Met Jises A Apasa Usun Pwisin I
Met Jises A Apasa Usun Pwisin I
“Esor än Jises tipemwärämwär ika i iö, ia a feito me ie, pwata a feitiw fönüfan, me met epwe fis ngeni lon mwach.”—SOUMAK HERBERT LOCKYER.
MWEN ach sipwe tongeni lükü alon Jises kewe, a lamot sipwe silei ekkoch pworaus usun i. Wesewesen iö na Jises? Ia a feito me ie? Ifa populapen manauan? Lon ekkewe rüanü puken kapas allim, Mattu, Mark, Luk, me Jon, sipwe tongeni küna pölüwen ekkeei kapas eis seni pwisin alon Jises.
A manau mwen an uputiw woon fönüfan Jises a apasa: “Me mwen än Apraham esamwo uputiu, ngang üa fen nom.” (Jon 8:58) Eperiam a manau 2,000 ier mwen än Jises uputiw woon fönüfan. Nge Jises a manau me mwen än ewe mi tuppwöl Eperiam manau. Ia Jises a manau ie? Iei met a apasa: “Üa feitiu seni läng.”—Jon 6:38.
Ewe Nöün Kot A chommong nöün Jiowa chonläng. Iwe nge, Jises mi sokko seniir. A pwisin eita ngeni “Nöün Kot Aleman.” (Jon 3:18) Weween pwe Jises i chök ewe emön Kot a pwisin föratä. Kot a föratä mettoch meinisin lon läng me fönüfan ren nöün we äläemön.—Kolose 1:16.
“Nöün Aramas” Jises a nöünöü ei mwuten kapas lap seni ekkewe ekkoch itelap pwe epwe weneiti i. (Mattu 8:20) A pwäratä pwe esap i emön chonläng mi ewilalo ngeni emön aramas. Nge i wesewesen emön aramas. Ren ewe ngün mi fel, Kot a siwili manauan lon läng ngeni fönüfan, iwe a walong lon än Meri we leenien mönükol, iwe a koluesini. Ina minne, Jises a uputiw, usun emön aramas mi unusöch, esor tipisin.—Mattu 1:18; Luk 1:35; Jon 8:46.
Ewe Messaia mi pwonetiw Emön fin Sameria a apasa ngeni Jises: “Üa silei pwe ewe Messaia epwe wareto.” Iwe, Jises a pölüweni: “Ngang ätewe mi kapas ngonuk.” (Jon 4:25, 26) Ewe kapas “Messaia” are “Kraist” a wewe ngeni “Emön mi Kepit.” Jises a kepit are kefilitä me ren Kot pwe epwe wiseni eü wis mi kkolo aücheaan le apwönüetä än Kot kewe pwon.
Populapen an feito Jises a apasa: “Upwe fokun afalafala ewe Pworausen Manau usun Mwün Kot lon pwal ekoch telinimw, pun iei popun Kot a tinieito.” (Luk 4:43) Inaamwo ika a föri chommong mettoch mi mürinnö le pwäkini osupwangen aramas, nge a akkomwa ewe angangen afalafal usun än Kot we Mwu lon manauan. Sipwap pworaus woon mwirin met a afalafala usun ena Mwu.
A ffat pwe Jises esap chök i emön aramas kisikis. * Sipwele küna pwe pokiten a fen manau lon läng, a watte manamanen an kapas atun a nom woon fönüfan. Iwe, sisap mäirü pwe än Jises afalafal epwe kküü manauen chommong aramas woon fönüfan.
[Pwóróus fan]
^ Ren pwal ekkoch pworausen Jises me wisan we lon met Kot a fen aotalo, nengeni ewe puk Met ewe Paipel a Wesewesen Apasa? sopwun 4, förien Chon Pwäratä Jiowa.