Sipwe Chón Apwénúetá Masouen Paipel me Chón Álleasochis lón Leeniach Ifa Usun

IKKEFA ekkewe ruu mettóch Jesus a féri lón an angangen afalafal? Áeúin, Jesus a achocho le achchúngú letipen aramas, nge ese ekiekin siwili ekkewe mwicheichen mwú. Áwewe chék, nengeni met Jesus a menlapei lón an we Afalafal wóón ewe Chuuk. Me mwen an fós usun lamoten án Chón Kraist repwe usun salt me saram, a ereni ekkewe chón aúseling pwe pwapwa mi enlet a nom ren “chon mochen föri mine a pwüng me mwen mesen Kot.” A pwal erá: “Ra feiöch chon tipetekison . . . chon limöch leluker . . . chon afisätä kinamwe.” (Mateus 5:1-11) Jesus a álisi néún kewe chón káé le kúna lamoten ar repwe etipeeúfengeni ar ekiek ngeni án Kot ekiek usun minne mi pwúng me mwáál, me lamoten ar repwe angang ngeni Kot ren unusen letiper.

Oruuan, lupwen Jesus a kúna riáfféún aramas, a chúng letipan an epwe álisiir pun a fókkun tonger. Iwe nge, i ese achocho an epwe unusen amóeló riáfféú. (Mateus 20:30-34) A echikaraatá ekkewe aramas mi semmwen, nge a chúen wor riáfféú ren semmwen. (Lukas 6:17-19) A angasaaló ekkewe aramas mi nom fán weires, nge a chúen wor riáfféú ren pwúngúngaw. A amwéngééni ekkewe aramas mi echik, nge a chúen wor riáfféú ren lengita.​—Markus 6:41-44.

Akkachchúngú Letiper me Ákkálisiir lón Ar Riáfféú

Pwata Jesus a menlapei an epwe achchúngú letipen aramas me álisiir lón ar weires, nge ese ekiekin efisi watteen siwil lón mwicheichen mwúún aramas are unusen amóeló án aramas riáfféú? Jesus a silei pwe Kot a tipeni an epwe áeá an we Mwú le arosaló mwúún fénúfan meinisin lón mwachkkan me amóeló ekkewe mettóch mi efisi án aramas riáfféú. (Lukas 4:43; 8:1) Ina minne, lón eú atun néún Jesus kewe chón káé ra pesei an epwe ekis mwo nonnom lón eú leeni pwe epwe echikaraatá ekkewe mi samau, Jesus a ereniir: “Ousipwe feila ngeni pwal ekoch sopw mi arap, pwe üpwe afalafaleer, pun iei popun ai feito.” (Markus 1:32-38) Jesus a álisi chómmóng mi meefi riáfféú lón pekin inis, nge a akkomw alamota ewe angangen afalafal me asukula aramas usun án Kot we kapas.

Ekkewe Chón Pwáraatá Jiowa ra achocho le áppirú Jesus lón ar angangen afalafal lón ei fansoun. Ra álisi ekkewe mi riáfféú ren ar awora emmwen mi álilliséch ngeniir. Nge rese ekiekin amóeló pwúngúngawen ei fénúfan. Ra lúkú pwe án Kot we mwú, ina met epwe áwesaaló ekkewe mettóch mi efisi riáfféú meinisin. (Mateus 6:10) Usun chék Jesus, ra achocho le achchúngú letipen aramas, nge rese ekiekin siwili ekkewe mwicheichen mwú. A pwúng minne ra féri, pun ren enletin, populapen osukosuken ei fénúfan ese feito seni kkótongawen ekkewe mwú, nge seni án aramas rese mirititi minne mi pwúng me mwáál.

Aramas mi Álleasochis lón Leenier

Chón Pwáraatá Jiowa ra lúkú pwe wiser usun Chón Kraist, ar repwe chón álleasochis lón leenier kewe. Ina minne, ra asamolu me súféliti ekkewe sou nemenem. Lón néúr kewe puk me lón ar angangen afalafal, ra pesei chón leenier kewe ar repwe álleasochisi ekkewe allúkún mwú. Iwe nge, Chón Pwáraatá Jiowa rese  álleasochisi eú allúk ika mi ú ngeni allúkún Kot. Ra ‘aleasochisi Kot lap seni ar aleasochisi aramas.’​—Föför 5:29; Rom 13:1-7.

Ekkewe Chón Pwáraatá Jiowa ra chuuri chón leenier kewe me eisiniir ika ra mochen etiwa eú kkótun káéén Paipel ese kamé. Pokiten ei asukul lón Paipel, a fen chúng letipen chómmóng aramas. Iteiten ier fitepúkú ngeréú aramas ra kúna álillis le pworacho ngeni ekkewe féffér mi efeiengaw, áwewe chék ren ún suupwa, únnúpuch, áeámwáállin sáfeien opuchopuch, pet wóón moni me lisowu mwáál. Ra wiliti aramas mi álleasochis pun ra káé ar repwe apwénúetá lón manawer ekkewe emmwen lón Paipel.

Pwal och, ei asukul lón Paipel a álisi chón ekkewe famili le alapaaló ar súfélfengen me amúrinnéló ewe alen pwóppwóróusfengen lefiler. Ikkeei ekkewe mettóch mi apéchékkúla ewe ririin famili. Ika a péchékkúl ekkewe famili, iwe, kókkótun sópwur kewe epwe échúló.

Mwirin om ka silei ekkeei pwóróus lón ekkeei lesen, met om ekiek: Paipel a tipeeú ngeni án aramas anofitifengeni lamalam me politics? Aapw, ese fókkun tipeeú ngeni. Nge, itá Chón Kraist mi enlet repwe aramas mi álleasochis lón sópwur kewe? Ewer, mi lamot repwe ina usun. Ifa usun repwe féri ena? Ren ar álleasochisi án Jesus we allúk pwe repwe usun chék salt me saram lón ei fénúfan.

Chókkewe mi achocho le apwénúetá ekkeei emmwen seni Kraist repwe atoto feiéch ngeni pwisin iir me ar famili pwal ngeni chón leenier kewe. Chón Pwáraatá Jiowa repwe pwapwa le áiti ngonuk ei kkótun káéén Paipel mi fiffis lón leeniom we. *

[Ekis Pwóróus lón pekin taropwe 7]

Jesus a achocho le achchúngú letipen aramas nge ese ekiekin siwili mwicheichen mwú

[Ekis Pwóróus lón pekin taropwe 8]

Chón Pwáraatá Jiowa ra lúkú pwe wiser ar repwe chón álleasochis lón leenier kewe