ME REN ekkewe chón Ipru lón ewe Fénúen Pwon pwe ar ier fán iten angang a poputá ren ar ttu pwúl me ar amwora pwikil. Ena a sereni September/​October lón ach ei fansoun.

Aramas ra kan alónga ttamen eú pwinin maram wóón mwékútúkútún ewe maram, a kan 29 are 30 rán ttamen eú maram. Eú ier a pwal lóngólóng wóón mwékútúkútún akkar. Iwe nge, eú ier mi lóngólóng wóón mwékútúkútún ewe maram, a mwoch seni eú ier mi lóngólóng wóón mwékútúkútún ewe akkar. Ina popun, aramas ra kútta alen ar repwe ataitapa ekkena fansoun. Ra féri ena ren ar apachaatá fitu rán, are fán ekkóch ra apachaalong pwal eú maram mwen poputáán ewe ier mwirin. Ar féri ena esin kókkót a ataitapa ewe pwinin maram ngeni ar fansoun fót me kinikin uwaan atake.

Iwe nge lón ránin Moses we, Kot a ereni néún kewe aramas pwe ewe ier mi pin a poputá lón ewe maram Apip, are Nisan, nge lón ach ei fansoun ina March/​April. (Eks. 12:2; 13:4) Ewe fetellap mi fis lón ena maram, a fis atun fansoun kinikin uwaan parli.​—Eks. 23:15, 16.

Emén soukáé a erá pwe a mecheres ngeniir ar repwe silei ineet atun repwe apachaalong pwal eú maram lón néúr pwinin maram. A pwal erá: “Ewe mwéngéén Pasofer a fis atun leunusen maram lón ewe maram Nisan (14 Nisan), me a chék fiffis mwirin ewe vernal [are, spring] equinox . . . Ika ekkewe chón Jus ra kúna pwe a tori lesópwólóón ewe ier, me ewe Pasofer epwe fis mwen ewe vernal equinox, iwe ra apachaalong pwal eú maram mwen Nisan.”

Chón Pwáraatá Jiowa ra féri ena atun ra akkóta ránin ewe Fááfen Ach Samol mi kan fis March/April mi sereni Nisan 14 lón néún chón Ipru we pwinin maram. Án Jiowa we mwicheich a mwittir esile ngeni meinisin ekkewe mwichefel wóón unusen fénúfan menni rán ewe Fááfen Ach Samol epwe fis lón. *

Chón Ipru ra silei ineet eú maram epwe much me ineet eú maram a poputá? Lón ei fansoun, sia tongeni chék nelóng lón eú pwinin maram are katol wóón néúch mechá. Iwe nge, ese ina usun me lóóm.

Atun fansoun ewe Noter, eú maram a tori 30 rán ttaman. (Ken. 7:11, 24; 8:3, 4) Nge mwirin, me ren néún chón Ipru pwinin maram pwe ese chék kaúk ttamen eú maram wóón 30 rán. Me rer pwe eú maram a poputá atun a kerán ling ewe maram, ina 29 are 30 rán mwirin poputáán ewe maram mwan.

Lón eú atun, iei met Tafit me Jonatan ra erá atun ra fós usun poputáán eú maram: “Lesor pwinin elingeling.” (1 Sam. 20:5, 18) Iwe lón ar na fansoun, ra fen silei úkúkún ttamen eú me eú maram. Nge ifa usun ekkewe chón Israel ra silei ineet a poputá eú maram? Án chón Jus kewe allúk me eéreni mi iteni Mishna, a affata ifa usun. A pwári pwe mwirin án ekkewe chón Jus liwin seni ar eoló Papilon, án chón Jus mwichen soukapwúng tekia a kan wisen apwúngaló ena. Atun ekkewe fisu maram mi kan fis fetellap lón, ena mwichen kapwúng tekia ra chufengen lón ewe inikin rán lón eú me eú maram. Ekkena mwán ra wisen filatá ineet eú maram mwirin epwe poputá. Nge met ar kefil a lóngólóng wóón?

A wor ekkewe mwán ra kan útá wóón ekkewe leeni mi tekia lón Jerusalem me ra katol fán láng me kútta ika ineet epwe unus sefál ewe maram. Repwe mwittir esile ngeni án chón Jus we mwichen soukapwúng tekia. Atun a naf án ekkena mwán pisekin pwáraatá pwe a unus ewe maram, iwe repwe esilesil pwe a poputá eú mineféén maram. Nge ifa usun ika ekkewe mwán rese tongeni kúna ika a unus ewe maram pokiten a kuchuchu are toputop? Me ikena ie repwe esilei pwe ena maram 30 rán ttaman, iwe ewe maram mwirin a tongeni poputá.

 Án chón Jus we mwichen soukapwúng tekia a esilei poputáán eú mineféén maram ren ar ékú eú ekkei wóón ewe Chukun Olif kkan ngeni Jerusalem. Lón pwal ekkóch leeni mi tekia lón Israel, ra pwal ékú eú ekkei pwe meinisin repwe kúna. Mwirin och fansoun, ra tiinaaló chón kúné. Ina popun ekkewe chón Jus lón Jerusalem, lón unusen Israel, me pwal ekkewe ekkóch mi paras lón ekkewe fénú, ra silei ineet a poputá ewe minefé maram. Iwe meinisin ra tongeni fitippékú ekkewe fetellap mi fis iteiten ier.

Eli kopwe sani álilliséchún ewe chart pwe epwe álisuk le weweiti ekkewe maram, fetellap, me sissiwilin ásepwál lón fansoun ekkewe chón Israel.