Lape ngeni aramas ra tipeeú ngeni pwe ekkóch napanap a ffat pwe ra pwúng are mwáál. Áwewe chék, nimanaw, reip, me kirikiringaw ngeni semirit lón pekin lisowu ra fókkun ánioput me ren aramas, nge ren pwúngiéch, kirekiréch, me meefieni meefien aramas ikkena ekkewe napanap mi múrinné. Nge ren ekkóch kefil sia féri lón manawach áwewe chék ren pekin lisowu, wenechar, are túmúnún semirit, chómmóng aramas ra lúkú pwe ese wor mi pwúng are mwáál wóón ekkena mettóch. Ra ekieki pwe lape ngeni ekkewe kefil ra eáni, mi chék pwúng. Fán chómmóng aramas ra féri ar kewe kefil alóngólóng wóón met ra meefi are met ekkewe ekkóch ra meefi. Itá ina ewe mettóch mi pwúng ach sipwe féri?

Fán chómmóng sia féri kefil lóngólóng wóón ach pwúkún meefi iká och mettóch a pwúng are mwáál, ina ach we mwelien letip. (Rom 2:​14, 15) Pwal mwo nge ekkewe semirit ra silei atun och mettóch ese pwúng me ra meefi mengiringir atun ra féri och mettóch mi mwáál. Atun sia mááritá, sia káé minne chókkewe sia kan chiechi ngeniir ra ekieki pwe mi pwúng are mwáál. Atun sia féri kefil, mwelien letipach a ámmeef ngenikich iká ach kewe kefil ra tipeeú ngeni minne sia eáni lúkú.

Ach pwúkún meefi iká och mettóch mi pwúng are mwáál a tongeni amwékútúkich le meefieni meefien aramas, pwáári kilisou, pwúngiéch, me úméúméch ngeni ekkewe ekkóch. A pwal tongeni túmúnúkich seni ach sipwe ámeteki chókkewe sia tongeer are féri ekkewe mettóch mi tongeni ásáwakich me emengiringirikich.

Itá minne sia meefi ina eú emmwen mi alúkúlúk? Iei met Garrick a apasa atun a filaatá met a mochen féri lesáráféén, “Úa pwisin apwúngaló met mi pwúng me mwáál me rei.” Iwe nge, a kúna pwe ese sópwéch an féri met a meefi pwe mi pwúng. A apasa pwe ese fókkun meefi pwapwa pún manawan “a uren limengawen féfférún  lisowumwáál, áeámwáállin drugs, únnúmmóng sakaw, me féfférún akkachofesá.”

Me lúkún met sia pwúkún meefi, sia kan féri kefil lóngólóng wóón met aramas ra ekieki. Lupwen sia féri ena, sia kúna álillis seni ar tipáchem. Sia tongeni kúna ésúúfél seni chón ach famili, chienach kewe, me ekkóch aramas atun sia féri met ra ekieki pwe mi pwúng.

Itá minne aramas ra meefi ina eú emmwen mi alúkúlúk? Lefépwúlún Priscila a kan féri met chómmóng chienan kewe ra féri me a lisowumwáál mwen an pwúpwúlú. Inaamwo iká ekkóch ra ekieki pwe minne a féri mi pwúng, nge ese pwapwa. A apasa: “Ái féri met meinisin ra féri ese apwapwaaei. A emmwen ngeniei ái úpwe féri ekkewe mettóch mi tiparoch me efeiengaw.”

Atun sia filaatá lefilen minne mi pwúng me mwáál, ach kewe memmeef me meefien ekkewe ekkóch epwe álilliséch ngenikich, nge esap fansoun meinisin repwe sópwéch. Fán ekkóch eli sipwe pwisin atolongakich me ekkewe ekkóch lón osukosuk pokiten sise kúna met ach kewe kefil repwe emmwen ngenikich. (Än Salomon Fos 14:12) Ikáámwo sia ekieki pwe mi pwúng met kich me ekkewe ekkóch sia filaatá, nge a chúen tongeni efeiengaw me neman epwe fen siwil ach ekiek me mwirin. Áwewe chék, ekkóch féffér aramas ra piin ekieki pwe mi mwáál, ussun rese chúen meefi pwe mi wor ngawer, nge pwal ekkóch sókkun féffér aramas ra piin ekieki pwe mi éch, iei ra meefi pwe mi ngaw.

Mi wor emmwen mi kon múrinné ussun ach sipwe filaatá minne mi pwúng me mwáál? Mi wor emmwen sia tongeni apwénúetá iei nge sisap lichippúng ren me mwirin?

Sia kilisou pwe mi wor eú puken emmwen mi alúkúlúk me pwúng mi tongeni álilliséch ngeni aramas ekis meinisin. Ewe lesen mwirin ei epwe áiti ngenikich ia sia tongeni kúna me ie emmwen mi alúkúlúk fán iten minne mi pwúng me mwáál.