PWÓRÓUS LÚKÚNPÉÉN | KA AÚCHEANI ÁN KOT WE LIFFANG MI LAPALAP?
Ifa Usun Kopwe Liiwini án Kot we Liffang mi Lapalap?
“Sia nom fän nemenien än Kraist we chen ngenikich, pun . . . A mäla fän iten aramas meinisin, pwe chokewe mi manau resap chüen manau fän püsin iter, nge repwe chök manau fän iten ewe mi mäla o manausefäl fän iter.”—2 Korint 5:14, 15.
EÚ LIFFANG mi lululó aúchean itá epwe amwékútúkich le pwáraatá ach kilisou. Jesus a menlapei ena lesen mwirin an echikaraatá engol mwán seni ar samau ese wor sáfeian lón ena atun. Emén me lein ekkena engol mwán “a liwinsefäl o mwareiti Kot fän mwelian mi leüömong.” Mwirin Jesus a apasa: “A wor engol mwän mi pöchökülsefäl. Ikafa ir ekewe tiweman?” (Lukas 17:12-17) Met sia káé seni ei lesen? Pwata a ina me mwittirin ach ménúkaaló kirekiréchún ekkewe ekkóch ngenikich!
Ewe méén kepich ese wor táppin. Ina ewe liffang mi lapalap seni liffang meinisin. Nge ifa usun kopwe liiwini minne Kot a féri fán itom?
-
Sissileeló ewe Chón Awora. Ewe méén kepich epwe chék mwittir le awora manaw esemuch ngeni aramas meinisin? Iei met Jesus a apasa lón an we iótek ngeni Kot: “Iei manau esemüch: Ar repwe silei en, ewe eman chök Kot mi let, repwe pwal silei Jesus Kraist, ewe ka tinato.” (Johannes 17:3) Ika emén a erenuk pwe emén mwán a selánuk me lekúkkúnum, esap pwe kopwe mochen silei usun ena mwán me met popun a selánuk? Jiowa Kot, ewe a awora ewe méén kepich mi atoto manaw, a mochen sipwe silei I me a pwal mochen sipwe ririéch ngeni. Ewe Paipel a pesekich: “Oupwe arap ngeni Kot, iwe, epwe arap ngenikemi.”—James 4:8.
-
Anganga óm lúkú ewe méén kepich. “Iö a lükü ewe Nau a eäni manau esemüch.” (Johannes 3:36) Met weween ach lúkú ewe Nau? A wewe ngeni ach sipwe anganga ach lúkú ewe méén kepich epwe fiti féffér. (James 2:17) Nge met sókkun féffér? Áwewe chék, ren óm kopwe eáni eú liffang, kopwe assonga me angei. Pwal ina usun mi lamot kopwe assonga me angei ewe méén kepich. Óm assonga me angei a wewe ngeni óm káé minne Kot a mochen kopwe manaweni lón manawom me apwénúetá. * Iótek ngeni Kot ren omusomusen óm kewe tipis me eú mwelien letip mi limeliméch. Kopwe fókkun lúkú pwe ewe méén kepich epwe fókkun atoto manaw esemuch mi kinamwe, núkúnúkéch me wéúéch fán iten chókkewe mi anganga ar lúkú.—Ipru 11:1.
-
Fiti Áchechchemen án Jesus máló. Jesus a ngenikich eú rán iteiten ier pwe epwe áchema kaworen ewe méén kepich. Iei met a apasa usun ena Áchechchem: “Oupwe föri ei pwe oupwe chechemeniei.” (Lukas 22:19) Chón Pwáraatá Jiowa repwe féri Áchechchemen án Jesus we máló lón Oruu, April 11, 2017, mwirin tuputiwen ewe akkar. Ttamen ewe prokram eú aua, epwe kapachelong eú afalafal usun aúchean án Jesus máló me ifa usun a efeiéchúkich ikenái me pwal lón mwachkkan. Lón ewe ier, 20 million som aramas wóón unusen fénúfan ra fiti ena Áchechchem. Ám aua fókkun etiwok pwe kopwe fitikem le liiwini án Kot we liffang mi fókkun lapalap.
^ Ewe alen óm kopwe sissileeló Kot me arap ngeni mi kon múrinné, ina óm kákkáé an we Kapas, ewe Paipel. Kopwe féri ei ren álillisin emén Chón Pwáraatá Jiowa are ren óm tétá wóón ám website, www.mt1130.com.
Neman Kopwe Pwal Sani
PWÓRÓUSEM
Áchechchemen án Jesus Máló
Fite million aramas ra kan mwichfengen iteiten ier pwe repwe féri áchechchemen án Jesus máló. Ka ketiw le fiti pwe kopwe silei ifa usun ei mwich mi aúchea a weneituk.
ÁCHECHCHEM
Chechchemeni Málóón Jesus
Aua enletin etiwok pwe kopwe fitikem lón ei rán mi fókkun aúchea. Kopwe káé ifa usun án Jesus manaw me máló a tongeni álisuk.
