Káé Seni án Kot we Kapas

Met Epwe Fis lón ewe Ránin Kapwúng?

Lón ei lesen a wor ekkewe kapas eis eli ka fen eáni me epwe áit ngonuk ia kopwe tongeni kúna me ie pélúwer seni noum Paipel. Chón Pwáraatá Jiowa repwe pwapwa le pwóróus ngonuk usun pélúwen ekkeei kapas eis.

1. Met weween ewe Ránin Kapwúng?

Ei lios peliemwán a áiti ngenikich ekiekin chómmóng aramas usun ewe Ránin Kapwúng. Ra ekieki pwe lón ena rán fite billion aramas mi máló repwe útá mwen án Kot leenien motun king me kúna kapwúng wóón féfférúr kewe me lóóm, iwe ekkóch repwe angei feiéchún ar repwe manaw lón láng, nge ekkóch repwe kúna riáfféú lón ell. Iwe nge, ewe Paipel a pwáraatá pwe popun epwe fis ewe Ránin Kapwúng, pwe epwe angasaaló aramas seni pwúngúngaw. (Kölfel 96:13) Kot a fen seikaatá Jesus an epwe wisen Sou Kapwúng me eliwinato pwúngiéch ngeni aramas.​—Álleani Aisea 11:1-5; Föför 17:31.

2. Ifa usun ewe Ránin Kapwúng epwe eliwinato pwúngiéch?

Lupwen Atam, ewe áeménún mwán, a pwisin filatá an epwe ú ngeni Kot, a atoto ngeni mwirimwirin kewe tipis, riáfféú me máló. (Rom 5:12) Ren án Jesus epwe áwena ei pwúngúngaw, epwe amanawasefáli fite billion aramas mi máló. Ewe puken Pwärätä a áiti ngenikich pwe epwe fis ei mettóch atun án Jesus Kraist nemenem úkúkún engeréú ier.​—Álleani Pwärätä 20:4, 11, 12.

Ekkewe chón manawsefál repwe kúna kapwúng esap wóón féfférúr kewe me mwen ar máló. Nge repwe kapwúng wóón minne ra féri lupwen “ekewe puk” ra suukuló, ekkewe mi masou ren pwal ekkóch allúkún Kot, usun met Pwärätä sópwun 20 a apasa. (Rom 6:7) Aposel Paulus a erá pwe “ekewe chon pwüng me ekewe aramas mi ngau,” repwe kapachelong lein ekkewe repwe manawsefál pwe repwe káé usun Kot.​—Álleani Föför 24:15.

  3. Met epwe pwénútá lón ewe Ránin Kapwúng?

Ren chókkewe ra máló nge resaamwo silei Jiowa Kot me angang ngeni, epwe kawor ngeniir ewe tufichin ar repwe kerán káé usun letipen Kot me féri minne mi pwúng. Ika ra féri ena, iwe, a wewe ngeni pwe ra manawsefálitá ngeni “manau.” Iwe nge, ekkóch resap mochen aleni alen Jiowa, iwe, ar manawsefál epwe wewe ngeni “apwüng.”​—Álleani Johannes 5:28, 29; Aisea 26:10; 65:20.

Lesópwólóón ewe Ránin Kapwúng úkúkún engeréú ier, Jiowa epwe féri pwe ekkewe aramas mi álleasochis repwe unuséchúló usun chék ekkewe popun aramas. (1 Korint 15:24-28) A ifa me amwararen ena ápilúkúlúk fán iten meinisin mi álleasochis! Lón ewe sáingoon sóssót, Kot epwe atowu Satan ewe Tefil seni ewe pwang mi alóllóól, ikewe a fen kalapus ie úkúkún engeréú ier. Satan epwe sótuni sefál le okullu aramas seni Jiowa, nge chókkewe mi akkamwéchú ar tuppwél repwe pwapwaesini ewe manaw wóón fénúfan tori feilfeiló chék.​—Álleani Aisea 25:8; Pwärätä 20:7-9.

4. Ifa ewe pwal eú ránin kapwúng epwe atoto feiéch ngeni aramas?

Ewe Paipel a pwal fós usun eú ránin kapwúng mi weneiti ewe ránin katalóón ei ótót. Ei ránin kapwúng epwe mwittir feito usun chék Konikin ewe Noter lón fansoun Noa we, ewe a arosaló meinisin ewe táppin aramas mi pworoingaw. Sia pwapwa pwe ninniilóón “ekewe aramas resap meniniti Kot” epwe fis ekiseló chék, epwe elimeliméchúeló fénúfan me emmwen ngeni ewe ótót sefé, ikewe “ia pwüng epwe chöchöla ie.”​—Álleani 2 Petrus 3:6, 7, 13.

Ren pwal ekkóch pwóróus ppii pekin taropwe 244-246 lón ei puk, Met ewe Paipel A Wesewesen Apasa?, férien Chón Pwáraatá Jiowa.

[Sasing lon pekin taropwe 16]

“Ewe Sáingoon Kapwúng,” me Ren Gustave Doré, 1832-1883

[Credit Line]

Engravings by Doré