Ka Tongeni Lúkúlúk Wóón Lamalam ren Pekin Maun?
Alberto a fiti eú mwichen soufiu arapakkan engol ier. A apasa: “Néúm we néúwisin lamalam mi fiffiti ám kúmiin soufiu a efeiéchúkem ren an apasa, ‘Kot a nónnóm remi.’ Iwe, ua ekieki, ‘Upwe ló nieló aramas, nge ewe Paipel a apasa, “Kosap nieló aramas.”’”
Ray a fiti ewe mwichen soufiu atun ewe Oruuen Maunen Fénúfan. Lón eú atun a eisini néúr we néúwisin lamalam: “Ka etto wóón ei siip me iótek fán iten ach ei mwichen soufiu me fán iten ám aupwe win. Nge, esap ina met chón koputach kewe ra pwal féfféri?” Ewe néúwis a apasa pwe sise weweiti án ewe Samol kewe féffér.
Ika kese menemenéch ren pélúwan na, iwe a pwal chómmóng aramas mi ina usun.
IFA ÁITIEN EWE PAIPEL?
Jesus a apasa pwe eú me lein ekkewe allúk seni Kot mi fókkun lamot, ina ach sipwe ‘echeni chon aruch usun püsin ach echenikich.’ (Markus 12:31) Jesus a itá aúkúkú ach sipwe chék tongei chón oruch ika iir seni ia are iir seni menni lewo? Aapw. A ereni néún kewe chón káé: “Are oupwe echenifengenikemi, aramas meinisin repwe silei, pwe ämi nei chon kaiö.” (Johannes 13:34, 35) Ar tongfengen lefiler epwe fókkun alóllóól, iwe, epwe ina esissileer. Esap chék ren ar resap nimanaw nge repwe pwal tipemecheres le máló fán iten pwiir kewe.
Ekkewe popun Chón Kraist ra álleasochisi alon Jesus kana. Ewe Encyclopedia of Religion a apasa: “Ekkewe meilapen néúwisin Chón Kraist lóóm, pachelong Tertullian me Origen ra affata pwe mi allúk án Chón Kraist repwe nimanaw, iwe rese tongeni fiti ewe mwichen soufiun Rom.”
FÉFFÉRÚN CHÓN PWÁRAATÁ JIOWA A TIPEEÚ NGENI EKKENA ÁITIEN PAIPEL?
Pokiten a wor chón Chón Pwáraatá Jiowa lón lap ngeni fénúen fénúfan, iwe atun a wor osukosuk lefilen ruu mwú, fán chómmóng a wor Chón Pwáraatá Jiowa lón iir me ruu. Iwe nge, ra achocho úkúkún ar tufich le akkamwéchú esissileer we itan tong.
Ekkewe néúwisin lamalam iir mi áiti ngeni aramas ar repwe eáni án Chón Kraist tong mi enlet?
Áwewe chék, lón ewe ier 1994 atun ewe maunfengen lefilen ekkewe einangen Hutu me Tutsi lón Rwanda, ekkewe Chón Pwáraatá Jiowa rese fókkun fiti. Ekkewe Chón Pwáraatá chón Hutu ra túmúnú pwiir kewe chón Tutsi, nge ekkewe chón Tutsi ra túmúnú pwiir kewe chón Hutu. Ra mwo nge mmólnetá le máló fán iten pwiir kana. Lupwen ewe mwichen soufiun Hutu itan Interahamwe a kúna án rúúemén Chón Pwáraatá chón Hutu eleenia pwiir kewe chón Tutsi, ra ereniir, “Oupwele ninniiló pún oua álisi ekkena chón Tutsi ar repwe sú.” A fókkun eletipechou pún ekkena rúúemén chón Pwáraatá chón Hutu ra ninniiló.—Johannes 15:13.
Met ka ekieki, féfférún Chón Pwáraatá Jiowa a tipeeú ngeni minne Jesus a apasa usun ewe esin tong mi pennúkúóló pwisin mochenin?
