1. Met meefiom ussun ewe enlet?

 NÉÚN Jiowa kewe aramas ra aúcheani ewe enlet lón an we Kapas. Ina met sia alónga ach lúkú wóón. (Rom 10:17) Sia lúkú pwe Jiowa a akkóta ewe mwichefelin Chón Kraist pwe epwe eú “úrelap me lóngólóngun ewe enlet.” (1 Tim. 3:15) Me sia pwapwa le álleasochisi ‘chókkewe mi wisen emmwenikich’ atun ra áweweei ewe enlet seni ewe Paipel me awora kapasen emmwen mi álisikich le féri letipen Kot.—Ipru 13:17.

 2. Me ren Jemes 5:​19, met a tongeni fis ngenikich mwirin ach káé ewe enlet?

² Iwe nge, mwirin ach etiwa ewe enlet me tipemecheres ngeni emmwenien án Kot we mwicheich, sia pwal tongeni tokkoló seni ewe enlet. (Álleani Jemes 5:19.) Setan a fókkun mochen ach sipwe úkútiw le lúkúlúk wóón ewe Paipel are wóón ekkewe emmwen sia angei seni án Kot we mwicheich.—Efi. 4:14.

 3. Pwata a lamot ach sipwe túppwél le álleasochisi minne mi enlet? (Efisus 6:​13, 14)

³ Álleani Efisus 6:​13, 14. Ekiseló chék, ewe Tefil epwe áeá kapasen angngaw le otupwaaló meinisin ekkewe mwú pwe repwe ú ngeni Jiowa. (Pwár. 16:​13, 14) Sia pwal silei pwe Setan epwe pwal mwo nge fókkun angang weires le otupu néún Jiowa kewe aramas. (Pwár. 12:9) Ina pwata a lamot ach sipwe káé le esilla sókkofesenin minne mi enlet me minne mi chofona me sipwe álleasochis ngeni minne mi enlet. (Rom 6:17; 1 Pit. 1:22) Ach kúna manaw atun ewe riáfféú mi lapalap epwe lóngólóng wóón ena!

 4. Met sipwele káé lón ei lesen?

 ⁴ Lón ei lesen, sipwe káé ruu napanap mi lamot epwe álisikich le esilla ekkewe pwóróus mi enlet seni Paipel me tipemecheres ngeni emmwenien án Kot we mwicheich. Mwirin, sipwe ppii úlúngát mettóch mi lamot sipwe féri pwe sipwe sópweeló le kémwéchúnnúk wóón ewe enlet.

EKKEWE NAPANAP MI LAMOT REN ACH SIPWE ESILLA MINNE MI ENLET

 5. Ifa ussun ach niwokkusiti Jiowa epwe álisikich le esilla minne mi enlet?

⁵ Niwokkusiti Jiowa. Ach niwokkusiti Jiowa a wewe ngeni ach sipwe fókkun tongei, iwe sisap fókkun féri met epwe eletipengawa. Sia pwapwa le káé sókkofesenin met mi pwúng me met mi mwáál, lefilen minne mi enlet me minne mi chofona, pwe sipwe tongeni angei án Jiowa chen. (SalF. 2:​3-6; Ipru 5:14) A lamot ach sisap fókkun mut ngeni ach niwokkusiti aramas an epwe péchékkúl seni ach tongei Jiowa, pokiten met a apwapwaai aramas, lape ngeni ina met a fen eletipengawa Jiowa.

 6. Ifa ussun ekkewe engol souemmwen lón Israel ra sorei minne mi enlet pokiten ar niwokkusiti aramas?

⁶ Iká sia niwokkusiti aramas lap seni Kot, iwe sia tongeni tokkoló seni ewe enlet. Ekieki pwóróusen ekkewe 12 souemmwen mi operi ewe fénú Jiowa a pwonei pwe epwe ngeni ekkewe chón Israel. A kon lap án engol me lein ekkena spai niwokkusiti ekkewe chón Kanan seni ar tongei Jiowa. Ra ereni chiener kewe chón Israel: “Sisap tongeni fiu ngeni ekewe aramas, pun ra kon pöchökül senikich.” (Num. 13:​27-31) Mi pwúng, me ren aramas, ekkewe chón Kanan ra fókkun péchékkúl seni ekkewe chón Israel. Nge iká emén a erá pwe ekkewe chón Israel rese tongeni okkufu chón oputer, iwe ese pwal ekieki ussun Jiowa. Itá úrúrún ekkena engol spai repwe nefótófót wóón met Jiowa a mochen ekkewe chón Israel repwe féri. Itá repwe ekilonei wóón met a fen féri fán iter me mwan.  Iká ina, iwe repwe mirititi pwe Jiowa a fókkun péchékkúl seni ekkewe chón Kanan. Josua me Kalep ra mochen kúna chen me ren Jiowa me rese ussun ekkena spai ese wor ar lúkú. Ra ereni ekkewe aramas: “Are ewe Samol mi Lapalap epwe kirikiröch ngenikich, epwe emwenikichelong o ngenikich ewe fanü.”—Num. 14:​6-9.

 7. Ifa ussun sipwe tongeni alapaaló ach niwokkusiti Jiowa? (Pwal ppii ewe sasing.)

⁷ Ren ach sipwe alapaaló ach niwokkusiti Jiowa, a lamot ach sipwe nefótófót wóón ach apwapwaai i lón meinisin ach kewe kefil. (Kölf. 16:8) Atun ka álleani ewe Paipel, pwisin eisinuk, ‘Iká úa nóm lón ena atun, met úpwe filaatá?’ Áwewe chék, anchangei pwe ka aúseling án ekkewe engol souemmwen erá pwe ekkewe chón Israel resap tongeni okkufu ekkewe chón Kanan. Itá kopwe lúkú minne ra erá me poputá le niwokkusiti aramas, are óm mochen apwapwaai Kot epwe fen lap seni óm niwokkusiti aramas? Pokiten ekkewe chón Israel rese lúkú pwe mi enlet minne Josua me Kalep ra erá, iwe Jiowa ese chúen mut ngeniir ar repwe tolong lón ewe Fénúen Pwon.—Num. 14:​10, 22, 23.

 8. Ifa ewe napanap a lamot sipwe angang weires le napanapeni, me pwata?

⁸ Tipetekison. Jiowa a pwáári ewe enlet ngeni chókkewe mi tipetekison. (Mat. 11:25) Sia tipetekison le etiwa álillis atun sia káé ewe enlet. (Féf. 8:​30, 31) Iwe nge, a chúen lamot ach sipwe túmúnú pwe site lamalamtekia. Iká sia lamalamtekia, sia tongeni poputá le meefi pwe minne sia pwisin ekieki a pwúng ussun chék pwúngún án Paipel kewe kapasen emmwen me ekkewe emmwen seni án Jiowa we mwicheich.

 9. Ifa ussun sipwe chék tittipetekison?

⁹ Ren ach sipwe chék tittipetekison, a lamot ach sipwe mirititi úkúúkún kisikisich fán Jiowa. (Kölf. 8:​3, 4) Sia pwal tongeni tingorei Jiowa an epwe álisikich le ámááraatá ena napanap tipetekison me wiliiti emén mi tipemecheres le káé. Jiowa epwe álisikich le aúcheani an ekiek, weween minne sia káé me lón an we Kapas ewe Paipel me an we mwicheich, lap seni pwisin ekiekich. Atun ka álleani ewe Paipel, kútta ekkewe pisekin ánnet mi affata pwe Jiowa a tongei chókkewe mi tipetekison nge a oputa chókkewe mi lamalamtekia me sikesik. Me kopwe fókkun túmúnú óm kopwe chék tittipetekison atun a kewis ngonuk eú wis mi efisi óm kopwe wisen mesemes wóón ekkóch mettóch.

SÓPWEELÓ LE ÁLLEASOCHISI MINNE MI ENLET

10. Ié kewe Jiowa a néúnéú le emmweni néún kewe aramas?

¹⁰ Sópweeló le lúkúlúk wóón ekkewe emmwen sia angei seni án Jiowa we mwicheich. Lón Israel lóóm, Jiowa a néúnéú Moses, me mwirin Josua le atoura ngeni néún kewe aramas kapasen emmwen. (Jos. 1:​16, 17) Ekkewe chón Israel ra sópwéch atun ra mirititi pwe ekkena mwán iir ra wisen tupuni Jiowa Kot. Fitepúkú ier mwirin, atun a poputá ewe mwichefelin Chón Kraist, ekkewe 12 aposel ra wisen awora kapasen emmwen. (Féf. 8:​14, 15) Mwirin, ekkóch mwán mi ásimaw lón Jerusalem ra pwal kapachelong lón ena kúmi. Atun ekkewe Chón Kraist ra álleasochisi ekkewe kapasen emmwen seni ekkena mwán mi túppwél, “án chón ekkewe mwichefel lúkú a péppéchékkúleló me ra chóchchómmóngoló iteiten rán.” (Féf. 16:​4, 5) Jiowa a pwal efeiéchúkich lón ei fansoun atun sia álleasochisi ekkewe emmwen seni an we mwicheich. Nge, epwe met meefian iká sise mochen mirititi pwe a fen ewisa ngeni ekkena mwán ar repwe emmwenikich? Sipwe pélúweni  ena kapas eis ren ach káé met a fis ngeni ekkewe chón Israel atun ra feiló ngeni ewe Fénúen Pwon.

11. Met a fis ngeni ekkewe chón Israel rese súféliti Moses, ewe emén Jiowa a filaatá an epwe wisen néúr souemmwen? (Pwal ppi ewe sasing.)

¹¹ Atun ekkewe chón Israel ra sái ngeni ewe Fénúen Pwon, ekkewe mwán mi wor maner ra sótuni Moses me wisan we Jiowa a fen ewisa ngeni. Ra erá: “Unusen ei mwichen aramas [esap chék Moses] a pin, nge ewe Samol mi Lapalap a nom lefiler.” (Num. 16:​1-3) Inaamwo iká a pwúng pwe “unusen ei mwichen aramas” ra pin mwen mesen Jiowa, nge I a fen filaatá Moses an epwe wisen emmweni Néún kewe aramas. (Num. 16:28) Atun ekkena aramas ra esiita Moses, ren enletin ra esiita Jiowa. Rese nefótófót wóón met Jiowa a mochen, nge ra nefótófót wóón met ra mochen, ina ar mochen nemenem me án aramas repwe ingeitiir. Kot a nieló ekkewe chónemmwen rese álleasochis, me pwal ekkewe fitengéréú aramas mi peniir. (Num. 16:​30-35, 41, 49) Lón ei fansoun, sia tongeni lúkúlúk pwe Jiowa ese pwapwa ren chókkewe rese súféliti kókkótun an we mwicheich.

12. Pwata sia tongeni chék sópweeló le lúkúlúk wóón án Jiowa we mwicheich?

¹² Sia tongeni chék sópweeló le lúkúlúk wóón án Jiowa we mwicheich. Atun a ffatoló pwe a lamot epwe wor eú siwil lón ach weweiti eú pwóróus mi enlet seni Paipel, are kókkótun ach angang ngeni Jiowa, ewe Mwichen Soupwúngúpwúng ese pireir le féri ekkena ekkesiwil. (SalF. 4:18) Ra féri ena pokiten ese pwal wor met ra mochen kútta me lúkún ar mochen apwapwaai Jiowa. Ra pwal achocho úkúúkún ar tongeni le alónga ar kewe kefil wóón án Kot we Kapas, ewe minen kaúk mi lamot ngeni meinisin néún Jiowa kewe aramas repwe fiti.

13. Met weween ach ákkeáni “minen kaúk ekkewe kapas mi álilliséch,” me met sipwe féri ngeni?

¹³ “Kopwe ákkeáni minen kaúk ekkewe  kapas mi álilliséch.” (2 Tim. 1:13) Án Chón Kraist eáni “minen kaúk ekkewe kapas mi álilliséch,” a wewe ngeni ar kewe asukul seni Paipel. (Jon 17:17) Ekkena asukul, iir lóngólóngun meinisin met sia lúkú. Án Jiowa we mwicheich a fen áiti ngenikich ach sipwe alúkúlúkú ngenikich pwe minne sia lúkú ra lóngólóng wóón ekkena minen kaúk. Sipwe feiéch iká sia féri ena.

14. Ifa ussun ekkóch Chón Kraist ra úkútiw le alónga ar lúkú wóón ekkewe minen kaúk mi feito seni ekkewe kapas mi álilliséch?

¹⁴ Met a tongeni fis iká sia úkútiw le alónga ach lúkú wóón ekkewe minen kaúk mi feito seni ekkewe kapas mi álilliséch? Ekieki ei kapas áwewe. Lón fansoun ekkewe aposel, ekkóch Chón Kraist ra achéúfetálei eú pwóróus ese pwúng pwe a waroto ránin Jiowa we. Eli a wor eché taropwe ekkena aramas ra ekieki pwe makkeien aposel Paul ussun ena mettóch. Ekkóch Chón Kraist lón Tesalonika rese lóóm cheki ena pwóróus, nge ra fen lúkú me pwal mwo nge achéúfetálei. Resap tupuló iká ra chemeni ekkewe mettóch Paul a fen áiti ngeniir atun a chúen nóm rer. (2 Tes. 2:​1-5) Paul a éúréúra chienan kena ar resap lúkú meinisin met ra rong. Me iei met a ereniir lesópwólóón néún we oruuen taropwe ngeni ekkewe chón Tesalonika ren an epwe álisiir lón fansoun mwer. A erá: “Ngang Paul, úa makkeei ei kapwong wóón pwisin pei. A kan iei ussun ái mak lón nei kewe taropwe meinisin pwe oupwe silei pwe pwisin ngang úa makkeei.”—2 Tes. 3:17.

15. Ifa ussun sia tongeni túmúnúkich seni ekkewe pwóróus ussun itá iir mi enlet nge ren enletin iir mi chofona? Apwóróusa eú pwóróus. (Pwal ppii ekkewe sasing.)

¹⁵ Met sia tongeni káé seni alon Paul kewe ngeni ekkewe chón Tesalonika? A lamot sipwe eáni mirit atun sia rong och mettóch ese tipeeú ngeni met sia káé seni Paipel, are atun sia rong eú pwóróus mi ámáirú. Lón ewe Soviet Union, chón oput kich ra ngeni chienach kewe mwán Chón Kraist eché taropwe ra erá pwe seni ewe ofesilap lón New York. Ena taropwe a pesei ekkóch ekkena Chón Kraist ar repwe féraatá eú mwicheich mi pwisin imuuló wóón an. Ussun itá mi fen enlet  ena taropwe. Nge ekkena Chón Kraist mi túppwél rese tupuló. Ra mirititi pwe ewe pwóróus lón ena taropwe ese tipeeú ngeni met ra fen káé. Lón ei fansoun, fán ekkóch, chón oput ewe enlet ra áeá ekkewe mettóch, áwewe chék ren ewe Internet me social media pwe ra mochen achocho le orukorukakich me etipefesenikich. Sisap “mut ngeni emén an epwe ekkesiwili [ach] ekiek mi pwúng,” nge sipwe fen túmúnúkich ren ach pwisin etittina iká minne sia róng are álleani ra tipeeú ngeni ekkewe pwóróus mi enlet sia fen káé.—2 Tes. 2:2; 1 Jon 4:1.

16. Me ren Rom 16:​17, 18, met a lamot sipwe féri atun ekkóch ra achéwú pwóróus mi ú ngeni ewe enlet?

¹⁶ Tittipeeúfengen me chókkewe mi túppwél ngeni Jiowa. Kot a mochen ach sipwe tipeeúfengen lón ach fel ngeni i. Sipwe chék tittipeeúfengen iká fansoun meinisin sia alónga ach lúkú wóón minne mi enlet. Chókkewe mi achéwú pwóróus mi ú ngeni ewe enlet, ra efisi tipefesen lón ewe mwichefel, iwe Kot a éúréúrakich ach sisap “chiechi ngeniir.” Pokiten iká sia chiechi ngeniir, sia tongeni towawoló seni ewe enlet.—Álleani Rom 16:​17, 18.

17. Ikkefa ekkewe feiéch sipwe kúna iká sia esilla ekkewe pwóróus mi enlet me akkamwéchúúr?

¹⁷ Atun sia esilla ekkewe pwóróus mi enlet me kémwéchúnúk wóór, sipwe pacheéch ngeni Jiowa me epwe chék péppéchékkúl ach lúkú. (Efi. 4:​15, 16) Sisap tupuló ren án Setan kewe afalafal mi chofona me kapasen angngaw, nge sipwe chék núkúnúkéch fán án Jiowa túmún atun ewe riáfféú mi lapalap. Kémwéchúnúk wóón minne mi enlet, iwe ‘ewe Koten kinamwe epwe nónnóm reom.’—Fil. 4:​8, 9.