Ka Oput minne mi Ngaw?

“Ka [Jises] oput mine a ngau.”​—IPRU 1:9.

1. Met Jises a äiti ngeni nöün kewe chon käeö usun tong?

JISES a menlapei lamoten tong lupwen a ereni nöün kewe chon käeö: “Iei üpwe ngenikemi eu allük mi fö: Oupwe echenifengenikemi lefilemi. Usun ngang üa echenikemi, iei usun pwal ämi oupwe echenifengenikemi. Are oupwe echenifengenikemi, aramas meinisin repwe silei, pwe ämi nei chon kaiö.” (Jon 13:34, 35) Jises a allükü ngeniir ar repwe pwäratä tong lefiler. Ena tong epwe ina esissileer. A pwal apöchökküler ren an erä: “Oupwe echeni chon oputakemi o iotek fän iten chokewe mi ariaföüükemi.”​—Mt. 5:44.

2. Chon tapwelo mwirin Kraist repwe ämääraatä ar oput met?

² Iwe nge, me lükün än Jises asukula nöün kewe chon käeö usun tong, a pwal äiti ngeniir met repwe oput. Iei alon Paipel usun Jises: “Ka efich pwüng, nge ka oput mine a ngau.” (Ipru 1:9; Kölf. 45:7) Ei wokisin a affata ngenikich pwe sisap chök ämääraatä ach tongei minne mi pwüng nge sipwe pwal ämääraatä ach oput minne mi ngaw. A pwal öch alon aposel Jon atun a titchiki le apasa: “Eman mi föri tipis a atai än Kot allük, pun tipis wewen atai allük.”​—1 Jon 3:4.

3. Met sipwe etittina lon ei lesen mi weneiti ach pwäratä oput minne mi ngaw?

 ³ Ina minne, kich Chon Kraist sipwe pwisin eisinikich, ‘Ngang ua oput minne mi ngaw?’ Sipwe etittina ifa usun sipwe tongeni pwäratä ach oput minne mi ngaw lon ekkeei rüanü mettoch: (1) ach ekiek usun äeämwäällin sakaw, (2) ach ekiek usun angangen rong, (3) ach föfför me ekiek atun sia küna minne mi ngaw, me (4) meefiach usun chokkewe mi tongei minne mi ngaw.

Kosap Anomuk fän Nemenien Sakaw

4. Pwata esor pinepinen än Jises awora öüröür usun ngawen ünnüpuch?

⁴ Fän ekkoch Jises a ün wain, nge a mirititi pwe ina eü liffang seni Kot. (Kölf. 104:14, 15) Iwe nge, esap fän eü a äeämwäälli ena liffang ren an ünnüpucholo. (SalF. 23:29-33) Ina minne, esor pinepinen än Jises epwe awora fön usun ngawen ünnüpuch. (Älleani Luk 21:34.) Äeämwäällin sakaw a tongeni emmwen ngeni pwal ekkoch tipis watte. Ina minne, aposel Paul a makkeei: ‘Ousap apuchakemi ren wain, pun ei epwe afeiengauakemi. Nge oupwe urela ren än Kot we manaman.’(Ef. 5:18) A pwal fönöü ekkewe chinnap fefin lon ewe mwichefel ar “resap riri ngeni ükün wain.”​—Tait. 2:3.

5. Ekkewe ra filatä ar repwe ün sakaw repwe pwisin eisiniir met sokkun kapas eis?

⁵ Ika ka filatä om kopwe ün sakaw, iwe, kopwe pwisin eisinuk: ‘Ua pwal eäni än Jises ekiek usun ünnüpuch? Ika mi lamot ai upwe fönöü ekkoch usun ünnüpuch, upwe kinamwe le fönör? Ua ün fän iten ai upwe mönüki ai kewe osukosuk are ekinamweei? Ifa ükükün sakaw ua ünümi iteiten wiik? Ifa meefiei atun emön a ämmeef ngeniei pwe ua kon ünnümmong? Ua fen timaüolo are fen song ngeni?’ Ach anomukich fän nemenien sakaw a tongeni kküü ach tufichin ekieköch me filiöchü mettoch. Chon tapwelo mwirin Kraist repwe tümünü ar tufichin ekiek.​—SalF. 3:21, 22.

Tümünü Seni Föfförün Rong

6, 7. (a) Ifa usun föfförün Jises ngeni Setan me ekkewe chonläng mi ngaw? (b) Pwata föfförün rong a chöüfetäl ikenäi?

⁶ Lupwen Jises a nom woon fönüfan, a pöchökkül le ü ngeni Setan me nöün kewe chonläng mi ngaw. A pworacho ngeni än Setan sossotuni an tuppwöl. (Luk 4:1-13) A pwal esilla ekkewe sossot mi sotun etipetipa an ekiek me föfför, iwe a ü ngeniir. (Mt. 16:21-23) Jises a älisi ekkewe mi letip wenechar pwe repwe ngaselo seni fän nemenien ekkewe chonläng mi ngaw.​—Mark 5:2, 8, 12-15; 9:20, 25-27.

⁷ Mwirin än Jises wiliti king lon 1914, a limeti läng seni än Setan me nöün kewe chonläng etipetip mi ngaw. Iwe, Setan a fokkun achocho le “atupu unusen chon fanüfan” iei lap seni me loom. (Pwar. 12:9, 10) Ina popun, sisap mäirü ren lapoloon me chöüloon än aramas mwasangasangeiti angangen rong. Met sipwe tongeni föri pwe sipwe tümünükich seniir?

8. Ifa usun sipwe pwisin etittinakich usun ach fili ach minen apwapwa?

⁸ A fokkun ffat än Paipel öüröür usun efeiengawen angangen rong. (Älleani Tuteronomi 18:10-12.) Ikenäi, Setan me nöün  kewe chonläng mi ngaw ra etipetipa ekiekin aramas ren ekkewe kachito, puk, me minen urumwot woon computer mi apöchökküla angangen rong. Ina minne, ika sia filatä ach minen apwapwa, emön me emön leich epwe pwisin eisini: ‘Lon ekkewe maram ra lo, ua fen filatä le eäni minen apwapwa kachito, prokram lon TV, minen urumwot lon computer, puken katol mi menlapei angangen rong? Ua weweiti lamoten ai upwe ü ngeni etipetipaen angangen rong are ua ekisikisaalo efeiengawan? Ua fen ekieki ika epwe met meefien Jiowa usun ekkewe minen apwapwa ua filiretä? Ika ua fen etiwa ekkena etipetip seni Setan, ai tong ngeni Jiowa me an kewe kapasen emmwen mi pwüng epwe amwökütüei le wolükülük me ü ngeniir?’​—Fof. 19:19, 20.

Älleasochisi än Jises Öüröür Usun Minne mi Ngaw

9. Ifa usun emön epwe tongeni ämääraatä an tongei minne mi ngaw?

⁹ Jises a apöchökküla ekiekin Jiowa ren met mi pwüng me mwääl usun lisowu. A apasa: “Ousap aleani mine a mak lon ekewe Taropwe mi Pin, pwe seni lepoputän ewe mi föri aramas a föri mwän me fefin? Iwe, Kot a apasa, ‘Iei mine eman aramas epwe likitala saman me inan o pach ngeni pwülüan, iwe, ekewe ruoman repwe wiliti eu chök inis.’ Iei mine resap chüen ruoman, pwe eman chök. Mine Kot a rifengeni esap wor eman aramas epwe mwütifeseni.” (Mt. 19:4-6) Jises a silei pwe minne sia nengeni ren mesach a tongeni kküü letipach. Ina minne, lon an we Afalafal woon ewe Chuuk, a apasa: “Oua fen rongorong pwe ekewe sensen lamalam ra apasa, ‘Kosap lisowu.’ Nge ngang üpwe ürenikemi: Are eman mwän a nenengeni eman fefin o a mochenia ngeni, ätewe a fen tipisin lisowu ngeni ren an ekieki neminewe lon lelukan.” (Mt. 5:27, 28) Ekkewe ra tunalo än Jises öüröür ra wesewesen ämääraatä ar tongei minne mi ngaw.

10. Apworausa eü pworaus mi pwäratä pwe emön mi tufichin pöütalo an katol sasingin kapasingaw.

¹⁰ Setan a achöüfetälei föfförün lisowu mwääl ren sasingin kapasingaw. Ototen ei fönüfan a ur ren ena mettoch. Ekkewe ra kakkatol sasingin kapasingaw ra küna pwe a weires an epwe tölülo seni ekiekiir minne ra fen katol. Ra pwal mwo nge tongeni umwesilo le kakkatol. Nengeni met a fis ngeni emön chon Kraist. A erä: “Ua kakkatol sasingin kapasingaw le monomon. Ua manaueni ruu sokkun manau. Manauei usun emön chon Kraist, nge pwal eü ai akkanchangei manauei ren minne ua kakkatol. Ua silei pwe ei föfför mi mwääl nge ua chök ekieki pwe Jiowa a chüen etiwa ai angang ngeni.” Met a siwili an na ekiek? Iei alon: “A mmen fokkun weires nge ua filatä le ereni ekkewe elter ai osukosuk.” Iwe, pwiich ei a ngaselo seni ei föfför mi limengaw. Pwal iei alon: “Mwirin ai elimöchü manauei seni ei tipis, iwe, ua wesewesen meefi pwe mwelien letipei a limöch.” A lamot chokkewe mi oput minne mi ngaw repwe käeö le oput sasingin kapasingaw.

11, 12. Ifa usun sipwe pwäratä ach oput minne mi ngaw atun sia filatä nöüch nikättik?

¹¹ Nikättik me kapasan ra tongeni achüngü meefiach, iwe, pwal letipach. Nikättik ina eü liffang seni Kot, ra nönöünöü lon ewe fel mi enlet seni loom. (Eks. 15:20, 21; Ef. 5:19) Nge än Setan ei otot a achöüfetälei nikättik mi apöchökküla föfför mi ngaw. (1 Jon 5:19) Ifa  usun kopwe silei pwe ekkewe nikättik ka aüseling ngeniir ra kan elimengawok are rese?

¹² Ka tongeni pwisin eisinuk: ‘Ekkewe ua aüseling ngeniir ra apöchökküla ni manau, lisowu mwääl, mocheisou me esiita Kot? Ika upwe chök älleani ngeni emön kapasan nge ese fiti nikättikkin, epwe ekieki pwe ua oput minne mi ngaw are a fen pwä pwe letipei a limengaw?’ Sise tongeni erä pwe sia oput minne mi ngaw ika sia kan akkaüseling ngeni ekkewe köl mi apöchökküla minne mi ngaw. Jises a erä: “Ekewe mettoch mi towu seni lon awan ra pop seni lelukan, ina mine a alimengaua eman aramas. Pun seni lon lelukan a towu ekiek mi ngau, ekiekin ninni, lisowu, mocheisou, solä, chofona me aitengaua aramas.”​—Mt. 15:18, 19; apöpö ngeni Jemes 3:10, 11.

Eäni Ekiekin Jises Usun Chokkewe mi Tongei Minne mi Ngaw

13. Ifa ekiekin Jises usun chokkewe a fen pöchökkülelo letiper le föfföri tipis?

¹³ Jises a erä pwe a feitiw fönüfan pwe epwe pesei ekkewe chon tipis le aier. (Luk 5:30-32) Iwe nge, ifa ekiekin Jises usun chokkewe a fen pöchökkülelo letiper le föfföri tipis? Jises a tuwenewen le awora öüröür ren tümün seni etipetipaen ekkena sokkun aramas. (Mt. 23:15, 23-26) A pwal affata: “Esap aramas meinisin mi aita ngeniei ‘Samol, Samol’ repwe tolong lon Mwün Läng, nge chokewe chök mi föri letipen Semei lon läng. Chomong repwe apasa ngeniei lon ewe ränin kapwüng, ‘Samol, Samol, ifa usun, äm aisap afalafal fän itom? . . . Aisap pwal föri chomong manaman fän itom?’” Iwe nge, epwe asuolo chokkewe rese aier me föfföri minne mi ngaw me apasa: “Oupwe sü seniei.” (Mt. 7:21-23) Pwata ra küna ena sokkun kapwüng? Pokiten ra süfölüngaweiti Kot me eriäfföüü aramas ren ar föfföringaw.

14. Pwata ekkewe chon tipis rese aier repwe katowu seni mwichefel?

¹⁴ Än Kot kapas a allükü pwe ekkewe chon tipis rese aier repwe katowu seni ewe mwichefel. (Älleani 1 Korint 5:9-13.) A mmen lamot ei ren ekkeei ülüngät popun: (1) tümünü iteöchün iten Jiowa, (2) tümünü limöchün ewe mwichefel, me (3) älisi ewe chon tipis an epwe aiersefäl ika mi tufich.

15. Ika sia mochen tuppwöl ngeni Jiowa, ikkefa ekkewe kapas eis sipwe ekieki?

¹⁵ Ka eäni ekiekin Jises usun chokkewe ra fen chök föfföri föfför mi ngaw? A lamot sipwe ekieki ekkeei kapas eis: “Upwe filatä le chichiechi ngeni emön mi katowu are pwisin atowu seni ewe mwichefel? Met ika ewe mi katowu chon ai famili, nge ese chüen nonnom leimw?’ Ena mettoch epwe tongeni sotuni ach tongei minne mi pwüng me ach tuppwöl ngeni Kot.

16, 17. Met sokkun osukosuk a tori emön inelap chon Kraist, iwe met a älisi le älleasochisi ewe kokkot fän iten ekkewe mi katowu?

¹⁶ Nengeni pworausen emön pwich fefin, nöün we ät mi watte a fen tongei Jiowa me loom. Iwe nge, lo lo lo a filatä le manaueni manau mi ngaw. Ina minne, a katowu seni ewe mwichefel. Pwiich na a tongei Jiowa nge a pwal tongei nöün we ät, ina popun a fokkun weires an epwe apwönüetä allükün Paipel an esap chiechi ngeni nöün na.

¹⁷ Met kopwe fen eäni pesepes ngeni pwiich  ei? Emön elter a fen älisi an epwe mirititi pwe Jiowa a weweiti metekin letipan. A pwal ereni an epwe ekieki metekin letipen Jiowa atun nöün kewe chonläng ra ü ngeni. Ewe elter a äweweei ngeni pwe inaamwo ika Jiowa a silei ükükün ewe weires a nom lon, nge a lamot emön chon tipis ese aier epwe katowu. Iwe, pwiich we a lefareni ena fön me tuppwöl le älleasochisi ena kokkot fän iten ekkewe mi katowu. * Ena esin tuppwöl a apwapwaai letipen Jiowa.​—SalF. 27:11.

18, 19. (a) Ach sisap foffos ngeni emön chon föfföri minne mi ngaw a pwäratä ach oput met? (b) Met epwe tongeni fis lupwen sia tuppwöl ngeni Kot me an we kokkot?

¹⁸ Ika a pwal ina usun nonnomum, chechchemeni pwe Jiowa a weweiti meefiom. Ren om kopwe aükatiw le foffos ngeni emön mi katowu are pwisin atowu, ka pwäratä pwe ka oput ewe ekiek me föfför mi ngaw a eäni. Iwe nge, ka pwal pwäratä pwe ka tongei ewe chon föfförmwääl pun ka föri minne epwe öchiti. Om tuppwöl ngeni Jiowa eli epwe fen älisi ewe mi katowu an epwe aier me liwiniti Jiowa.

¹⁹ Iei makkeien emön mi pin katowu nge a liwinsefäl: “Ua pwapwa pwe ren watteen än Jiowa tongei nöün aramas a tümünü limöchün an we mwicheich. Eli me ren ekiekin chon lükün ina eü föfförün kirikiringaw nge fen ina eü föfförün kirekiröch me mi lamot.” Om lükü pwiich ei epwe eäni ena ekiek mi öch ika chon ewe mwichefel, kapachelong an famili ra kan foffos ngeni lupwen a chüen katowu? Ach älleasochisi ena kokkot fän iten ekkewe mi katowu a pwäratä pwe sia tongei minne mi pwüng me mirititi än Jiowa pwüüng le isetiw allük usun föfför mi öch me ngaw.

‘Oput Minne a Ngaw’

20, 21. Pwata a lamot sipwe käeö le oput minne mi ngaw?

²⁰ Iei än aposel Piter öüröür: “Oupwe amolakemi o mamasa.” Pwata? “Pun Tefil, ewe chon oputakemi, a fetalfeil usun eman laion mi wörüwör, nge a kütta iö epwe oromala.” (1 Pit. 5:8) Esap fen en ena, Setan epwe oramalo? A chök longolong woon ifa ükükün om achocho le oput minne mi ngaw.

²¹ Ese mecheres ach sipwe ämääraatä le oput minne mi ngaw. Sia uputiw lon tipis me sia nom lon ei fönüfan mi apöchökküla mochenian fituk. (1 Jon 2:15-17) Iwe nge, ren ach äppirü Jises Kraist me alapalo ach tong mi alollool ngeni Jiowa, sipwe sopwöch lon ach apöchökküla ach oput minne mi ngaw. Sipwe tipeppos le “oput mine a ngau,” me unusen lükülük pwe Jiowa “a tümwünü manauen nöün kewe chon pin o angaseer seni ekewe aramasangau.”​—Kölf. 97:10.

[Ppii ewe pworaus fan]

Ifa Usun Kopwe Pölüweni?

• Met epwe älisikich le etittina ach ekiek usun sakaw?

• Ifa usun sipwe tümünükich seni angangen rong?

• Pwata a efeiengaw sasingin kapasingaw?

• Ifa usun sipwe pwäratä ach oput minne mi ngaw atun emön sia tongei a katowu?

[Kapas Eis fán Iten ewe Lesen]

[Sasing lon pekin taropwe 29]

Ika ka filatä le ün sakaw, met kopwe akkomw ekieki?

[Sasing lon pekin taropwe 30]

Tümünü seni än Setan etipetip lon ekkewe minen apwapwa

[Sasing lon pekin taropwe 31]

Chon katol sasingin kapasingaw ra ämääraatä ar tongei met?