1. Pwata a weires ach sipwe silei met weween án emén erá pwe a omusakicheló?

 “ÚA OMUSAKOLÓ.” A ifa me ekinamween ach rong án emén erenikich ena kapas ákkáeúin iká sia silei pwe sia apasa are féri och mettóch mi ámeteki emén! Nge lape ngeni a weires ach sipwe silei weween án emén erá a omusakicheló. Eli an erá ena a wewe ngeni pwe sipwe chúen chiechiéchfengen. Are eli a wewe ngeni pwe ese pwal chúen mochen fós ussun met ewe a fis, nge ach chiechifengen esap chúen ussun me mwan. A sókkopat weween án aramas erá ei kapas, “úa omusakoló.”

2. Ifa ussun Paipel a áweweei napanapen án Jiowa omusaaló tipis? (Pwal ppii ewe footnote.)

² Napanapen án Jiowa omusaaló tipisin kich aramas sise unuséch, a fókkun sókkóló seni napanapen ach omusaaló tipisin ekkewe ekkóch. Ese wor e tori Jiowa lón napanapen an omusaaló tipis. Iei met ewe soumakken kélfel a erá ussun Jiowa: “En ka enletin omusaaló tipis, iwe aramas repwe fókkun súfélituk.” a (Kölf. 130:​4, NW) Ewer, Jiowa a “enletin omusaaló tipis,” ina napanapen an omusaaló tipisin aramas. I a isettiw leenien áppirú ren an pwáári wesewesen weween omusaaló tipis. Lón ekkóch wokisin lón ewe Tesin Ipru, ekkewe chón mak ra áweweei napanapen án Jiowa omusaaló tipis ren ar néúnéú eú kapas rese fókkun nénnéúnéú lón  ar áweweei napanapen án aramas omusaaló tipis.

3. Ifa ussun a sókkóló napanapen án Jiowa omusaaló tipis seni ach? (Aisea 55:​6, 7)

³ Atun Jiowa a omusaaló tipisin emén, a unusen télaaló tipisin. Sia fókkun kilisou ren án Jiowa unusen omusaaló tipisich fán fite.—Álleani Aisea 55:​6, 7.

4. Ifa ussun Jiowa a álisikich le weweiti weween enletin omusaaló tipis?

⁴ Iká a sókkóló napanapen án Jiowa omusaaló tipis seni ach omusaaló tipis, iwe ifa ussun kich aramas tipis sipwe tufichin weweiti weween enletin omusaaló tipis? Jiowa a álisikich le weweiti ren an néúnéú ekkóch kapas áwewe mi álilliséch pwe sipwe weweiti ifa ussun a omusakicheló. Lón ei lesen, sipwe ppii ekkóch me leir. Epwe áiti ngenikich pwe atun sia áier, Jiowa a télaaló tipisich kewe me atufichikich ach sipwe chiechiéchsefál ngeni i. Atun sipwe káé ekkena kapas áwewe, epwe lapóló ach aúcheani úméúméchún Semach we, ewe mi omusaaló tipisin aramas lón chómmóng napanap.

JIOWA A WESEWESEN TÉLAALÓ TIPIS

5. Met a fis atun Jiowa a omusaaló ach kewe tipis?

⁵ Fán chómmóng, Paipel a aléllééi tipis ngeni och mettóch mi chou sia mwárei. King Tafit a áweweei tipisin kewe ren an erá: “Üa pwölüla fän ai kewe föför mi ngau, ra chou usun och mettoch mi kon chou ngeniei.” (Kölf. 38:4) Nge Jiowa a omusaaló tipisin chókkewe mi áier. (Kölf. 25:18; 32:5) Ewe kapasen Ipru mi áweweei ewe kapas “omusaaló tipis,” a wewe ngeni “epichaaló” are “uwealó.” Iwe atun Jiowa a omusaaló ach kewe tipis, a epichaaló are uwealó ach choun mengiringirin tipis. Ussun itá a angei senikich osach mi chou sia mwárei.

6. Ifa úkúúkún án Jiowa atowawaaló ach kewe tipis?

⁶ Paipel a pwal néúnéú eú kapas áwewe pwe epwe pwáári úkúúkún án Jiowa atowawa senikich ach kewe tipis. Kölfel 103:​12, Kapasen God a erá: “Ussun towawen ötiw seni notou, ina chok ussun an epwe atowawano ach tipis seni kich.” Éétiw a fókkun towaw seni notou, me rese fókkun tongeni chufengen. Weween, Jiowa a fókkun atowawaaló ach kewe tipis senikich. Ena mettóch a oururukich pwe Jiowa a unusen omusakicheló!

7. Ifa ussun ewe Paipel a áweweei met Jiowa a féri ngeni ach kewe tipis? (Mika 7:​18, 19)

⁷ Inaamwo iká Jiowa a atowawaaló tipisich kewe, nge itá a kan chék chechchemeni tipisich kana? Aapw. Iei met King Esekaia a makkeei ussun Jiowa: “Ai kewe tipis meinisin ka pöütala lükisökurum.” (Ais. 38:​9, 17) A wewe ngeni pwe Jiowa a oturaaló tipisin chókkewe mi áier me ese pwal nesékúrúitiir. Ena itiitin a pwal tongeni wewe ngeni: “Ka féri pwe ussun itá [ái kewe tipis] rese mwo nge fis.” Ewe Paipel a pwal menlapei ena ren an néúnéú eú pwóróus mi mak lón Mika 7:​18, 19. (Álleani.) Ekkena wokisin ra erá pwe Jiowa a maneló tipisich kewe lealóllóólun lemataw. Lón fansoun lóóm, esap fókkun tufich ach sipwe kúnasefáli och mettóch a turutiw lealóllóólun lemataw.

8. Met sia fen káé?

⁸ Ewe Paipel a affataéchú pwe atun Jiowa a omusakicheló, a unusen otur senikich tipisich kewe, iwe ese pwal lamot ach sipwe choutiw ren mengiringirin tipis. Ewer, ussun met Tafit a erá pwe “ra pwapwa chókkewe ar kewe féffér mi fókkun ngaw a musoló, me chókkewe ar kewe tipis a télúló, a pwapwa ewe aramas, ewe Jiowa esap álleani an  kewe tipis.” (Rom 4:​7, 8) Ina ewe sia kan erá enletin omusaaló tipis!

JIOWA A WESEWESEN LIMETALÓ TIPIS

9. Ifa ussun ewe Paipel a álisikich le silei pwe Jiowa a unusen omusakicheló?

⁹ Ren ewe méén kepich, Jiowa a tongeni limetaló tipisin chókkewe mi áier. Nengeni ifa ussun ewe Paipel a áweweei met Jiowa a féri. Sia álleani lón ewe Paipel pwe Jiowa a télaaló me limetaló ekkena tipis. Iwe, ewe mi tipis epwe limeliméchúló me mwirin. (Kölf. 51:7; Ais. 4:4; Jer. 33:8) Jiowa a pwisin áweweei met epwe fis mwirin ena. A erá: “Oua limengau ren tipis usun eman a limengau ren cha. Nge ngang üpwe limetikemi pwe oupwe limöch usun pwechepwechen sno. Inamwo are oua limengau usun mangaku mi fötöpwül, oupwe fokun limöch.” (Ais. 1:18) A mmen weires ach sipwe télaaló och limengaw mi par wóón och mangaak. Jiowa a áeá ena kapas áwewe ren an epwe alúkúlúkú ngenikich pwe ach kewe tipis ra tongeni wessen liméchúló pwe ussun itá sisap mwo nge tongeni kúna.

10. Ifa ussun ewe Paipel a áweweei ussun úméúméchún Jiowa le omusaaló tipisich?

¹⁰ Ussun met sia káé lón ewe lesen mwen ei pwe tipis a ussun liwinimmang. (Mat. 6:12; Luk 11:4) Iwe, ach liwinimmang a wakkateeló iteiten sia tipis ngeni Jiowa. A watte ach liwinimmang ngeni! Nge atun Jiowa a omusakicheló, ussun itá nge a oturaaló ach liwinimmang ngeni. Ese pwal eriánikich ach sipwe watiw liwinin ekkewe tipis ra fen musoló. Sia pwapwa atun Jiowa a omusakicheló, ussun chék pwapwaan emén atun a kóturuló an kewe liwinimmang.

11. Met weween án Paipel erá pwe a “télúló” ach kewe tipis? (Féffér 3:19)

¹¹ Jiowa ese chék oturaaló ach kewe liwinimmang, are tipis, nge a fen télúúreló. (Álleani Féffér 3:19.) Atun a kóturuló eú liwinimmang, eli sia anchangei án emén krosuni ekkewe nampa mi affata úkúúkún ena liwinimmang. Iwe nge, a chúen tongeni pwá ekkena nampa mi krosuló. Iwe, ach télaaló och mettóch, a sókkóló seni ach chék krosuni. Ren ach sipwe weweiti ena, sipwe chemeni pwe ewe sókkun ink are minen mak aramas ra kan áeá lón fansoun lóóm, a tongeni mwittir télúló. Emén a chék tongeni angei och téttél mi chéchchén me télú ngeni ena mak. Ina pwata atun a “télúló” eú liwinimmang, a wessen télúffóch. Aramas resap tongeni kúna met ewe a fen mak akkomw, ussun itá ese fókkun wor ena liwinimmang. A ifa me kilisouch ren ach silei pwe atun Jiowa a omusaaló ach kewe tipis, ussun itá nge sise fókkun féri!—Kölf. 51:9.

12. Met sia káé seni ewe kapas áwewe ussun ewe kuchu mi maanún?

¹² Jiowa a néúnéú pwal ena esin kapas áwewe le áweweei ifa ussun a télaaló ach kewe tipis. A erá: “Üa amorala om tokotokongau usun eu kuchu, pwal om tipis kana usun och ötüöt.” (Ais. 44:22) Atun Jiowa a omusaaló ach tipis, ussun itá a áeá eú kuchu mi maanún le opereló pwe sisap tongeni kúner.

13. Met meefiach atun Jiowa a omusaaló ach kewe tipis?

¹³ Met ekkewe kapas áwewe ra áiti ngenikich? Atun Jiowa a omusaaló ach kewe tipis, sisap chúen mengiringir rer lón unusen manawach. Chchaan Jises Kraist a fen unusen oturaaló ach kewe tipis. Atun Jiowa a omusaaló eú tipis, ussun itá nge sise fen féri ena tipis. Ina weween án Jiowa enletin omusaaló tipis. Epwe fis ena, atun sia áier seni ach kewe tipis.

 JIOWA A ETIWAKICH LE CHIECHISEFÁL NGENI

14. Pwata sia tongeni lúkúlúk pwe Jiowa epwe unusen omusakicheló? (Pwal ppii ekkewe sasing.)

¹⁴ Atun Jiowa a omusakicheló, sia tongeni lúkúlúk pwe sia chiechisefál ngeni. Pokiten Jiowa a unusen omusakicheló, iwe ese pwal chúen lamot ach sipwe meefi mengiringir. Ese pwal chúen lamot ach sipwe pireir pwe Jiowa a chúen song rech me a kútta alen an epwe apwúngúkich. Esap fókkun fis ena. Atun Jiowa a erá pwe a omusakicheló, sia tongeni lúkú ena. Jiowa a ereni ewe soufós Jeremaia: “Üpwe amusala ar föföringau, nge üsap chüen chechemeni ar tipis.” (Jer. 31:34) Paul a pwal néúnéú ena itiitin kapas lón makkeian we, a apasa: “Úsapw chúen chemeni tipisiir kewe.” (Ipru 8:12) Nge met wesewesen weween ena?

15. Met weween án Jiowa esap chúen chechchemeni ach kewe tipis?

¹⁵ Lón ewe Paipel, esap iteitan ewe itiitin kapas “chemeni,” a wewe ngeni án emén chemenisefál och mettóch a fis are ekkekieki ussun. Nge a tongeni wewe ngeni án emén féri och mettóch. Ewe chón féfféringaw mi eitiwetá únúkkún Jises, a tingor: “Jises, kopwe chechchemeniei atun kopwe tolong lón Mwuum.” (Luk 23:​42, 43) Ese wewe ngeni pwe a tingorei Jises an epwe ekieki ussun i lón ena atun. Minne Jises a pélúwen ngeni, a pwáári pwe epwe amanawaatá. Iwe, atun Jiowa a erá pwe esap chúen chechchemeni ach kewe tipis, a wewe ngeni pwe a fen omusakicheló me esap féri met epwe apwúngúkich ren lón mwachkkan ren ekkena tipis sia féri.

16. Ifa ussun ewe Paipel a áweweei ewe ngaseló sia meefi seni án Jiowa enletin omusaaló tipisich?

¹⁶ Ewe Paipel a pwal néúnéú eú kapas áwewe ren an epwe álisikich le weweiti ewe sókkun memmeefin ngaseló atun Jiowa a enletin omusaaló ach kewe tipis. Paipel a erá pwe pokiten sise unuséch, iwe ussun itá sia “slave ngeni tipis.” Nge kilisou pwe atun  Jiowa a omusakicheló, sia “ngaseló seni tipis.” (Rom 6:​17, 18; Pwár. 1:5) Atun sia silei pwe Jiowa a fen omusakicheló, sia tongeni pwapwa ussun chék pwapwaan emén slave mi ngas seni fétek.

17. Ifa ussun Jiowa a echikarakich lón kapas áwewe? (Aisea 53:5)

¹⁷ Álleani Aisea 53:5. Ewe Paipel a erá pwe pokiten kich chón tipis, iwe ussun itá a úrikich eú semmwen sia tongeni máló ren. Pokiten ewe méén kepich Jiowa a awora ren Néún we, ussun itá a echikarakichetá lón kapas áwewe. (1 Pit. 2:24) Atun sia tipis, sia atai ach we riri lefilach me Jiowa, nge pokiten ewe méén kepich, a tongeni omusakicheló me sia tongeni ririéchsefál ngeni. Ussun chék pwapwaan emén mi chikar seni eú semmwen mi chou, sia pwal fókkun pwapwa atun sia tongeni ririéchsefál ngeni Jiowa me kúnasefál an chen.

MET MEEFIOM REN ÁN JIOWA OMUSAALÓ TIPIS?

18. Met sia káé seni ekkewe kapas áwewe lón Paipel ussun án Jiowa omusaaló tipis? (Pwal ppii ewe pwóór “Ussun án Jiowa Omusaaló Tipisich.”)

¹⁸ Met sia káé seni ekkewe kapas áwewe lón Paipel ussun án Jiowa omusaaló tipisich? Atun a omusaaló tipisich, ussun itá nge sise mwo nge féri fán eú ena tipis, me sia tongeni lúkúlúk pwe esap ngenikich chappen ach na tipis lón fansoun mwach. Ena mettóch a atufichi ach sipwe eáni eú ririéch lefilach me Semach we lón láng. Iwe nge, sia silei pwe ach kúna omusomusen ach tipis seni Jiowa, ina eú liffang a fang ngenikich pokiten an tongekich me kisáséú ngenikich, nge esap pokiten a fich ngenikich.—Rom 3:24.

19. (a) Met sipwe fókkun kilisou ren? (Rom 4:8) (b) Met sipwe káé lón en lesen mwirin?

¹⁹ Álleani Rom 4:8. Sia fókkun kilisou pwe Jiowa i ewe Kot mi “enletin omusaaló tipis”! (Kölf. 130:​4, NW) Iwe nge iká sia mochen án Jiowa epwe omusakicheló, iwe a lamot ach sipwe féri eú mettóch mi aúchea. Nengeni met Jises a erá: “Iká ouse omusaaló án aramas tipis, Sememi we esap pwal omusaaló tipisimi.” (Mat. 6:​14, 15) Ina popun a fókkun lamot ngenikich ach sipwe áppirú án Jiowa omusaaló tipis. Nge ifa ussun sipwe féri ena? En lesen mwirin epwe áiti ngenikich ifa ussun.