Úa uputiw lón 1927 lón eú kúkkún sóópw mi kkan ngeni Chicago, Illinois lón Merika. Ám nimmén néún Papa me Mama. Jetha, Don, ngang, Karl, me Joy. Ám meinisin áúa fókkun úppós le angang ngeni Jiowa ren unusen manawem. Jetha a fiti ewe oruuen Sukulen Gilead lón ewe 1943. Don a angang Bethel lón Brooklyn, New York, lón ewe 1944, nge Karl a poputá lón ewe 1947, nge Joy lón ewe 1951. Ar leenien áppirú mi múrinné me pwal án semei kewe me inei, a fókkun apéchékkúlaei le alapaaló ái angang ngeni Jiowa.

Papa me Mama ra kan sani le álleani ewe Paipel me ra tongei Kot, iwe ra áiti ngenikem ám áúpwe pwal tongei Kot. Iwe nge, Papa ese chúen aúcheani lamalam mwirin an fiti angangen soufiu lón Iurop atun ewe Áeúin Maunen Fénúfan. Mama a fókkun kilisou ngeni Kot pwe Papa a liwinitikem lón an manaw mwirin ena maun. Ina minne, Mama a ereni Papa: “Karl, sa ló fál ussun chék met sia kan féfféri me lóóm.” Papa a ereni: “Úpwe chék fitukoló ikena, nge úsapw tolong.” Iwe Mama a eisini: “Pwata?” A pélúweni: “Atun ewe maun, ekkewe néúwisin lamalam iir seni chék eú sókkun lamalam, ra efeiéchú néúr kewe soufiu mi ú fengen lón ewe maun. Itá ié me leir Kot epwe peni?”

Mwirin, atun Mama a nóm lón fál, rúúemén Chón Pwáraatá Jiowa ra etto lón imwem we. Ra ngeni Papa ruu puk, itelaper Light, ewe mi masou ren pwóróusen ewe puken Pwáraatá. Papa a sani ena puk, iwe a angei. Atun Mama a kúna ena puk, a poputá le álleani. Mwirin, eú rán a kúna eú esilesil lón eú simpung mi etiwa ién mi pwapwaiti le káé ewe Paipel ren álillisin ena puk itan, Light. Iwe, Mama a feiló. Atun a wareiti ena leeni, emén fefin mi watte seni a suuki ewe asam. Mama a kamwéchútá eú me lein ekkena puk, me eis: “Oua kan néúnéú ei puk ikeei?” A pélúweni: “Ewer, tolong.” Lón ewe wiik mwirin, Mama a uweikem me pwii kewe me fefinei, iwe mwirin ena, áúa kan fiffiti iteiten wiik.

Atun eú mwiich, ewe chónemmwen a ereniei ái úpwe álleani Kölfel 144:​15, ewe mi apasa pwe chókkewe mi fel ngeni Jiowa, ra pwapwa. Úa sani ena wokisin, me pwal 1 Timoty 1:​11, ewe mi apasa pwe Jiowa “ewe Kot mi pwapwa,” me pwal Efisus 5:​1, ewe mi pesekich ach sipwe “áppirú Kot.” Úa  mirititi pwe a lamot ái úpwe pwapwa le angang ngeni ewe Chón Fériei, me kilisou ngeni ren ái tufichin angang ngeni. Ikkena ekkewe ruu mettóch úa fókkun achocho le féri lón unusen manawei.

Ewe mwichefel mi kkan ngenikem, a nóm 20 mwail lón Chicago. Iwe nge áúa fiti, me ái silei ussun ewe Paipel a lallapoló. Úa chemeni lón eú mwiich án ewe chónemmwen kéri Jetha an epwe memmeef. Atun úa rong meefian, úa ekieki: ‘Úa silei ena. Itá fen ngang úpwe wisen eitietá pei me memmeef.’ Úa poputá le ammólnatá me féri pwisin ái memmeef. Nge met a kon aúchea seni ena, pwe ám meinisin me pwii kewe me fefinei áúa mámmááritá lón pekin ngún. Úa papatais lón ewe ier 1941.

Úa ákkáeúin chemeni ewe mwichelap lón ewe 1942 mi fis lón Cleveland, Ohio. A wor lap seni 50 leeni lón fénúen Merika ra fiti ren ar aúseling wóón phone. Ám we famili fengen me pwal ekkewe ekkóch famili áúa nóm lón ekkewe tento kkan ngeni ewe leeni a fis ie ewe mwichelap. Lón ena atun, a fiffis ewe Oruuen Maunen Fénúfan me a lallapoló angangen eriáfféú ngeni Chón Pwáraatá Jiowa. Lón eú pwinin, úa kúna án chienach kewe mwán parkini waar kewe tarakú nge tengkiir kewe ra sape seni imwem kewe tento. Iir meinisin ra tipeeú ngeni an epwe wor emén lón meinisin ekkena tarakú pwe repwe wisen mmas unusen ena pwiin. Iká epwe wor osukosuk, ekkena Chón Kraist repwe onnei ekkewe tengkiin mwan pwe ekkewe chón mochen efeiengaw repwe mammasaroch, me repwe pwal eppipiir pwe epwe wor chón etto álillis. Úa ekieki, ‘Néún Jiowa kewe aramas ra mmólnéch fán iten mettóch meinisin!’ Ese fis osukosuk, me pokiten úa meefi núkúnúkéch, iwe úa kinamwe le annut.

Fitu ier mwirin atun úa ekieki ussun ena mwichelap, úa mirititi pwe inei we ese fókkun aúrek are niwokkus. A unusen lúkúlúk wóón Jiowa me an we mwicheich. Úsapw fókkun ménúkaaló an leenien áppirú mi múrinné.

Me mwen ena mwichelap, Mama a fiti angangen regular pioneer. Ina popun a fókkun aúselingéch ekkewe afalafal mi fós ussun angangen full-time. Atun áúa ssá ngeni imwem we, a apasa, “Úa mochen sópweeló le pioneer nge úse tongeni féri ena me pwal túmúnú imwach we.” Ina minne a eisinikem iká áúa tongeni álisi. Áúa apasa ewer. Ina popun a ewisa ngeni emén me emén ám áúpwe wisen limeti eú are ruu ruumw me mwen mwéngéén lesossor. Mwirin ám áúa ló sukul a kan cheki iká a liméch imwem we, iwe a ló afalafal. I emén fefin mi chómmóng an angang, nge ese fókkun túmúnúngaw ngenikem. Atun áúa liwiniti leimw pwe áúpwe mwéngéén leolowas, me atun áúa ssár, a kan witikem. Fán ekkóch sárin ám sukul áúa fiti le afalafal, ewe mettóch mi álisikem le weweiti wisen emén pioneer.

Úa poputá le pioneer atun a 16 ieri. Inaamwo iká semei we esaamwo wiliiti emén Chón Pwáraatá, nge a kan mochen silei pwóróusen ái angangen afalafal. Lón eú pwinin, úa ereni pwe inaamwo iká úa fókkun achocho, nge úse mwo kúna emén mi mochen káé Paipel. Mwirin ái ekis fanafaneló, úa eisini, “Ka mochen ái úpwe káé ngonuk?” A mwo ekis ekieki, nge mwirin a tipeeú ngeni.  Ewer, semei we, i ákkáeménún nei chón káé. Ina eú mettóch mi fókkun aúchea me rei.

Áúa káé ewe puk “The Truth Shall Make You Free.” Lón ám kákkáé, úa mirititi pwe semei we a álisiei ái úpwe émúrinnéló ái káé ewe Paipel me lipwákéch le asukula ngeni aramas. Áwewe chék, lón eú pwinin mwirin ám álleani eú parakraf, i a apasa: “Úa kúna met ena puk a apasa. Nge ifa ussun ka silei pwe mi pwúng alon ena puk?” Úse mmólnetá ngeni an na kapas eis, ina popun úa apasa: “Úse tongeni ánneta ngonuk iei, nge iká sia pwal káésefál, úpwe tongeni erenuk pélúwan.” Iwe, ina met úa féri. Úa kúna ekkewe wokisin mi álisaatá ewe pwóróus áúa káé. Mwirin ena, úa káé ifa ussun úpwe research pwe úpwe mmólnetá ngeni ám káé mwirin. Ena mettóch a álisiei ái úpwe feffeitá lón pekin ngún me a pwal álisi semei we. A apwénúetá met a káé me a papatais lón ewe ier 1952.

Úa ló seni imwei we atun a 17 ieri. Jetha a a fiti angangen misineri, nge Don, a angang Bethel. Iir me rúúemén ra mmen sani ar kana angang, me ena mettóch a fókkun apéchékkúlaei. Ina minne, úa apply ngeni angangen Bethel me pwal Sukulen Gilead, me úa chék likit ngeni Jiowa an epwe wisen fili. Met mwirilóón? Úa ketiw ngeni Bethel lón ewe ier 1946.

Ren fitu ier, a chómmóng ekkewe sókkopaten angang úa kewis le féri lón Bethel, ina popun úa tongeni káé chómmóng mineféén mettóch. Úa nóm Bethel úkúúkún 75 ier, iwe lón ekkena ier, úa káé ái úpwe printini ekkewe puk me pwal túmúnú pekin accounting. Úa pwal káé ifa ussun úpwe kamé ekkewe mettóch mi lamot ngenikem lón Bethel, me ifa ussun úpwe tiinaaló ngeni pwal ekkóch leeni ekkewe mettóch mi aúchea. Nge lap seni meinisin, úa pwapwaiti ekkewe kókkótun káé mi fiffis lón Bethel atun ewe lesenin rán me pwal ekkewe afalafal mi lóngólóng wóón Paipel.

Úa pwal káé seni pwii we kúkkún itan Karl, ewe a pwal ketiw ngeni Bethel lón ewe 1947. I emén chón káé Paipel me chón asukul mi múrinné. Fán eú, úa tingorei an epwe álisiei ren eú afalafal úa kewis ngeni. Úa áweweei ngeni Karl pwe úa ochufengenni chómmóng pwóróus nge úse silei ifa ussun úpwe néúnéú. A álisiei ren an eáni eú kapas eis, “Joel, ifa itelapen óm na afalafal?” Úa mwittir weweiti met ewe e mochen apasa. A lamot úpwe chék áeá ekkewe pwóróus mi weneiti itelapen ái we afalafal nge likitaaló ekkewe lusun. Ese fókkun ménúk seniei met a áiti ngeniei.

Ren ach sipwe pwapwa lón ach angang lón Bethel, a lamot sipwe achocho úkúúkún ach tufich  le fiti ewe angangen afalafal. Iká sia féri ena, epwe wor pwóróusach mi apéchékkúl. Eú pwóróus úa fókkun chemeni, ina met a fis lón eú pwinin lón Bronx lón New York City. Ngang me pwal emén chienach mwán áúa ló chuuri emén fefin mi piin angei ekkewe Watchtower me Awake! Áúa ereni item me apasa, “Lón ei pwinin áúa álisi aramas le káé ekkewe pwóróus seni Paipel mi apéchékkúl.” Neminna a erá, “Iká oupwe pwóróus ussun ewe Paipel, iwe o tolong.” Áúa álleani me pwóróusfengen wóón fitu wokisin mi fós ussun án Kot we Mwú me ewe ótót séfé epwele fis. A mwaar ren met a rong, ina popun a etiwa chómmóng chienan ar repwe fitikem le káé lón ewe wiik mwirin. Ekiseló mwirin, iir me pwúlúwan we ra wiliiti néún Jiowa chón angang mi túppwél.

Úa filaatá pwe úpwele pwúpwúlú. Iwe engol ier mwirin, úa kúnékún pwúlúwei. Met a álisiei ái úpwe kúna emén pwúlúwei mi múrinné? Úa iótek ngeni Jiowa me ekieki ussun met áúa mochen féri mwirin ám pwúpwúlú.

Iwe mwirin ena, lón ewe ier 1953 lón ewe mwichelap lón ewe Yankee Stadium, úa chuuri emén Chón Kraist fefin itan Mary Aniol. Iir me Jetha ra fiti ewe oruuen Sukulen Gilead, me ra pwal mwin lón ar angangen misineri lón eú leeni. Mary a fókkun mwasangasang le apwóróusato pwóróusen an angangen misineri lón Caribbean me ekkewe chón káé i a fen kákkáé ngeniir. Atun áúa sissilefengenikem, áúa mirititi pwe a chék taitap met áúa mochen féri, ina ám mochen angang ngeni Jiowa full-time. A lallapoló ám tongfengen, iwe áúa pwúpwúlú lón April 1955. A pwá lón chómmóng mettóch pwe Mary i liffangei me ren Jiowa, me i eú leenien áppirú mi múrinné. A pwapwa le féri ese lifilifil met a kewis ngeni. I emén mi angang weires, enletin chúngú aramas, me fansoun meinisin a kan akkomwa ewe Mwú. (Mat. 6:33) Ren úkúúkún úlúngát ier, áúa fiti ewe angangen sáifetál me chuuri ekkewe mwichefel, iwe lón 1958, áúa ketiw ngeni Bethel.

Úa káé chómmóng mettóch seni Mary. Áwewe chék, atun áúa kerán pwúpwúlú, áúa filaatá ám áúpwe kan álleafengen ewe Paipel. Iwe áúa kan álleani ina epwe 15 wokisin fán eú. Mwirin án emén leim álleani eú kinikin, áúa kan uwawu meefiem wóón ekkewe wokisin me áweweei ifa ussun áúpwe apwénúetá lón manawem. Fán chómmóng, Mary a kan pwal apwóróusato ekkewe mettóch a káé atun a fiti Gilead are atun an angangen misineri. Minne úa káé seni a elipwákéchúei lón ái kewe afalafal me a álisiei le silei ifa ussun úpwe apéchékkúla fefinei kewe Chón Kraist.—SalF. 25:11.

Pwúlúwei we mi áchengicheng Mary, a máló lón ewe 2013. Úa mwétéres le kúnasefáli lón ewe ótót séfé. Nge ren mwo iei, úa tipeppós le sópweeló ái kákkáé me lúkúlúk wóón Jiowa seni unusen letipei. (SalF. 3:​5, 6) Ái ekkekieki ekkewe mettóch néún Jiowa kewe aramas repwe féri lón ewe ótót séfé, a oururuei me apwapwaaei. A kapachelong ach káé ekkewe minefé mettóch ussun ach we Soukáit mi Lap me ach káé ekkewe minefé mettóch seni i! Ewer, esap naf ái kilisou ngeni ren meinisin ekkewe mettóch a áiti ngeniei, me ekkewe chómmóng mettóch mi toriei ren an kirekiréch mi somwoló.