamururu. (2 Tim 3:2) Nambwenu abazire b’Abakristo ku bari kuringaniza batari kushaba omusigazi esente nyingi, nikituma yakora embaga juba atabandize yacerererwa ari kuronda enjugano. Ninga shi ogo mushija yaba ari omupayoniya tarije kubwemereza ngu akore obwire bwona kugira ngu atunge esente kujuga.

Omu mahanga gamwe, ni ekiragiro kutanga enjugano. Caba ariko kiri abazire b’Abakristo niborobera eco kiragiro. Ahabw’enki? Ekigambo ca Ruhanga nikishaba Abakristo “korobera abakama abari kutegeka” n’okorobera ebiragiro ebitari kushisha emisinge ya Ruhanga.—Rom 13:1; Byak 5:29.