Itä Ekkewe Semirit Repwe Käeö Usun Kot?

“A fen naf ekkewe lamalam mi efisi koput, nge ese fen naf ekkewe lamalam mi asukulakich le tongfengen.”​—Iei alon JONATHAN SWIFT, EMÖN SOU MAK PUK.

CHOMMONG aramas ikenäi repwe tipeeü ngeni alon Jonathan na lap seni 300 ier ra lo. Ren enletin ekkoch ra lükü pwe esor än ekkewe sam me in pwüüng le asukula nöür kewe usun Kot. Ra meefi pwe ekkewe semirit mi määritä lon ekkewe famili mi achocho lon lamalam ra pwal mwo nge osupwang lap seni ekkewe semirit chon ar famili rese achocho lon lamalam.

Met meefiom? Menni lein ekkeei pworaus fan a pwüng?

● Ese mumutä ngeni sam me in ar repwe asukula nöür kewe usun Kot.

● Sam me in repwe witiwit tori nöür kewe ra fen wattetä mwen repwe pworaus ngeniir usun lamalam.

● Sam me in repwe äiti ngeni nöür kewe ar lükü usun Kot, seni lekükkünür. Nge lupwen ra wattetä, sam me in repwe peseer le pwisin ännetatä ar lükü.

● Semirit repwe chök fitaalo än semer kewe me iner lükü usun Kot.

Lamalam a Efeiengawa Ekkewe Semirit?

Emön sam are in mi chchüngü nöün esap mochen pwe nöün epwe feiengaw. Nge mei pwüng än ekkoch aramas ekiek pwe mi efeiengaw än ekkewe semirit käeö usun Kot? Ren fite fite ier, sou käeö ra käeöfichi ika ifa usun än sam me in lükü lon ar lamalam a kküü manauen nöür kewe. Nge met ra käeö?

Ra käeö pwe lamalam a tongeni amürinnölo mämmääritään semirit lap seni an efeiengawer. Lon 2008, a katowu eü repot lon ewe puk itan Social Science Research, * iei met a apasa: “Lamalam a fen amürinnölo ririöchün sam me in me nau.” A pwal apasa: “A pwä pwe lamalam me sile usun Kot ra lamot ngeni manauen chommong semirit me ra aüchea ngeni ririin famili.” Ekkeei pworaus ra löllö ngeni alon Jises Kraist ei: ‘Ra feiöch chon silei pwe ra wöüngaw lon pekin lükü.’​—Mattu 5:3.

Nge ifa usun ewe ekiek pwe ekkewe semirit repwap käeö usun Kot me lamalam ika ra wattetä? Ena ekiek ese tipeeü ngeni ei pworaus mi enlet: Ekiekin emön semirit a usun chök eü pwokit mi pöön epwe amasou. Pwisin filien ekkewe sam me in ika repwe amasoua ena “pwokit” ren met ra eäni lükü me ekkewe kapasen emmwen usun minne mi pwüng me mwääl. Are mut ngeni ekkewe ekkoch ar repwe amasoua ekiekin me letipen nöür kewe.

Met mi Lamot?

Uruwo a änneta pwe lamalam a tongeni efisatä aapaap me koput. Nge ifa usun sam me in repwe tümünü nöür kewe seni efeiengawen lamalam? Ifa usun repwe asukula nöür kewe le tongei aramas?

Mi lamot pölüwen ekkeei ülüngät kapas eis: (1) Met ekkewe semirit repwe käeö? (2) Iö epwe asukuler? (3) Ikkefa ekkewe napanapen asukul epwe kon mürinnö?

[Pwóróus fan]