Emén mi Tongeni Wenechar lón Ei Fénúfan mi Pworoingaw?

“Sia fokun mochen föri mine a pwüng fansoun meinisin.”​—IPRU 13:18.

INAAMWO ika a péchékkúl etipetipaen tipis, ei fénúfan sia nónnóm wóón, me ewe Tefil, nge sia tufichin ú ngeniir! Ifa usun? Ren ach akkarap ngeni Kot me akkapwénúetá an kewe kapasen emmwen lón Paipel mi fen álisi aramas seni lóóm tori ikenái. Nengeni ekkeei ruu pwóróus.

KAPASEN EMMWEN LÓN PAIPEL: “Ousap apirü pomwen fanüfan.”​—Rom 12:2.

Pwóróusen Manawen Emén: Guilherme, emén chón Brazil mi wor an business mi win. A apasa pwe ese mecheres an epwe emén mi wenechar. A pwal erá: “A mecheres ngeni emén chón business an epwe poputá le féri féfférún solá, eli pokiten a kon éttúres le angang pwe epwe win ewe kompeni, are an weires ren chómmóngun ekkewe business ra kan akkuffengen. Me ren chómmóng aramas esor ngawen ar awora are angei liffangen emichimich. Ika emén a kerán poputááni an business me a watte an liwinimmang, epwe weires an epwe wenechar.”

Iwe nge, Guilherme a ú ngeni etipetipaen solá. A erá: “Mi tufich án emén epwe chúen wenechar inaamwo ika mi chéú féfférún solá lein chienan kewe chómmóng chón business. A lamot kopwe tipepéchékkúl le féri minne mi pwúng. Ewe Paipel a fen álisiei le weweiti feiéchún án emén epwe wenechar. Emén mi wenechar a limeliméch mwelien letipan, a kinamwe me a meefi aúchean. A tongeni eú minen áppirú mi múrinné lein chienan kewe.”

KAPASEN EMMWEN LÓN PAIPEL: “Chokewe mi mochen ar repwe pisekisek ra tolong lon sosot o ra tup lon eu särin chomong sokun mochenia mi umwes me afeiengau, ra atururelong lon feiengau me pöütüla. Pun mochenian moni iei popun sokopaten ngau meinisin.”​—1 Timoty 6:9, 10.

Pwóróusen Manawen Emén: André a wor an we kompeni a kan ffér alarm fán iten túmúnún imw. Fán eú, a féri an angang fán iten eú kúmiin chón soccer. Nge sárin ena watteen urumwoten soccer, André me pwal ekkewe ekkóch chón kompeni mi awora ngeni ena kúmi minne ra osupwangan, ra ló lón ewe ofes pwe repwe angei peioffur. Chón lón ewe ofes ra fókkun osukosuk pwe ra chúen álleani monien ewe urumwot. Nge pokiten a luló ewe kulók, ewe boss a chék mwittir ngeniir peioffur.

André a apwóróusa: “Lón ai sái ngeni leimw, ua kúna pwe a kon watte ewe moni ewe boss a ngeniei. Ua ekieki pwe ese mwáál ewe boss esap tongeni silei menni kompeni a mwáálliló le ngeni watteen moni. Nge ua pwal meefi riáfféún ena boss pún epwele wisen omusa ewe moni a mwáálliló wóón! Iwe, ua filatá ai upwe liwin. Ua etiketikelong lein ekkewe aramas me eliwinaló ewe moni. A fókkun máirú ewe boss pún esap fán eú emén a eliwini ngeni och moni.”

 André a pwal erá: “Ewe boss a súfélitiei ren ewe féfférún wenechar ua féri. Mwirin fite ier, ai we chék kompeni a chúen ketiw le angang fán iter, nge ekkewe ekkóch rese chúen ketiw. Ua kilisou pwe ren ai akkapwénúetá án Paipel kewe kapas emmwen mi tekia, ua iteúéch me ren aramas.”

Sia meefi núkúnúkéch ren ach silei pwe ren án Kot álillis sia tongeni pworacho ngeni ekkewe etipetip mi ngaw. Iwe nge, án emén me emén aramas achocho esap tongeni unusen amóeló pworoingaw. Populapen pworoingaw a fókkun watte, iwe, aramas rese unuséch rese tongeni pwákini. Iwe, a itá wewe ngeni pwe pworoingaw esap tongeni wesiló? Ewe sáingoon lesen epwe menlapei pélúwen ei kapas eis seni Paipel me epwe apéchékkúlakich.